អ្នកនាំពាក្យក្រសួងការបរទេសអ៊ីរ៉ង់លោក Esmaeil Baghaei បាននិយាយកាលពីថ្ងៃចន្ទថា អ៊ីរ៉ង់នឹង «ឆ្លើយតបម៉ឺងម៉ាត់និងប្រកបដោយប្រសិទ្ធភាព» ចំពោះការវាយប្រហារដ៏ប្រល័យរបស់អ៊ីស្រាអែលលើទីតាំងយោធារបស់ខ្លួនកាលពីចុងសប្ដាហ៍កន្លងទៅនេះ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP។
លោក Baghaei បានបញ្ជាក់នៅក្នុងសន្និសីទកាសែតមួយថា៖ «យើងនឹងប្រើគ្រប់មធ្យោបាយទាំងអស់ដែលមានដើម្បីឆ្លើយតបម៉ឺងម៉ាត់និងប្រកបដោយប្រសិទ្ធភាពចំពោះការឈ្លានពានរបស់របបដឹកនាំអ៊ីស្រាអែល»។
លោកបានបន្ថែមថា៖ «របៀបនៃការឆ្លើយតបរបស់យើងគឺអាស្រ័យលើរបៀបនៃការវាយប្រហារ [មកលើយើង]»។
កាលពីថ្ងៃសៅរ៍សប្ដាហ៍មុន អ៊ីស្រាអែលបានវាយប្រហារតាមអាកាសលើទីតាំងយោធានានានៅក្នុងប្រទេសអ៊ីរ៉ង់ដើម្បីឆ្លើយតបទៅនឹងការវាយប្រហាររបស់អ៊ីរ៉ង់កាលពីថ្ងៃទី ១ ខែតុលាលើអ៊ីស្រាអែល ដែលការវាយប្រហាររបស់អ៊ីរ៉ង់នោះគឺជាការសងសឹកផ្ទាល់ខ្លួនចំពោះការសម្លាប់ថ្នាក់ដឹកនាំក្រុមសកម្មប្រយុទ្ធដែលខ្លួនគាំទ្រនិងមេបញ្ជាការឆ្មាំបដិវត្តន៍ម្នាក់របស់ខ្លួន។
ការវាយប្រហារកាលពីថ្ងៃសៅរ៍នោះបានធ្វើឡើងនៅចំពេលដែលមានសង្គ្រាមជាបន្តរបស់អ៊ីស្រាអែលជាមួយនឹងក្រុមហាម៉ាស់ ដែលនៅក្នុងពេលប៉ុន្មានសប្ដាហ៍ថ្មីៗនេះបានពង្រីកការផ្ដោតលើក្រុមហេសបូឡានៅក្នុងប្រទេសលីបង់ផងដែរ។
ក្រុមទាំងពីរនេះគឺជាផ្នែកមួយនៃ «សម្ព័ន្ធភាពក្រុមតស៊ូដឹកនាំដោយអ៊ីរ៉ង់នៅមជ្ឈិមបូព៌ា» ដែលរួបរួមជាមួយនឹងអ៊ីរ៉ង់ដើម្បីប្រឆាំងនឹងអ៊ីស្រាអែល។
លោក Baghaei បាននិយាយថា បទឈប់បាញ់នៅក្នុងតំបន់ហ្កាហ្សានិងប្រទេសលីបង់នៅតែជា «គោលបំណង» របស់ប្រទេសអ៊ីរ៉ង់៕