ឧបករណ៍រុករកក្នុងពិភពអ៊ីនធើណេត ដែលមានឈ្មោះជាភាសាអង់គ្លេសថា ហ្គូកហ្គល (Google) កំពុងធ្វើការស្រាវជ្រាវពិភពលោកពិតប្រាកដ ដើម្បីស្វែងរកអ្នកវិទ្យាសាស្រ្ត វិស្វករ និងអ្នកច្នៃប្រឌិតវ័យក្មេងប្រកបដោយទេពកោសល្យ។ កាលពីពាក់កណ្តាលខែមករានេះ ក្រុមហ៊ុននេះបានប្រកាសពីការចាប់ផ្តើមការប្រកួតប្រជែងជាសាកលមួយសម្រាប់សិស្សានុសិស្ស ដែលមានអាយុចន្លោះពី១៣ទៅ១៨ឆ្នាំ ដែលមកពីគ្រប់ទីកន្លែងទាំងអស់នៅជុំវិញពិភពលោក។ នេះមិនមែនជាការតាំងពិព័រណ៍វិទ្យាសាស្រ្តធម្មតាមួយនោះទេ។
នៅក្នុងអ្វីដែលប្រហែលជានឹងក្លាយទៅជាគំរូនៃការប្រកួតប្រជែងក្នុងសតវត្សរ៍ទី២១នេះ អ្នកប្រកួតប្រជែងនៅក្នុងពិព័រណ៍វិទ្យាសាស្រ្តរបស់ ហ្គូកហ្គល មិនចាំបាច់មានវត្តមានផ្ទាល់នៅក្នុងកន្លែងតែមួយដូចគ្នា ដើម្បីធ្វើការប្រកួតប្រជែងជាមួយគ្នានោះទេ។
«ដើម្បីចូលរួមបាន អ្នកត្រូវការត្រឹមតែ អាចចូលទៅប្រព័ន្ធអ៊ីនធើណេតបាន និងការស្រមើស្រមៃ»។
សហគ្រិន លោក ឌីន ខេមិន (Dean Kamen) ដែលជាអ្នកបង្កើតយានជំនិះអគ្គីសនីកង់ពីរដែលអាចរក្សាជំហរដោយខ្លួនឯងបាន ឬជាភាសាអង់គ្លេសហៅថា Segway (សេកវ៉េ) បានមានប្រសាសន៍ថា ការចូលរួមនៅក្នុងការប្រកួតប្រជែង មានលក្ខណៈងាយស្រួល។
«អ្នកគ្រាន់តែចូលទៅអាស័យដ្ឋានគេហទំព័រប្រកួតប្រជែង google.com/sciencefair។ អ្នករកមើលទំព័រដែលប្រាប់អ្នកអំពីរបៀបក្នុងការចុះឈ្មោះ។ វានឹងផ្តល់ឲ្យអ្នកនូវមុខវិជ្ជាជាច្រើននៃការប្រកួតប្រជែងដែលអ្នកអាចចូលរួមបាន។ មុខវិជ្ជាទាំងនេះមានលក្ខណៈទូលំទូលាយណាស់ ដែលរួមមាន រូបវិទ្យា ជីវវិទ្យា បរិស្ថាន និងមុខវិជ្ជាផ្សេងៗជាច្រើនទៀត។ បន្ទាប់មក អ្នករៀបចំនិងបង្កើតការធ្វើពិសោធន៍របស់អ្នក។ អ្នកអាចចងក្រងដំណើរពិសោធន៍នេះតាមរបៀបណាក៏បានតាមតែអ្នកចង់បាន ដែលរួមទាំងមានជាឧទាហរណ៍ ការចង់ក្រងជាវីដេអូតាមកម្មវិធី យូធូប (YouTube)។ អ្នកត្រូវបញ្ចប់កិច្ចការនេះតាមប្រព័ន្ធអ៊ីនធើណេតសម្រាប់ឲ្យក្រុមអ្នកវិនិច្ឆ័យ»។
ក្រុមអ្នកវិនិច្ឆ័យទាំងនោះនឹងប្រកាសឈ្មោះអ្នកឈ្នះរង្វាន់ធំ និងការពិសោធន៍ល្អៗជាងគេ នៅក្នុងប្រភទអាយុជាច្រើន នៅថ្ងៃទី១១ខែកក្កដា។ លោក កាមែន និយាយថា អ្នកឈ្នះនឹងទទួលបានរង្វាន់ដ៏ពិសេសៗមួយចំនួន។
«រង្វាន់ទាំងនេះអស្ចារ្យទេ? ដំណើរកម្សាន្តទៅកាន់ប្រជុំកោះ ហ្គាឡាផាហ្គោស (Galapagos Islands) ដំណើរកម្សាន្តទៅកាន់មន្ទីរពិសោធន៍ថាមពលនុយក្លេអ៊ែរកម្រិតខ្ពស់ ដែលហៅកាត់ជាភាសាអង់គ្លេសថា CERN នៅក្នុងទីក្រុងហ្សឺណែវ ប្រទេសស៊្វីស។ ចុះអ្នកយល់យ៉ាងណាដែរ បើក្រុមហ៊ុន ហ្គូកហ្គល ផ្តល់អាហារូបករណ៍ចំនួនមួយសែនដុល្លារសហរដ្ឋអាមេរិក ហើយក្រុមហ៊ុនផ្សេងទៀតផ្តល់កម្មសិក្សាផ្សេងៗ? រង្វាន់ទាំងនេះគឺមិនធម្មតាទេ!»
លោក ខេមិន នឹងចូលរួមជួយជ្រើសរើសអ្នកឈ្នះរង្វាន់ ជាមួយនឹងអ្នកវិទ្យាសាស្រ្តល្បីៗ និងជ័យលាភីពានរង្វាន់ណូបែលផ្សេងៗទៀត។
«តើក្រុមអ្នកវិនិច្ឆ័យនឹងសម្លឹងមើលទៅលើអ្វីខ្លះ? តើអ្វីដែលនឹងជាកត្តាវិនិច្ឆ័យ និងភាពលេចធ្លោរបស់បេក្ខជន ដែលធ្វើឲ្យក្រុមអ្នកវិនិច្ឆ័យជ្រើសរើសអ្នកនោះឲ្យទទួលរង្វាន់ធំៗទាំងនេះ? ខ្ញុំគិតថា ភាគច្រើន គេនឹងមើលទៅលើគំនិតស្រមើស្រមៃ ការតស៊ូព្យាយាម និងការខិតខំប្រឹងប្រែង ដែលពិតជានឹងធ្វើឲ្យក្មេងៗខ្លះលេចធ្លោជាងគេក្នុងចំណោមក្មេងៗទាំងអស់នោះ។ ប៉ុន្តែខ្ញុំក៏សូមបញ្ជាក់ប្រាប់ផងដែរថា ក្មេងៗគ្រប់រូបដែលចូលរួមនៅក្នុងការប្រកួតប្រជែងនេះ នឹងក្លាយទៅជាអ្នកឈ្នះ ពីព្រោះពួកគេបានរៀនសូត្រ ពួកគេទទួលកម្លាំងជំរុញចិត្ត ហើយពួកគេបានជួបជាមួយនឹងក្មេងៗដទៃទៀត»។
លោក ឌីន ខេមិន មានប្រសាសន៍ថា មានហេតុផលពីរយ៉ាង ដែលលោកលើកទឹកចិត្តឲ្យសិស្សានុសិស្ស ចូលរួមនៅក្នុងការប្រកួតពិព័រណ៍វិទ្យាសាស្រ្តរបស់ហ្គូកហ្គលនេះ។
«មូលហេតុទីមួយគឺដើម្បីប្រយោជន៍ផ្ទាល់ខ្លួនរបស់ពួកគេ ពីព្រោះថា ការងារដ៏ល្អៗជាច្រើននាពេលអនាគត វិជ្ជាជីវៈជាច្រើននាពេលអនាគត ដែលក្មេងៗទាំងអស់នេះនឹងចង់ធ្វើនិងចង់បាននោះ នឹងតម្រូវឲ្យពួកគេ មានជំនាញនិងការយល់ដឹងអំពីវិទ្យាសាស្រ្តនិងបច្ចេកវិជ្ជា។ ក៏ប៉ុន្តែពិភពលោកទាំងមូលក៏នឹងទទួលបានប្រយោជន៍ដែរ ប្រសិនបើក្មេងច្រើនបន្ថែមទៀតចូលរួមនៅក្នុងកិច្ចការនេះ ពីព្រោះយើងកំពុងតែប្រឈមមុខនឹងបញ្ហាបរិស្ថានសាកល បញ្ហាថាមពលសាកល បញ្ហាទាក់ទងនឹងការអភិវឌ្ឍដោយចេរភាព និងបញ្ហាសុខភាព។ នៅថ្ងៃអនាគត យើងត្រូវតែបង្កើតនូវដំណោះស្រាយតាមរយៈបច្ចេកវិជ្ជា ចំពោះបញ្ហាសាកលទាំងឡាយ ដែលកាន់តែរីកធំឡើងៗជារៀងរាល់ថ្ងៃ »។
លោក ខេមិន មានសុទិដ្ឋិនិយមថា ទេព្យកោសល្យរបស់ក្មេងៗនាពេលបច្ចុប្បន្ននេះ នឹងអាចដោះស្រាយបញ្ហានាពេលអនាគតបាន។ លោកលើកឡើងថា ពួកគេមានចំណេះដឹងច្រើនជាង និងមានឧបករណ៍ល្អៗជាងជំនាន់របស់លោក។
«គួរឲ្យស្តាយ កាលពេលខ្ញុំនៅក្មេង មិនមានប្រព័ន្ធអ៊ីនធើណេត ហើយវាពិតជាមិនមាន កម្មវិធីហ្គូកហ្គល នោះទេ។ ទោះជាយ៉ាងនេះក្តី ខ្ញុំក៏មានសំណាងល្អដែរកាលនោះ។ ខ្ញុំបានចាប់ផ្តើមពិសោធន៍ដោយខ្លួនឯងជាមួយនឹងបច្ចេកវិជ្ជាតាំងពីតូច ហើយខ្ញុំចាប់ផ្តើមដឹងអំពីឥទ្ធិពលខ្លាំងក្លារបស់បច្ចេកវិជ្ជា ក្នុងការអាចជួយដោះស្រាយបញ្ហាជាក់ស្តែងនានា។ ខ្ញុំគិតថា កូនក្មេងនាពេលបច្ចុប្បន្ននេះកំពុងតែរស់នៅ ក្នុងសម័យកាលដ៏គួរឲ្យរំភើបអស្ចារ្យមែនទែន។ មានពេលមួយនោះ ប្រសិនបើអ្នកពិតជាចង់បានព័ត៌មាននិងចំណេះដឹងអស្ចារ្យទាំងឡាយ អ្នកត្រូវតែដើរទៅកាន់កន្លែងមួយដើម្បីមើលរបស់នោះនៅទីនោះផ្ទាល់ និងដើរទៅកន្លែងមួយទៀតដើម្បីអាចទៅនិយាយជាមួយក្រុមអ្នកជំនាញ។ ប៉ុន្តែឥឡូវនេះ អ៊ីនធើណេតបានធ្វើឲ្យព័ត៌មានទាំងអស់នោះ ចំណេះដឹងទាំងអស់នោះ និងមនុស្សទាំងអស់នោះ អាចរកបានដោយងាយសម្រាប់មនុស្សគ្រប់រូប»។
ការចុះឈ្មោះសម្រាប់ចូលរួមប្រកួតប្រជែងពិព័រណ៍វិទ្យាសាស្រ្តរបស់ហ្គូកហ្គលនេះ នឹងត្រូវបានបើករហូតដល់ថ្ងៃទី៤ខែមេសា។ អ្នកបង្កើតកម្មវិធីនេះគឺ លោក ឌីន ខេមិន មានប្រសាសន៍ថា លោកទន្ទឹងរង់ចាំចង់ជួបជាមួយនឹងជ័យលាភីទាំងនោះជាខ្លាំង ដែលពួកគេនឹងជាអនាគតជើងឯកខាងវិទ្យាសាស្រ្ត ហើយដែលលោកទស្សន៍ទាយថា ពួកគេនឹងធ្វើឲ្យពិភពលោកក្លាយទៅជាកន្លែងដ៏ល្អប្រសើរជាងមុនមួយ៕
ប្រែសម្រួលដោយ ឌី ខាំបូលី