នៅថ្ងៃចន្ទនេះ ប្រទេសឥណ្ឌាបានរាយការណ៍ថា ការឆ្លងថ្មីនៃជំងឺកូវីដ១៩ មានជាង ៣ សែនករណី ដែលធ្វើឲ្យករណីឆ្លងសរុបនៅទូទាំងប្រទេសកើនដល់ជិត ២០ លានករណី។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
ដោយសារការឆ្លងថ្មីមានចំនួន ៣៦៨.១៤៧ ករណីក្នុងរយៈពេល ២៤ ម៉ោងចុងក្រោយនេះ ករណីឆ្លងសរុបនៅឥណ្ឌាបានកើនឡើងដល់ចំនួន ១៩ លាន ៩ សែន ៣ ម៉ឺននាក់ ចំណែកឯករណីស្លាប់សរុបវិញ បានកើនដល់ចំនួន ២១៨.៩៥៩ នាក់ ដោយអ្នកស្លាប់នៅក្នុងរយៈពេល ២៤ ម៉ោងចុងក្រោយមានចំនួន ៣.៤១៧ នាក់។ នេះបើយោងតាមទិន្នន័យរបស់ក្រសួងសុខាភិបាលឥណ្ឌា។
អ្នកជំនាញផ្នែកសុខាភិបាលបាននិយាយថា ចំនួនមនុស្សឆ្លងពិតប្រាកដនៅទូទាំងប្រទេសឥណ្ឌា អាចមានចំនួនខ្ពស់ជាងចំនួនផ្លូវការពី ៥ ទៅ ១០ ដង។
ករណីឆ្លងជំងឺកូវីដ១៩ នៅក្នុងប្រទេសឥណ្ឌាអាចឡើងដល់ចំនួនខ្ពស់បំផុតនៅរវាងថ្ងៃទី ៣ និងទី ៥ ខែឧសភានេះ។ នេះបើយោងតាមគំរូគណិតវិទ្យារបស់ក្រុមអ្នកវិទ្យាសាស្ត្រដែលផ្តល់ប្រឹក្សាដល់រដ្ឋាភិបាលឥណ្ឌា។
មន្ទីរពេទ្យផ្ទុកអ្នកជំងឺលើសចំណុះ ការផ្គត់ផ្គង់អុកស៊ីសែនមានការខ្វះខាត ហើយកន្លែងដាក់សពនិងកន្លែងបូជាសព គឺពោរពេញទៅដោយសព ស្របពេលដែលប្រទេសឥណ្ឌាកំពុងដោះស្រាយជាមួយនឹងការកើនឡើងខ្លាំងនៃការឆ្លងជំងឺកូវីដ១៩៕