សាលាដំបូងរាជធានីភ្នំពេញ នៅព្រឹកថ្ងៃព្រហស្បតិ៍នេះ បានសម្រេចកាត់ទោសលោក ស៊ុត ឌីណា អតីតឯកអគ្គរាជទូតកម្ពុជាប្រចាំនៅប្រទេសកូរ៉េខាងត្បូង ឲ្យជាប់ពន្ធនាគាររយៈពេលប្រាំឆ្នាំ និងពិន័យជាប្រាក់១០លានរៀល ឬប្រមាណជា ២៥០០ដុល្លារអាមេរិក ពីបទរំលោភអំណាច និងបទកេងយកផលប្រយោជន៍ដោយខុសច្បាប់។
លោក ស៊ុត ឌីណាត្រូវបានអង្គភាពប្រឆាំងអំពើពុករលួយចាប់ខ្លួនកាលពីថ្ងៃទី៤ ខែមេសា ពីបទសង្ស័យថា បានប្រព្រឹត្តអំពើពុករលួយ ដោយលើកឡើងថា អតីតឯកអគ្គរាជទូតរូបនេះមានលុយជាង៧លានដុល្លារ និងមាសជាង ១២គីឡូក្រាម។ តុលាការក្រុងភ្នំពេញ ក៏បានសម្រេចឃុំខ្លួនលោកបណ្ដោះអាសន្នចាប់ពីខែមេសាមក។
បន្ទាប់ពីការប្រកាសផ្ដន្ទាទោសដែលត្រូវបានធ្វើឡើងដោយ លោក កោ វណ្ឌី ចៅក្រមសាលាដំបូងរាជធានីភ្នំពេញនាព្រឹកថ្ងៃព្រហស្បតិ៍នេះ លោក ស៊ុត ឌីណា បានប្រាប់ក្រុមអ្នកសារព័ត៌មានថា លោកមិនអាចទទួលយកការកាត់ទោសនេះបានទេ ដោយហេតុថា តុលាការមិនមានភស្តុតាងគ្រប់គ្រាន់ដើម្បីគាំទ្រការកាត់ទោសរូបលោក។
លោក ហុក ផល្លា មេធាវីតំណាងឲ្យលោក ស៊ុត ឌីណា ថ្លែងថា កូនក្តីរបស់លោកមិនបានបំពេញការងារ ដោយការរំលោភអំណាច ហើយធ្វើការសម្រេចចិត្តអត្តនោម័តិដោយខ្លួនឯងនោះទេ។
លោកបន្តថា កូនក្ដីលោក តែងតែបានប្រឹក្សាពិគ្រោះយោបល់ជាមួយសហការីរបស់លោក នៅមុនពេលធ្វើការសម្រេចចិត្តលើកិច្ចការនៅក្នុងស្ថានទូត។
«អ្វីដែលគាត់បានធ្វើហ្នឹងគឺជាបែបបទរដ្ឋបាល។ គាត់ឆ្លងយោបល់ គាត់ធ្វើបែបបទរដ្ឋបាល គឺមានលិខិតស្នាមអង្គប្រជុំរាយការណ៍ផ្ទាល់អីទាំងអស់ហើយ ដូចជាមិនមានកន្លែងណាមួយដែលបញ្ជាក់ថា គាត់ឲ្យមានរំលោភអំណាចធ្ងន់ធ្ងរ»។
លោកមេធាវីលើកឡើងថា កូនក្ដីលោកមិនទាន់ឲ្យដឹងថា នឹងធ្វើការប្ដឹងជំទាស់ការផ្ដន្ទាទោសនេះទេ។
លោកក៏បដិសេធមិនអធិប្បាយទៅនឹងសំណួររបស់អ្នកសារព័ត៌មានចំពោះការប្រជែងការងាររវាងលោក ស៊ុត ឌីណា និងសហការីរបស់លោកនៅប្រទេសកូរ៉េ ដែលនាំដល់ការចាប់ខ្លួនអតីតឯកអគ្គរាជទូតរូបនេះ។
អង្គភាពប្រឆាំងអំពើពុករលួយ បានប្រើពេលជាង១ឆ្នាំ ក្នុងការស៊ើបអង្កេតភាពមិនប្រក្រតីនៃការបំពេញការងារទូតរបស់លោក ស៊ុត ឌីណា នៅប្រទេសកូរ៉េខាងត្បូង ដោយយោងតាមពាក្យបណ្ដឹងរបស់ពលករខ្មែរនៅក្នុងប្រទេសកូរ៉េខាងត្បូង និងមន្ត្រីនៃក្រសួងការបរទេសនៅប្រទេសកម្ពុជា។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា ដែលបានឃ្លាំមើលដំណើរការចោទប្រកាន់លោក ស៊ុត ឌីណា ប្រាប់ VOA នៅថ្ងៃព្រហស្បតិ៍ថា មានបញ្ហាមិនប្រក្រតីច្រើនទាក់ទិនដំណើរការច្បាប់ប្រឆាំងលោក ស៊ុត ឌីណា។
លោកអះអាងថា ប្រភពនានាបានបញ្ជាក់ថា អតីតឯកអគ្គរាជទូតរូបនេះ ពុំមានទ្រព្យសម្បត្តិច្រើនសន្ធឹកដូចការអះអាងរបស់អង្គភាពប្រឆាំងអំពើពុករលួយកាលពីពេលកន្លងមកនោះទេ។
លោកបន្តថា ការធ្វើទុក្ខបុកម្នេញផ្លូវច្បាប់ប្រឆាំងនឹងលោក ស៊ុត ឌីណា នេះមានដើមចមចេញពីការប្រកួតប្រជែងគ្នានៃមន្ត្រីរដ្ឋាភិបាលក្នុងការដណ្ដើមតួនាទីរបស់លោក ស៊ុត ឌីណា ដែលជាអតីតអ្នកប្រឆាំងរដ្ឋាភិបាលយ៉ាងស្រួចស្រាវនោះ។
«យើងហាក់បីដូចជាមិនទាន់មានជំនឿថា លោក ស៊ុត ឌីណាហ្នឹង មានមាសរាប់គីឡូ ហើយនិងលុយរាប់លានដុល្លារទេ។ ប៉ុន្តែ បើកំហុសផ្នែកកិច្ចការរដ្ឋបាល ឬក៏ការងារបច្ចេកទេសក្នុងការគ្រប់គ្រងលុយកាក់ ឬក៏គ្រប់គ្រងការងារនៅកូរ៉េខាងត្បូងហ្នឹង ទំនងជាអាចមានមែន ព្រោះអីចំណុចនេះ ក៏ឃើញថា គាត់បានសារភាពប្រាប់តុលាការដែរ»។
លោក សន ជ័យ បន្ថែមថា កន្លងមកអង្គភាពប្រឆាំងអំពើពុករលួយ ក៏មិនបានលាតត្រដាងនូវទីកន្លែងទុកដាក់ទ្រព្យសម្បត្តិរបស់លោក ស៊ុត ឌីណា ផងដែរ។
លោក ស៊ុត ឌីណា គឺជាអតីតមន្ត្រីគណបក្សហ៊្វុនស៊ិនប៉ិច តែក្រោយមកបានចុះចូលជាមួយគណបក្សប្រជាជនកម្ពុជា។ លោកត្រូវបានតែងតាំងជាឯកអគ្គរាជទូតកម្ពុជាប្រចាំប្រទេសកូរ៉េខាងត្បូងចាប់តាំងពីខែកុម្ភៈ ឆ្នាំ២០១៤កន្លងទៅនេះ។
លោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញ បដិសេធមិនផ្ដល់ការអធិប្បាយទៅលើប្រភពនៃការកសាងទ្រព្យសម្បត្តិរបស់លោក ស៊ុត ឌីណា ដែលស្ថិតនៅចំចំណុចកណ្ដាលនៃសំណុំរឿងពុករលួយនេះ។
លោកបានបង្វែរសំណួរទៅកាន់លោក លី សុផាណា អ្នកនាំពាក្យមួយរូបទៀត ដែលបានបដិសេធមិនផ្ដល់ការអធិប្បាយផងដែរ។
ក្រោយពីការចាប់ខ្លួនលោក ស៊ុត ឌីណាកាលពីខែមេសា ឆ្នាំ២០១៦ រាជរដ្ឋាភិបាលកម្ពុជាបានសម្រេចតែងតាំងលោក ឡុង ឌីម៉ង់ អតីតអ្នកនាំពាក្យសាលារាជធានីភ្នំពេញ ជាឯកអគ្គរាជទូតកម្ពុជាប្រចាំនៅប្រទេសកូរ៉េខាងត្បូង ជំនួសលោក ស៊ុត ឌីណា។
ការតែងលោកឡុង ឌីម៉ង់ បានរងការរិះគន់ពីសង្គមស៊ីវិល ពាក់ព័ន្ធទៅនឹងបញ្ហាបក្សពួកនិយម ព្រោះលោកឡុង ឌីម៉ង់ គឺជាកូនប្រុសរបស់លោក ឡុង វិសាលោ ដែលជារដ្ឋលេខាធិការក្រសួងការបរទេសកម្ពុជា៕