កសិករក្រិកដែលខឹងសម្បាកំពុងទាមទារឲ្យរដ្ឋាភិបាលធ្វើតាមអ្វីដែលរដ្ឋបានសន្យារក្នុងការសងសំណងដល់ពួកគេសម្រាប់ការបាត់បង់ប្រាក់ចំណូល បន្ទាប់ពីមានគ្រោះបង្កដោយពីអាកាសធាតុអាក្រក់កាលពីឆ្នាំមុន។
«គ្មានអាហារ គ្មានអនាគត» គឺជាពាក្យស្លោកដែលកសិករខឹងសម្បាប្រើក្នុងពេលធ្វើបាតុកម្មប្រឆាំងនឹងការកើនឡើងនៃអតិផរណា ការប្រកួតប្រជែងពីបរទេស និងការចំណាយកាន់តែច្រើនដើម្បីប្រយុទ្ធប្រឆាំងនឹងបម្រែបម្រួលអាកាសធាតុ។
ពួកគេបានចាក់ផ្លែកៅឡាក់ (chestnut) និងផ្លែប៉ោមយ៉ាងច្រើននៅលើចិញ្ចើមផ្លូវនៅឯកន្លែងតាំងបង្ហាញផលិតផលកសិកម្មមួយ។ កសិកររាប់ម៉ឺននាក់បានចេញបាតុកម្មនៅលើដងផ្លូវនៅទីក្រុង Thessaloniki ដែលជាទីក្រុងស្ថិតនៅភាគឦសាននៃប្រទេសក្រិក កាលពីចុងសប្ដាហ៍កន្លងទៅ ហើយបានច្រានចោលការអះអាងរបស់មេដឹកនាំរបស់ពួកគេដែលសន្យាពន្យារការយកពន្ធ និងវិធានការបន្ធូរបន្ថយជាច្រើនទៀត ដែលរដ្ឋាភិបាលទីក្រុងអាថែនបានដាក់ចេញ។
លោក Rizos Maroudas គឺជាអ្នកដឹកនាំម្នាក់ក្នុងចំណោមអ្នកដឹកនាំក្រុមបាតុករជាច្រើនទៀត។
លោកបានថ្លែងទៅកាន់ក្រុមបាតុករថា៖ «ការផ្ដល់ជូនទាំងអស់នេះ គឺគ្មានតម្លៃដូចសំរាម។ រដ្ឋាភិបាលប្រហែលជាបានប្រឹងប្រែងហើយ ប៉ុន្តែពួកយើងវិញបានប្រឹងប្រែងខ្លាំងជាងនោះទៅទៀត»។
សមាគមកសិកម្មនៅទីក្រុង Thessaly ដែលជាបេះដូងកសិដ្ឋាននៃប្រទេសក្រិក បានកំណត់ពេលជួបជុំគ្នាម្ដងទៀតនៅថ្ងៃអង្គារនេះដើម្បីបង្កើនការតវ៉ារបស់ពួកគេ រួមមានទាំងការដាក់របាំងបិទមហាវិថីសំខាន់ៗនៅទូទាំងប្រទេស។ ភាគច្រើននៃការទាមទាររបស់កសិករគឺបន្ទរឲ្យមានបាតុកម្មស្រដៀងគ្នាដែលកំពុងធ្វើឲ្យមានផលវិបាកដល់ទ្វីបអឺរ៉ុបនៅប៉ុន្មានសប្ដាហ៍ចុងក្រោយនេះ។
ប៉ុន្តែនៅប្រទេសក្រិក កសិករចង់ឲ្យរដ្ឋាភិបាលផ្ដល់ឲ្យពួកគេនូវអ្វីដែលរដ្ឋាភិបាលបានសន្យាកាលពីប៉ុន្មានខែមុន នោះគឺសំណងសម្រាប់កសិផលនិងបសុសត្វរាប់ពាន់ក្បាលដែលត្រូវបានបំផ្លិចបំផ្លាញដោយទឹកជំនន់ដ៏ប្រល័យ និងព្យុះភ្លៀងដែលបានវាយប្រហារទៅលើដែនដីជាបេះដូងនៃកសិដ្ឋានកាលពីខែកញ្ញាកន្លងទៅ។
លោក Kyriakos Mitsotakis នាយករដ្ឋមន្ត្រីក្រិក កាលពីពេលថ្មីៗនេះបានប្រកាសដាក់ចេញនូវវិធានការជាច្រើន ដោយលោកនិយាយថា រដ្ឋនឹងជួយដោះស្រាយវិក័យប័ត្រទឹកនឹងភ្លើងដែលមិនទាន់បានបង់ ហើយថា ការជួយបង់ពន្ធរបស់រដ្ឋសម្រាប់ប្រេងម៉ាស៊ូតនឹងត្រូវបន្ថែមក្នុងរយៈពេលមួយឆ្នាំទៀត។
លោក Pavlos Marinaskis អ្នកនាំពាក្យរដ្ឋាភិបាលបានថ្លែងដូច្នេះថា៖ «នេះជាការឧបត្ថម្ភទាំងអស់ដែលរដ្ឋអាចប្រើថវិកាសហព័ន្ធដើម្បីផ្ដល់ឲ្យពួកគេនៅក្នុងពេលនេះ។ ប្រសិនបើយើងអាចផ្ដល់ឲ្យលើសពីនេះ យើងនឹងផ្ដល់ឲ្យពួកគេ។ ប៉ុន្តែ យើងមិនចង់ធ្វើការសន្យាក្លែងក្លាយនោះទេ»។
រដ្ឋាភិបាលបានអំពាវនាវឲ្យកសិករត្រឡប់ទៅកាន់តុចរចាវិញដើម្បីរកដំណោះស្រាយតាមរយៈការសម្របសម្រួលជាមួយនឹងនាយករដ្ឋមន្ត្រីផ្ទាល់។
កសិករនៅប្រទេសក្រិកព្រងើយកន្តើយនឹងជម្រើសចរចានេះ ដោយនិយាយថា ពួកគេគ្មានពេលទំនេរសម្រាប់អ្វីដែលពួកគេហៅថា «ឱកាសដើម្បីថតរូបសម្ដែង» នោះទេ៕
ប្រែសម្រួលដោយលោក នៀម ឆេង