កាលពីថ្ងៃអង្គារកន្លងទៅ អ្នកស្រី Roxie Washington ភរិយារបស់លោក George Floyd បានព្យាយាមទប់ទឹកភ្នែក នៅពេលអ្នកស្រីរៀបរាប់ពីអារម្មណ៍របស់អ្នកស្រី ចំពោះស្វាមីរបស់អ្នកស្រី ដែលអ្នកស្រីថា ជាមេគ្រួសារ និងឪពុកដ៏ល្អមួយរូប។
លោក Floyd ដែលជាបុរសពលរដ្ឋអាមេរិកាំងដើមកំណើតអាហ្វ្រិក បានស្លាប់កាលពីថ្ងៃទី ២៥ ខែ ឧសភា បន្ទាប់ពីលោកត្រូវបានឃាត់ខ្លួននៅទីក្រុង Minneapolis ពីបទសង្ស័យប្រើក្រដាសប្រាក់ក្លែងក្លាយ។
ក្នុងហេតុការណ៍ឃាត់ខ្លួនលោក Floyd គេឃើញថា មន្ត្រីប៉ូលិសស្បែកសម្នាក់ បានប្រើជង្គង់សង្កត់លើករបស់លោក ខណៈដៃរបស់លោកត្រូវបានជាប់ខ្នោះពីក្រោយខ្នង អស់រយៈពេលជាង៨នាទី។
ការស្លាប់របស់លោក Floyd បានបង្កឲ្យមានការខឹងសម្បាអំពីការរើសអើងជាតិសាសន៍ និងអំពើឃោរឃៅរបស់ប៉ូលិស នៅទូទាំងសហរដ្ឋអាមេរិក និងនៅតាមទីក្រុងធំៗខ្លះនៅទ្វីបអឺរ៉ុប។
កូនស្រីរបស់លោក Floyd ឈ្មោះ Gianna អាយុ ៦ ឆ្នាំ បានឈរនៅក្បែរម្តាយរបស់នាង នៅពេលដែលអ្នកស្រី Roxie Washington ត្រូវបានអ្នកសារព័ត៌មានសួរនាំក្នុងសន្និសីទសារព័ត៌មានមួយនៅសាលាក្រុង Minneapolis កាលពីថ្ងៃអង្គារ។
អ្នកស្រី Roxie Washington បានថ្លែងថា៖ «ខ្ញុំចង់បានយុត្តិធម៌ដល់ប្តីខ្ញុំ ពីព្រោះគាត់ជាមនុស្សល្អ។ ប្តីខ្ញុំស្រឡាញ់កូនស្រីយើង (Gianna) ខ្លាំងណាស់»។
សាកសពរបស់លោក Floyd ត្រូវបានធ្វើកោសលវិច័យពីរលើក។ លទ្ធផលទាំងពីរសន្មត់ថា លោក Floyd គឺជាជនរងគ្រោះនៃអំពើមនុស្សឃាត។
ការធ្វើកោសលវិច័យដោយសង្កាត់ Hennepin នៅរដ្ឋ Minnesota ត្រូវបានអ្នកជំនាញពេទ្យសន្មត់ថា លោក Floyd បានស្លាប់ ដោយសារការសង្កត់ជង្គង់របស់មន្ត្រីប៉ូលិសលើករបស់លោក បានរារាំងមិនឲ្យឈាមរត់ទៅសួត និងខួរក្បាលរបស់លោក។ ប៉ុន្តែ របាយការណ៍វិនិច្ឆ័យនេះ ក៏បានបញ្ជាក់ផងដែរថា លោក Floyd ក៏មានបញ្ហាសុខភាពផ្សេងទៀតដែរ។
គ្រួសាររបស់លោក Floyd ដែលមានមេធាវីការពារជាអ្នកធ្វើកោសលវិច័យខ្លួនឯង បានបដិសេធលើរបាយការណ៍ដែលថា លោក Floyd មានបញ្ហាសុខភាពផ្សេងទៀត៕