ក្រសួងព័ត៌មានបង្កើតគណៈកម្មការមួយ ដែលមានសមាសភាពពីមន្រ្តីជាន់ខ្ពស់របស់ក្រសួង និងសមាគមអង្គការសារព័ត៌មានមួយចំនួន ដើម្បីវាយតម្លៃការអនុវត្តក្រមសីលធម៌របស់អ្នកសារព័ត៌មាន និងស្ថាប័នសារព័ត៌មាន។ នេះបើយោងតាមសេចក្តីសម្រេចចុះថ្ងៃទី២ ខែសីហា ដោយលោក ខៀវ កាញារីទ្ធ រដ្ឋមន្រ្តីក្រសួងព័ត៌មាន។
គណៈកម្មការនេះនឹងដើរតួនាទីជាអ្នកតាមដាន វាយតម្លៃ និងលើកសរសើរអ្នកសារព័ត៌មាន និងអង្គភាពសារព័ត៌មាន ដែលអនុវត្តត្រឹមត្រូវតាមក្រមសីលធម៌វិជ្ជាជីវៈសារព័ត៌មាន។ ប៉ុន្តែគណៈកម្មការក៏អាចវាយតម្លៃឈានដល់ការ«ដាក់វិន័យ»ចំពោះអ្នកសារព័ត៌មាន និងអង្គភាពសារព័ត៌មាន ដែលប្រព្រឹត្តល្មើសសីលធម៌វិជ្ជាជីវៈផងដែរ។
គណៈកម្មការក៏មានភារកិច្ចក្នុងការពិនិត្យមើលការតវ៉ាពីសាធារណជន ឬអង្គភាពស្ថាប័ននានា ដោះស្រាយបណ្តឹងតវ៉ាដែលទាក់ទងនឹងក្រមសីលធម៌វិជ្ជាជីវៈសារព័ត៌មានរវាងអ្នកសារព័ត៌មាន អង្គភាពសារព័ត៌មាន ជាមួយបុគ្គលឬក្រសួងស្ថាប័ន ឬអ្នកសារព័ត៌មាន អង្គភាពសារព័ត៌មាន។
បើតាមសេចក្តីសម្រេច ក្រោយការវាយតម្លៃហើយ គណៈកម្មការស្នើសុំការសម្រេចពីថ្នាក់ដឹកនាំក្រសួង ជាការលើកសរសើរ ឬដាក់វិន័យអ្នកដែលប្រព្រឹត្តខុសពីក្រមសីលធម៌វិជ្ជាជីវៈ តាមច្បាប់ស្តីពីរបបសារព័ត៌មាន។
សមាសភាពនៃគណៈកម្មការនេះ មានមន្រ្តីជាន់ខ្ពស់នៃក្រសួងព័ត៌មានចំនួន១០នាក់ និងប្រធានសមាគមអង្គការការពារអ្នកសារព័ត៌មានចំនួន៥ ស្ថាប័ន ដែលរួមមានសហភាពសហព័ន្ធអ្នកសារព័ត៌មានកម្ពុជា ក្លឹបអ្នកកាសែតកម្ពុជា សម្ព័ន្ធអ្នកសារព័ត៌មានកម្ពុជា(ខេមបូចា) សមាគមអ្នកសារព័ត៌មានខ្មែរប្រជាធិបតេយ្យ និងសមាគមកម្ពុជាការពារអ្នកកាសែត។
បើតាមសេចក្តីសម្រេច កិច្ចប្រជុំអាចដំណើរការទៅបាន លុះត្រាតែសមាជិកមានចំនួនពីរភាគបីនៃសមាជិកសរុបរបស់គណៈកម្មការ។ ចំណែកការសម្រេចរបស់អង្គប្រជុំដែលអាចយកជាការបាន លុះត្រាតែមានសំឡេង៥០បូក១នៃសមាជិកអង្គប្រជុំ។
លោក មាស សុភ័ណ្ឌ អ្នកនាំពាក្យក្រសួងព័ត៌មាន និងជាសមាជិកមួយរូបនៃគណៈកម្មការនេះ បានថ្លែងថាការអនុវត្តខុសពីក្រមសីលធម៌ គណៈកម្មការនឹងវាយតម្លៃហើយដាក់ទៅរដ្ឋមន្រ្តីក្រសួងព័ត៌មានជាអ្នកសម្រេច។ លោកមិនទាន់អាចបញ្ជាក់ថាតើការរិះគន់ស្ថាប័ន ឬអ្នកសារព័ត៌មាននឹងត្រូវធ្វើជាសាធារណៈ ឬជាលក្ខណៈឯកជនទៅបុគ្គលឬស្ថាប័នសារព័ត៌មាន។
លោកប្រាប់វីអូអេថា៖ «ដូចខ្ញុំបានបញ្ជាក់អញ្ចឹង គណៈកម្មការនេះពិនិត្យវាយតម្លៃជូនថ្នាក់ដឹកនាំ ដើម្បីពិនិត្យនិងសម្រេច។ ដូច្នេះការសម្រេចជាចុងក្រោយ តាមនីតិវិធីបែបណានោះ គឺជាការសម្រេចរបស់ថ្នាក់ដឹកនាំក្រសួងព័ត៌មាន»។
នៅក្នុងកិច្ចពិភាក្សាមួយស្តីពី«ក្រមសីលធម៌ក្នុងការផ្សាយព័ត៌មានតាមហ្វេសប៊ុក» កាលពីថ្ងៃទី២៩ ខែកក្កដា ឆ្នាំ២០២១ រដ្ឋមន្រ្តីក្រសួងព័ត៌មាន លោក ខៀវ កាញារីទ្ធ បានថ្លែងថាបច្ចុប្បន្ននេះ សមាគមសារព័ត៌មាននៅក្នុងប្រទេសកម្ពុជាមិនទាន់ហ៊ានរិះគន់អ្នកកាសែតដែលបំពេញការងារមិនគោរពតាមក្រមសីលធម៌វិជ្ជាជីវៈនៅឡើយទេ។
លោកបញ្ជាក់ថា៖« មកដល់ឥឡូវយើងឃើញសមាគមមានជាង៥០មែន។ តើមានសមាគមណាមួយហ៊ានថ្កោលទោសអ្នកកាសែតយើងដែលសរសេរខុសវិជ្ជាជីវៈទេ? អត់មានសមាគមណាមួយហ៊ានទេ។ ហ្នឹងដែលជាចំណុចខ្សោយដែលធ្វើឲ្យអ្នកកាសែតមួយចំនួនចេះតែរសាត់ រង្រ្កៀកចេញពីផ្លូវល្អរបស់យើង»។
លោក អ៊ិត សូធឿត នាយកផ្នែកប្រព័ន្ធផ្សព្វផ្សាយនៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ បានថ្លែងថាការលើកកម្ពស់ក្រមសីលធម៌របស់អ្នកសារព័ត៌មាននិងស្ថាប័នសារព័ត៌មាន ជារឿងល្អមួយ ដែលភាគីទាំងអស់ត្រូវចូលរួមក្នុងការលើកកម្ពស់។ លោកបន្ថែមថាគណៈកម្មការនេះមានសិទ្ធិអំណាចច្រើនទៅខាងក្រសួងព័ត៌មាន ដោយសារសមាសភាពនៃគណៈកម្មការមានមន្រ្តីក្រសួងព័ត៌មានច្រើន។ ការណ៍នេះលោកបារម្ភអំពី«ភាពអយុត្តិធម៌»នៅក្នុងការសម្រេចចិត្តណាមួយ ដែលត្រូវការសំឡេង៥០បូក១។
លោកបន្ថែមថាលោកនៅតែមានចម្ងល់នៅឡើយចំពោះការអនុវត្តជាក់ស្តែងរបស់គណៈកម្មការមួយនេះ ដោយសារកន្លងទៅ អ្នកសារព័ត៌មានឯករាជ្យត្រូវបានចោទប្រកាន់ថាជាក្រុមប្រឆាំងនឹងរដ្ឋាភិបាល។
លោកថ្លែងថា៖ «ពេលខ្លះដូចជាគាត់កោតសរសើរស្ថាប័នដែលរាយការណ៍អំពីអំពើល្អ ឬសកម្មភាពល្អៗរបស់រដ្ឋាភិបាល ក៏ប៉ុន្តែនៅពេលដែលអ្នកសារព័ត៌មានឯករាជ្យដែលគាត់លើកពីចំណុចខ្វះខាតមកបង្ហាញដល់សាធារណជនឲ្យបានដឹង ហើយនេះក៏ជាតួនាទីសំខាន់របស់អ្នកសារព័ត៌មាននោះ បែរជាពេលខ្លះត្រូវបានរងការចោទប្រកាន់ថាជាអ្នកសារព័ត៌មានប្រឆាំង ឬក្រុមប្រឆាំងអីទៅវិញ»។
លោក អ៊ិត សូធឿត បន្ថែមថាការរិះគន់លើការអនុវត្តក្រមសីលធម៌ ជាជំហានដំបូង លោកយល់ថាគួរតែទាក់ទងទៅស្ថាប័ន ឬបុគ្គលដោយផ្ទាល់ដើម្បីណែនាំជាមុនសិន។ លោកក៏ជំរុញឲ្យមានការបង្កើនវគ្គបណ្តុះបណ្តាលដល់អ្នកកាសែត ដើម្បីពង្រឹងអំពីក្រមសីលធម៌វិជ្ជាជីវៈ ដោយសារអ្នកសារព័ត៌មានខ្លះមិនបានទទួលការបណ្តុះបណ្តាលនោះទេ៕