អ្នកនាំពាក្យក្រសួងការបរទេសអ៊ីរ៉ង់លោក Esmaeil Baghaei បានរិះគន់កាលពីថ្ងៃចន្ទលើអ្វីដែលលោកហៅថាជា «វត្តមានធ្វើឲ្យមានអស្ថិរភាព» របស់សហរដ្ឋអាមេរិក ក្រោយពីអាមេរិកបញ្ជូនយន្តហោះទម្លាក់គ្រាប់បែក B-52 ទៅកាន់តំបន់មជ្ឈិមបូព៌ា។ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មាន AFP។
លោក Baghaei បានថ្លែងនៅក្នុងសន្និសីទកាសែតមួយដោយឆ្លើយតបទៅនឹងសំណួរអំពីការបញ្ចូនយន្តហោះទម្លាក់គ្រាប់បែករបស់អាមេរិកនោះថា៖ «យើងតែងតែជឿថាវត្តមានរបស់អាមេរិកនៅក្នុងតំបន់នេះគឺជាវត្តមានធ្វើឲ្យមានអស្ថិរភាព»។ លោកបានបន្ថែមថា ករណីនេះ «នឹងមិនបន្ទច់បង្អាក់ដល់ការតាំងចិត្ត [របស់អ៊ីរ៉ង់] ក្នុងការការពារខ្លួននោះទេ»។
យោធាអាមេរិកបានប្រកាសកាលពីថ្ងៃសៅរ៍សប្តាហ៍មុនថាការបញ្ជូនយន្តហោះទម្លាក់គ្រាប់បែក B-52 ទៅកាន់តំបន់មជ្ឈិមបូព៌ាគឺជាការព្រមានដល់អ៊ីរ៉ង់ ក្រោយពីអ៊ីរ៉ង់បានប្តេជ្ញាថានឹងឆ្លើយតបចំពោះការវាយប្រហាររបស់អ៊ីស្រាអែលលើទីតាំងយោធារបស់ខ្លួនកាលពីថ្ងៃទី ២៦ ខែតុលា។
ការវាយប្រហាររបស់អ៊ីស្រាអែលនោះគឺដើម្បីសងសឹកចំពោះការបាញ់ស្រោចម៉ីស៊ីលរបស់អ៊ីរ៉ង់កាលពីថ្ងៃទី ១ ខែតុលា។ ការបាញ់មីស៊ីលរបស់អ៊ីរ៉ង់លើអ៊ីស្រាអែលនោះគឺដើម្បីសងសឹកចំពោះការសម្លាប់មេដឹកនាំក្រុមសកម្មប្រយុទ្ធដែលអ៊ីរ៉ង់គាំទ្រនិងការសម្លាប់មេបញ្ជាការឆ្មាំបដិវត្តន៍អ៊ីរ៉ង់ម្នាក់។
លោក Baghaei ថា ការឆ្លើយតបរបស់អ៊ីរ៉ង់នឹងមានលក្ខណៈ «ដាច់ខាតនិងដាច់ណាត់»។
លោកបានបន្ថែមថា អ៊ីរ៉ង់បានគាំទ្រ «រាល់គំនិតផ្តួចផ្តើមនិងកិច្ចប្រឹងប្រែងទាំងអស់» ដើម្បីជំរុញឲ្យមានបទឈប់បាញ់នៅតំបន់ហ្កាហ្សានិងនៅប្រទេសលីបង់។ អ៊ីស្រាអែលកំពុងធ្វើសង្គ្រាមជាមួយក្រុមប្រដាប់អាវុធហាម៉ាស់នៅហ្កាហ្សានិងក្រុមប្រដាប់អាវុធហេសបូឡានៅលីបង់ដែលអ៊ីរ៉ង់គាំទ្រ៕