លោក ស ខេង រដ្ឋមន្រ្តីក្រសួងមហាផ្ទៃនៃប្រទេសកម្ពុជា បានអំពាវនាវកាលពីថ្ងៃអាទិត្យឲ្យក្រុមហ៊ុនការពារសន្តិសុខឯកជនជាង១០០ក្រុមហ៊ុនទទួលយកមន្ត្រីប៉ូលិស និងមន្រ្តីកងរាជអាវុធហត្ថទៅបំពេញការងារក្រោយពីពួកគេចូលនិវត្តន៍។
ការអំពាវនាវរបស់លោក ស ខេង ធ្វើឡើងនៅក្នុងពិធីរំលឹកខួប៧០ឆ្នាំនៃការបង្កើតកងកម្លាំងនគរបាលជាតិប្រទេសកម្ពុជាដែលរៀបចំឡើងនៅក្នុងក្រសួងមហាផ្ទៃ។
លោកមានប្រសាសន៍ថា ៖ «កន្លងទៅ ខ្ញុំបានជួបជាមួយក្រុមហ៊ុនសន្តិសុខឯកជនជាងមួយរយក្រុមហ៊ុន ហើយក៏បានអំពាវនាវឲ្យក្រុមហ៊ុនទាំងអស់នោះពិនិត្យលទ្ធភាព ដើម្បីនឹងជ្រើសរើសនគរបាលដែលចូលនិវត្តន៍ទៅជាភ្នាក់ងារសន្តិសុខឯកជនទាំងនគរបាលទាំងកងរាជអាវុធហត្ថ ព្រោះអ្នកទាំងអស់នេះគឺមានបទពិសោធន៍ ហើយគេក៏ស្វាគមន៍»។
លោក ស ខេង បានបញ្ជាក់ថា លោកសម្រេចប្រគល់កិច្ចការងារនេះទៅឲ្យក្រសួងសង្គមកិច្ច ដើម្បីសម្របសម្រួលបន្តសហការជាមួយនាយកដ្ឋានបុគ្គលិកនៃក្រសួងមហាផ្ទៃ ដើម្បីរកការងារឲ្យមន្តី្រប៉ូលិស និងកងរាជអាវុធហត្ថដែលចូលនិវត្តន៍។
លោករដ្ឋមន្រ្តីបន្ថែមថា៖ «ខ្ញុំក៏បានប្រគល់ភារកិច្ចបន្តទៅឲ្យឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន ហើយសហការជាមួយនឹងនាយកដ្ឋានបុគ្គលិករបស់ក្រសួងមហាផ្ទៃរបស់នគរបាលនេះ ដើម្បីធ្វើបញ្ហានេះ ព្រោះសំខាន់ ប្រសិនណាបើក្រុមហ៊ុនទទួល ប៉ុន្តែបើមិនមានការស្ម័គ្រចិត្តពីអស់លោកទាំងអស់នោះក៏ទៅមិនរួចដែរ ដូច្នេះយើងត្រូវដឹងថា អ្នកដែលស្ម័គ្រចិត្តនោះមានប៉ុន្មានដើម្បីយើងធ្វើការជាមួយក្រុមហ៊ុនសន្តិសុខឯកជន»។
លោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ ពុំអាចឲ្យដឹងពីចំនួននគរបាលដែលកំពុងបម្រើការងារសព្វថ្ងៃនោះទេ ប៉ុន្តែលោកបានបញ្ជាក់ប្រាប់ VOA ថាមន្ត្រីនគរបាលដែលចូលនិវត្តន៍ ឬបាត់បង់លទ្ធភាពពលកម្ម និងអ្នកទទួលមរណភាពមានយ៉ាងតិចពី១ពាន់៥រយនាក់ក្នុងមួយឆ្នាំៗ។
លោកមានប្រសាសន៍ថា៖ «ក្នុងមួយឆ្នាំៗអាចមានអ្នកចូលនិវត្តន៍ អាចមានអ្នកបាត់បង់លទ្ធភាពពលកម្មអាចមានអ្នកសុំផ្លាស់ទៅកន្លែងផ្សេង ហើយនិងអ្នកទទួលមរណភាពហ្នឹងប្រមាណជាយ៉ាងតិចណាស់ក៏ពី១ពាន់៥រយនាក់ដែរ»។
លោកនាយឧត្តមសេនីយ៍ ខៀវ សុភ័គ បានពន្យល់ថា ការចូលនិវត្តន៍របស់មន្ត្រីនគរបាលជាតិគឺមានពីរប្រភេទ ដោយមន្ត្រីនគរបាលដែលមានឋានៈវរសេនីយ៍ទោចុះមកក្រោមនឹងត្រូវចូលនិវត្តន៍ក្នុងអាយុ៥៥ ឆ្នាំ រីឯមន្ត្រីដែលមានឋានៈវរសេនីយ៍ឯកឡើងលើនឹងត្រូវចូលនិវត្តន៍ក្នុងអាយុ៦០ឆ្នាំ។
ទោះជាយ៉ាងណាក្តី លោកអះអាងថា ភាគច្រើននៃមន្ត្រីចូលនិវត្តន៍នៅតែអាចមានលទ្ធភាពបំពេញការងារបាននៅតាមក្រុមហ៊ុនសន្តិសុខឯកជន ដោយផ្អែកទៅលើបទពិសោធន៍ការងារ និងកាយសម្បទាដែលនៅរឹងមាំ។
លោកបន្ថែមថា៖ «បងប្អូនយើងនៅពេលដែលចូលនិវត្តន៍នេះគឺភាគច្រើនមានកាយសម្បទាកម្លាំងស្មារតីនៅចងចាំមាំមួនទេ លើកលែងអ្នកខ្លះក្រែងលោមានជំងឺអ្វីពីយូរយើងអាចនឹងមាន។ ប៉ុន្តែភាគច្រើនគឺនៅអាចបម្រើការងារបានទេ»។
លោក ព្រី វណ្ណះ ប្រធានការិយាល័យប្រតិបត្តិនៃក្រុមហ៊ុនសន្តិសុខ Protek Security បានឲ្យដឹងថាក្រុមហ៊ុនរបស់លោកស្វាគមន៍ទទួលយកមន្ត្រី ដែលចូលនិវត្តន៍របស់ក្រសួងមហាផ្ទៃ និងកងរាជអាវុធហត្ថមកបម្រើការងារដោយផ្អែកលើលក្ខណៈសម្បត្តិកាយសម្បទា និងបទពិសោធន៍ការងារ។
លោកនិយាយថា៖ «ខាងខ្ញុំ ខ្ញុំទទួលតែខ្ញុំទទួលហ្នឹងតាមលក្ខណៈដូចជា គាត់មានកាយសម្បទាគាត់អាច គាត់មើលទៅអាចគាត់ទទួលយកការ[ងារ]យើងអាចថាមើលទៅគាត់ធ្វើការបាន»។
លោក ព្រី វណ្ណះ បន្តថា មន្តី្រប៉ូលិសចូលនិវត្តន៍ដែលមកបម្រើការងារជូនក្រុមហ៊ុនរបស់លោកនឹងទទួលបានតួនាទីណាមួយក្នុងផ្នែកសន្តិសុខ ដោយមើលទៅលើសមត្ថភាពការងារ។
លោកនិយាយថា ៖ «យើងមើលតាមលទ្ធភាព មើលទៅថាតើគាត់អាច ទីមួយគាត់អាចកាន់ជាមេក្រុមបានឬអត់ហើយគាត់យល់ពីការងារសន្តិសុខអត់»៕