ញូដេលលី៖ ប៉ុន្មានថ្ងៃបន្ទាប់ពីតុលាការកំពូលឥណ្ឌាបានសម្តែងនូវការភ្ញាក់ផ្អើលដល់ការហូរចេញទ្រព្យសម្បត្តិខុសច្បាប់ទៅបរទេសនោះ រដ្ឋាភិបាលឥណ្ឌាប្រាប់ឲ្យដឹងថា ខ្លួនកំពុងចាត់វិធានការដើម្បីបញ្ឈប់ការផ្ទេរប្រាក់ខុសច្បាប់ចូលធនាគារបរទេស។ ក្រុមហ៊ុនឯកជន និងពួកអ្នកនយោបាយពុករលួយត្រូវគេជឿជាក់ថា បានផ្ទេរប្រាក់រាប់ពាន់ដុល្លារ។
លោក Pranab Mukherjee រដ្ឋមន្រ្តីក្រសួងហិរញ្ញវត្ថុ និយាយកាលពីថ្ងៃអង្គារថា រដ្ឋាភិបាលកំពុងរឹតបន្តឹងបទបញ្ញត្តិ ហើយនឹងចរចាកិច្ចព្រមព្រៀងពន្ធដារជាមួយបរទេស ដើម្បីតាមដានប្រាក់ដែលពួកអ្នកមានជនជាតិឥណ្ឌា និងក្រុមហ៊ុនគេចពន្ធ។
លោកនិយាយថា រដ្ឋាភិបាលបានតាមដាន រកឃើញការគេចពន្ធដែលមានតម្លៃទឹកប្រាក់៣,៣ពាន់លានដុល្លាររក្នុងរយៈពេល១៨កន្លងមក។
សេចក្តីថ្លែងការណ៍របស់រដ្ឋាភិបាលបានធ្វើឡើងបន្ទាប់ពីតុលាការកំពូលនិយាយថា ប្រាក់ខុសច្បាប់លាក់ទុកនៅបរទេសជាអំពើឧក្រិដ្ឋកម្មដ៏ស្មុគស្មាញ ធ្វើឲ្យឈឺក្បាល ហើយនិងត្រូវបានសន្មត់ថា ជាចោរលួចទ្រព្យសម្បត្តិជាតិសុទ្ធសាធនិងជាធម្មជាតិ។ ការពិនិត្យមើលរបស់តុលាការបានត្រូវធ្វើឡើងដើម្បីឆ្លើយតបដល់ញត្តិដែលបានចោទប្រកាន់ថា រដ្ឋាភិបាលមិនចាត់វិធានការដើម្បីទប់ស្កាត់ការហូរប្រាក់ខុសច្បាប់ចេញទៅបរទេស។
លោក Mukherjee រដ្ឋមន្រ្តីក្រសួងហិរញ្ញវត្ថុ និយាយថា រដ្ឋាភិបាលមិនមានអ្វីដែលត្រូវលាក់ទេ។
«ដូចជាមនុស្សដែលមានចេតនាល្អនៅក្នុងសង្គម រដ្ឋាភិបាលមានការយកចិត្តទុកដាក់រកឲ្យឃើញប្រាក់ទុចរិត ដោយនាំយកប្រាក់នេះត្រឡប់ចូលប្រទេសវិញឲ្យបានរហ័ស ប្រសិនបើអាច ហើយនៅពេលជាមួយគ្នានោះដែរ ចាត់វិធានការដើម្បីបំបាត់ចំណុចខ្វះខាតដែលមានការលួចបន្លំបញ្ជូនចេញនេះ»។
លោករដ្ឋមន្រ្តីនិយាយថា មិនមានការប៉ាន់ស្មានដែលអាចទុកចិត្តបានអំពីចំនួនទឹកប្រាក់ខុសច្បាប់ហូរចេញទៅបរទេសនោះទេ ក៏ប៉ុន្តែ គេបានគិតថា មានពីចំនួនពី៥០០ពាន់លានដុល្លារទៅ១,៤លានលានដុល្លារ។ ការសិក្សាមួយដោយអង្គការ Global Financial Integrity ដែលមានទីតាំងក្នុងសហរដ្ឋអាមេរិក ថ្មីៗនេះបានប៉ាន់ស្មានថា មានប្រាក់ចំនួន៤៦០ពាន់លានដុល្លារបានត្រូវគេយកទៅបរទេសក្នុងរយៈពេល៦ទសវត្សរ៍កន្លងមកនេះ។ ការសិក្សានេះបានស្តីបន្ទោសការលួចបន្លំពន្ធនេះទៅលើពួកពាណិជ្ជករឯកជននិងអ្នកនយោបាយពុករលួយដែលផ្ទេរប្រាក់ខុសច្បាប់។
រដ្ឋាភិបាលបានស្ថិតនៅក្រោមការគាបសង្កត់ដើម្បីឲ្យបញ្ចេញឈ្មោះមនុស្សដែលមានទោសកំហុសទាំងនោះ។ ក៏ប៉ុន្តែ រដ្ឋាភិបាលបានប្រកែក ពុំព្រមបញ្ចេញអត្តសញ្ញាណរបស់ជនជាតិឥណ្ឌា២៦នាក់ដែលរងការចោទប្រកាន់ថាមានខ្ទង់លេខគណនេយ្យធនាគារសម្ងាត់នោះទេ។ ឈ្មោះទាំង២៦នាក់នេះត្រូវបានរដ្ឋាភិបាលអាល្លឺម៉ង់ប្រគល់ទៅឲ្យពួកអាជ្ញាធរឥណ្ឌា។
លោក Mukherjee លើកយកជំពូកច្បាប់អំពីការសម្ងាត់មកពន្យល់អំពីមូលហេតុដែលរដ្ឋាភិបាលមិនអាចបញ្ចេញឈ្មោះអ្នកទាំងនោះបាន។
«បើខ្ញុំបកអាក្រាតរឿងសម្ងាត់នៅថ្ងៃនេះ ថ្ងៃក្រោយប្រទេសផ្សេងៗទៀតនឹងមិនផ្តល់ព័ត៌មានដល់យើងទេ។ ពួកគេនឹងចោទប្រកាន់ថា យើងមិនបានធ្វើទៅតាមការសន្យាជាអន្តរជាតិទេ»។
ក៏ប៉ុន្តែ ការបំភ្លឺរបស់រដ្ឋាភិបាលមិនបានធ្វើឲ្យគណបក្សប្រឆាំង Bharatiya Janata (BJP)ពេញចិត្តទេ។ លោក Ravi Shanka Prasad អ្នកនាំពាក្យគណបក្ស BJP បានចោទប្រកាន់ថា រដ្ឋាភិបាលមិនមានវិធានការច្បាស់លាស់ដើម្បីបង្ក្រាបទៅលើទ្រព្យសម្បត្តិខុសច្បាប់ដ៏ច្រើនសន្ធឹកសន្ធាប់ក្នុងធនាគារបរទេសទេ។
«ប្រទេសជាតិចង់បានការចាត់វិធានការប្រកបដោយអត្ថន័យ ហើយមិនមែនការឆ្លើយតបយករួចខ្លួននោះទេ»។
រដ្ឋាភិបាលបានស្ថិតនៅក្រោមការគាបសង្កត់ឲ្យដោះស្រាយបញ្ហាទ្រព្យសម្បត្តិខុសច្បាប់ និងបង្ក្រាបអំពើទុចរិតបន្ទាប់ពីមានរឿងអាស្រូវពុករលួយមួយឈុតដែលត្រូវបានលាតត្រដាងក្នុងពេលប៉ុន្មានខែថ្មីៗនេះ៕
ប្រែសម្រួលដោយលោក ជឹង ប៉ូជីន