អ្នកបោះឆ្នោតនៅប្រទេសហ្គាណា កំពុងរង់ចាំលទ្ធផលឆ្នោតផ្លូវការសម្រាប់ការបោះឆ្នោតប្រធានាធិបតី និងសភាតំណាងរាស្ត្រកាលពីថ្ងៃពុធ។ គណៈកម្មការរៀបចំការបោះឆ្នោតនៅហ្គាណាចេញលទ្ធផលបណ្តោះអាសន្នសម្រាប់ការបោះឆ្នោតប្រធានាធិបតីនៅមណ្ឌលបោះឆ្នោតមួយតាមបណ្តាញសង្គម Twitter។
លោក Eric Kofi Dzakpasu ប្រធានផ្នែកសារគមនាគមន៍របស់គណៈកម្មការរៀបចំការបោះឆ្នោតបាននិយាយកាលពីថ្ងៃព្រហស្បតិ៍ថា លោកចង់ឲ្យសាធារណជនដឹងថា កិច្ចការនានាកំពុងដំណើរការតាមកាលកំណត់។ លោកអំពាវនាវឲ្យសាធារណជនរក្សាការស្ងៀមស្ងាត់ នៅពេលគណៈកម្មការបោះឆ្នោតកំពុងធ្វើការយ៉ាងខ្លាំងក្លាដើម្បីបញ្ចប់ការបោះឆ្នោតនេះ។ លោកចង់បង្ហាញប្រាប់ប្រជាជនប្រទេសនេះថា គណៈកម្មការកំពុងធ្វើកិច្ចការដែលត្រឹមត្រូវនិងយុត្តិធម៌។ គណៈកម្មការបោះឆ្នោតនិយាយថា ខ្លួនមិនមានចេតនាពន្យារពេលលទ្ធផលបោះឆ្នោតទេ តែត្រូវការពេលវេលាធ្វើការផ្ទៀងផ្ទាត់ច្រើនសារដើម្បីធានាថា លទ្ធផលបោះឆ្នោតមានសុពលភាព។
គណបក្សប្រឆាំងអះអាងថា បេក្ខជនរបស់ខ្លួនគឺលោក Nana Akufo-Addo នាំមុខហើយឈានទៅរកជ័យជម្នះ។ រីឯគណបក្សកាន់អំណាចនិយាយថា លោកប្រធានាធិបតី John Mahama ឈ្នះឆ្នោតទូទាំងប្រទេស ហើយបានថ្កោលទោសថា ការអះអាងរបស់គណបក្សប្រឆាំងជាការអះអាងគ្មានការទទួលខុសត្រូវ៕