រដ្ឋមន្ត្រីការបរទេសបារាំងលោក Jean-Yves Le Drian ដែលកំពុងស្ថិតនៅក្នុងបូរីញូយ៉កដើម្បីចូលរួមក្នុងកិច្ចប្រជុំរបស់អង្គការសហប្រជាជាតិ បានអំពាវនាវកាលពីថ្ងៃចន្ទដល់អឺរ៉ុបឲ្យ«គិតឲ្យបានហ្មត់ចត់»អំពីសម្ព័ន្ធភាព បន្ទាប់ពីរដ្ឋាភិបាលក្រុងប៉ារីស មានការខឹងសម្បារអំពីការបាត់បង់កិច្ចសន្យានាវាមុជទឹកជាមួយប្រទេសអូស្ត្រាលី។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
លោក បាននិយាយនៅខាងក្រៅមហាសន្និបាតអង្គការសហប្រជាជាតិថា «បញ្ហាទី១ គឺការបាត់បង់ទំនុកចិត្តរវាងសម្ព័ន្ធមិត្ត»។ លោកបានអំពាវនាវដល់«អឺរ៉ុបឲ្យគិតឲ្យបានហ្មត់ចត់»។
លោក Le Drian បានចោទប្រកាន់សហរដ្ឋអាមេរិកពីការក្បត់ និងចោទប្រទេសអូស្ត្រាលីពីការរំលោភលើសេចក្តីទុកចិត្ត ហើយលោកមិនមានជំនួបដាច់ដោយឡែកពីគ្នាដែលត្រូវបានគ្រោងធ្វើឡើងជាមួយរដ្ឋមន្ត្រីការបរទេសសហរដ្ឋអាមេរិកលោក Antony Blinken នោះទេ។
លោក បានរិះគន់ម្តងទៀតទៅលើ«សេចក្តីប្រកាស»ដែលបានធ្វើឡើងដោយប្រធានាធិបតីសហរដ្ឋអាមេរិកលោក Joe Biden កាលពីថ្ងៃទី១៥ ខែកញ្ញា អំពីសម្ព័ន្ធភាពយុទ្ធសាស្ត្រថ្មីជាមួយអូស្ត្រាលីនិងចក្រភពអង់គ្លេសដែលបានធ្វើឲ្យបរាជ័យនូវការលក់នាវាមុជទឹកបារាំងទៅឲ្យប្រទេសអូស្ត្រាលីនោះ។
លោក La Drian បានបន្ថែមថា សម្ព័ន្ធភាពរវាងបារាំងនិងសហរដ្ឋអាមេរិក គឺ«តម្លាភាព» «ការពន្យល់»និង «ការពិភាក្សាគ្នាទៅវិញទៅមក»។
លោក បាននិយាយទៀតថា «ចំណុចទាំងនេះដែលតម្រូវឲ្យមានការបញ្ជាក់ឲ្យច្បាស់នៅថ្ងៃនេះ»។
លោករដ្ឋមន្ត្រីការបរទេសបារាំង ក៏បានរិះគន់ទៅលើ«ការតម្រង់នៃការប្រឈមមុខ» របស់អាមេរិកចំពោះប្រទេសចិន ហើយបាននិយាយថា លោកមានការស្តាយក្រោយដែលអឺរ៉ុប ត្រូវបានគេផាត់ចេញពីយុទ្ធសាស្រ្តតំបន់អាស៊ីប៉ាស៊ីហ្វិករបស់រដ្ឋាភិបាលក្រុងវ់ាស៊ីនតោននោះ។
លោក Le Drian មានគម្រោងថា នឹងជួបជាមួយរដ្ឋមន្ត្រីការបរទេសសហរដ្ឋអាមេរិក លោក Blinken នៅថ្ងៃពុធនេះ ក្នុងអំឡុងពេលនៃការពិភាក្សាអំពីប្រទេសអ៊ីរ៉ង់ ខណៈពេលដែលមានការខំប្រឹងប្រែងចុងក្រោយដើម្បីជួយស្រោចស្រង់កិច្ចព្រមព្រៀងនុយក្លែអ៊ែឆ្នាំ២០១៥។
លោក Le Drian បាននិយាយថា «ខ្ញុំ នឹងមានឱកាសជួបលោកនៅក្រៅសាលប្រជុំ»៕