អនុប្រធាននៃអនុគណៈកម្មាធិការសិទ្ធិមនុស្សរបស់សហភាពអឺរ៉ុប និយាយថា សហភាពអឺរ៉ុបចាំបាច់ធ្វើប្រតិកម្មតប«ក្នុងពេលឆាប់ៗនេះ»ដោយចាត់វិធានការជាក់លាក់ឆ្លើយតបនឹងអ្វីដែលលោកស្រីហៅថា ចំណាត់ការរបស់រដ្ឋាភិបាលកម្ពុជាក្នុងការរំលាយគណបក្សប្រឆាំងដ៏ធំមួយនៅក្នុងប្រទេសកម្ពុជា។
អត្ថាធិប្បាយរបស់លោកស្រី Barbara Lochbihler សមាជិកសភាសហភាពអឺរ៉ុបបានធ្វើឡើងបន្ទាប់ពីប្រទេសស៊ុយអែដបាននិយាយកាលពីថ្ងៃព្រហស្បត៍ថា ប្រទេសស៊ុយអែដនឹងពិចារណាអំពីទំនាក់ទំនងរបស់ខ្លួនជាមួយនឹងប្រទេសកម្ពុជា ប្រសិនបើរដ្ឋាភិបាលបន្តប្រើប្រាស់វិធានការរំលាយគណបក្សសង្គ្រោះជាតិដែលជាគណបក្សប្រឆាំងដ៏ធំនៅកម្ពុជា។
លោកស្រី Lochbihler បានប្រាប់ VOA ថា សហភាពអឺរ៉ុបកំពុងពិចារណាដាក់ទណ្ឌកម្មដោយចំពោះឬអាចឈានដល់ការលើកលែងការអនុគ្រោះសម្រាប់ការនាំទំនិញកម្ពុជាចូលទីផ្សារដ៏ធំរបស់សហភាពអឺរ៉ុប។
លោកស្រីនិយាយបន្ថែមទៀតថា៖ «នៅប្រទេសកម្ពុជា ពួកគេអាចនិយាយថា ពួកគេមានការគាំទ្រពីប្រទេសចិន ហើយថាតើយើងមានអ្វីដែលត្រូវខ្វល់ពីសហភាពអឺរ៉ុបនោះ?»។ក៏ប៉ុន្តែ ប្រសិនបើអស់លោក អ្នកមើលឲ្យច្បាស់ លោក អ្នកអាចមើលឃើញថា សហភាពអឺរ៉ុបគឺជាផ្សារនាំទំនិញចេញដ៏ធំសម្រាប់កម្ពុជា។ដូច្នេះ ខ្ញុំគិតថា ពួកគេត្រូវយកចំណុចនេះមកពិចារណា ហើយសម្រាប់រូបខ្ញុំផ្ទាល់ត្រូវគិតថា ប្រសិនបើសហភាពអឺរ៉ុប អាចចាត់ការមួយជំហានទៀតហើយហើយដាក់ឲ្យចំគោលដៅចំពោះមន្រ្តីរដ្ឋាភិបាលមួយចំនួនគឺ មន្រ្តីរដ្ឋាភិ បាលនិងអ្នកតំណាងរបស់កម្ពុជានឹងឆាប់ទទួលយកបាន»។
ប្រទេសកម្ពុជានាំទំនិញចូលទៅសហភាពអឺរ៉ុបមានទំហំជាទឹកប្រាក់៥ពាន់លានដុល្លារនៅឆ្នាំ២០១៦ ដោយទទួលបានអនុគ្រោះចូលទីផ្សារដ៏ធំនេះក្រោមកម្មវិធីអ្វីៗគ្រប់យ៉ាងលើកលែងតែអាវុធ។
មន្រ្តីរដ្ឋាភិបាលជាច្រើននាក់ធ្វើដំណើរទៅបណ្តាប្រទេសនៅសហភាពអឺរ៉ុបជាញឹកញាប់ដូចជាប្រទេសបារាំងដើម្បីទៅសួរសុខទុក្ខក្រុមគ្រួសារ។
លោកស្រី Lochbihler បាននិយាយទៀតថា លោកស្រីនឹងទទូចឲ្យសមាជិកសភាដទៃទៀត«ពិនិត្យមើលជម្រើសក្នុងការស៊ើបអង្កេតកម្មវិធីអ្វីៗគ្រប់យ៉ាងលើកលែងតែអាវុធនិងផលិតផលដទៃខ្លះទៀតសម្រាប់ការព្យួរសិទ្ធិដែលអាចប្រើប្រាស់បានក្រោមមាត្រាទី១៥នៃប្រព័ន្ធអនុគ្រោះទូទៅ»។
កម្មវិធីអ្វីៗគ្រប់យ៉ាងលើកលែងតែអាវុធឬ EBAរបស់កម្ពុជាជាមួយសហភាពអឺរ៉ុបបានស្ថិតនៅក្រោមការពិនិត្យពិច្ច័យរួចហើយ ពីព្រោះតែការខឹងខ្លាំងដែលកើតពីការបង្ខិតបង្ខំប្រជាពលរដ្ឋចេញពីលំនៅដ្ឋានដែលបានធ្វើឡើងដោយសមាជិកព្រឹទ្ធសភាគណបក្សកាន់អំណាចម្នាក់ដែលបាននាំស្ករយ៉ាងច្រើនទៅកាន់ទីផ្សារដ៏ធំមួយនៅសហភាពអឺរ៉ុប។
លោកស្រី Lochbihler បានមានប្រសាសន៍ថា លោកស្រីបានសរសេរលិខិតទៅឲ្យលោកស្រី Cecilia Malmstrom ស្នងការពាណិជ្ជកម្មសហភាពអឺរ៉ុបដើម្បីស្នើសុំឲ្យលោកស្រីពិនិត្យមើលថាតើហេតុអ្វីបានជារដ្ឋាភិបាលកម្ពុជាមិនទាន់បានចុះហត្ថលេខាលើផ្នែកដែលជាប់ទាក់ទងសម្រាប់ដំណើរការត្រួតពិនិត្យដែលភាគីទាំង២បានព្រមព្រៀងគ្នានៅក្នុងកិច្ចខំប្រឹងប្រែងមួយដើម្បីដោះស្រាយជម្លោះនោះ។
អត្ថាធិប្បាយរបស់លោកស្រីបានកើតមានឡើងបន្ទាប់ពីជំនួបជាមួយលោកស្រីមួ សុខហួ អនុប្រធានគណបក្សប្រឆាំងកាលពីថ្ងៃសុក្រ ដែលបានរត់គេចខ្លួនពីប្រទេសកម្ពុជាកាលពីសប្តាហ៍មុនបាននិយាយថា លោកស្រីត្រូវបានគេប្រាប់ពីការចង់ចាប់ខ្លួនយ៉ាងខ្លាំង។
លោកកឹម សុខា មេដឹកនាំគណបក្សប្រឆាំងបានជាប់ពន្ធនាគារពីការចោទប្រកាន់ថា «ក្បត់ជាតិ»ហើយសមាជិកសភាប្រហែលចំនួនពាក់កណ្តាលរបស់លោកបានរត់គេចខ្លួនចេញពីប្រទេស។
រដ្ឋាភិបាលកម្ពុជាបានចាប់ផ្តើមធ្វើការវាយប្រហារខាងនយោបាយដោយមានការសម្របសម្រួលមួយទៅលើគណបក្សប្រឆាំង បណ្តាញព័ត៌មានឯករាជ្យនិងអង្គ ការសង្គមស៊ីវិល ដោយប្រើប្រាស់ការចោទប្រកាន់ពីការរួមគំនិតទៅនឹងផែនការដែលគាំទ្រដោយសហរដ្ឋអាមេរិកដើម្បីផ្តួលរំលំរបបជាហេតុផលដើម្បីពង្រីកការចាប់ខ្លួននិងបំបិទមាត់ពួកអ្នករិះគន់និងពួកប្រឆាំង។
បណ្តាញព័ត៌មាន Fresh News ដែលគាំទ្ររដ្ឋាភិបាលដែលជានិច្ចកាលផ្សាយសកម្មភាពដែលជិតកើតឡើងរបស់គណបក្សកាន់អំណាច ថែមទាំងបានផ្សាយលិខិតអនាមិកមួយកាលពីថ្ងៃព្រហស្បត៍ផ្ញើរទៅកាន់បណ្ណាធិការនោះដែលបានចោទប្រកាន់លោក George Edgarប្រធានគណៈប្រតិភូសហភាពអឺរ៉ុបបានឆ្លង «បន្ទាត់ក្រហម»ដោយការជំរុញឲ្យដោះលែងលោកកឹម សុខា មេដឹកនាំគណបក្សប្រឆាំងដែលជាប់ពន្ធនាគារ។
លោក George Edgar បានប្រាប់កាសែត Phnom Penh Postនៅក្នុងការឆ្លើយតបថា ទោះបីរដ្ឋជាសមាជិករបស់សហភាពអឺរ៉ុបបានសម្តែងនូវការព្រួយកង្វល់យ៉ាងខ្លាំងអំពីការចាប់ខ្លួនលោកកឹម សុខាក៏ដោយ សហភាពអឺរ៉ុបនៅតែមិនគាំទ្រគណបក្សទេ។
លោកផៃ ស៊ីផានអ្នកនាំពាក្យទីស្តីការគណៈរដ្ឋមន្រ្តីបាននិយាយថា សហភាពអឺរ៉ុប ចាំបាច់ពិចារណាថាតើខ្លួនចង់នៅបន្តចាត់ទុកកម្ពុជាជាដៃគូអភិវឌ្ឍន៍នៅ ពេលដែលនិយាយពីការដាក់ទណ្ឌកម្មឬក៏អត់នោះ។
លោកផៃ ស៊ីផាននិយាយថា៖«ពួកគេមានសិទ្ធិធ្វើអ្វីៗទាំងអស់។ចូរចងចាំថា កម្ពុជាមិនមែនជារដ្ឋភេរវកម្មទេ។យើងមិនបានផលិតអាវុធនុយក្លែអ៊ែទេ»។
កាលពីថ្ងៃច័ន្ទ សភាជាតិកម្ពុជាបានអនុម័តវិសោធនកម្មដែលនឹងធ្វើការចែកឡើងវិញនូវអាសនៈរបស់គណបក្សប្រឆាំងដែលអាសនៈក្រុមប្រឹក្សាឃុំនិងសង្កាត់ស្ទើរតែទាំងអស់បានទៅគណបក្សកាន់អំណាចហើយគណបក្សតូចៗផ្សេងទៀតបានទទួលអាសនៈសភា។
បណ្តឹងដែលធ្វើឡើងដោយគណបក្សមួយនៃគណបក្សទាំងនោះដែលបានស្នើឲ្យរំលាយគណបក្សសង្គ្រោះជាតិចំពោះការរៀបចំផែនការផ្តួលរំលំរដ្ឋាភិបាលនោះឥឡូវនេះបានស្ថិតមុខតុលាការ។
កាលពីថ្ងៃព្រហស្បត៍ លោកស្រី Annika Ben David ឯកអគ្គរដ្ឋទូតទទួលបន្ទុកសិទ្ធិមនុស្សរបស់ប្រទេសស៊ុយអែដបានប្រាប់ទុកមុននៅឯសន្និសីទកាសែតមួយក្នុងទីក្រុងភ្នំពេញពីផលវិបាក ប្រសិនបើរដ្ឋាភិបាលបច្ចុប្បន្ននេះរំលាយគណបក្សសង្គ្រោះជាតិ។
លោកស្រីឯកអគ្គរដ្ឋទូតបានមានប្រសាសន៍ថា៖«ខ្ញុំបានបញ្ជាប់ប្រាប់អ្នកតំណាងរបស់រដ្ឋាភិបាលកម្ពុជាថា បើគណបក្សសង្គ្រោះជាតិត្រូវគេរំលាយ ការណ៍នេះនឹងបង្ខំឲ្យរដ្ឋាភិបាលរបស់ខ្ញុំគិតឡើងវិញពីការទាក់ទងរបស់យើងនៅកម្ពុជា»។លោកស្រីឯកអគ្គរដ្ឋទូតនិយាយទៀតថា «យើងគិតថា វាជាផលប្រយោជន៍រយៈ ពេលយូររបស់កម្ពុជាដើម្បីបើកចំហរតាមបែបប្រជាធិបតេយ្យដែលខ្លួនធ្លាប់មានមកហើយនឹងវិលត្រឡប់កាន់ការបោះឆ្នោតសេរីហើយមានការរឹតត្បិតតិចតួចដល់បណ្តាញព័ត៌មាននិងអង្គការសង្គមស៊ីវិលទាំងអស់ដែលប្រតិបត្តិការនៅកម្ពុជា»។
លោកស្រីឯកអគ្គរដ្ឋទូតនិយាយទៀតថា ការរីកលូតលាស់សេដ្ឋកិច្ចដ៏គួរឲ្យចាប់អារម្មណ៍នៅកម្ពុជា អាចរងការប៉ះពាល់ដោយស្ថានភាពនយោបាយនៅពេលបច្ចប្បន្ននេះ។
លោកស្រីឯកអគ្គរដ្ឋទូតបានថ្លែងទៀតថា៖«ហើយខ្ញុំក៏សម្តែងនូវការព្រួយកង្វល់ថា ព្រឹត្តិការណ៍នៅទីនេះឥឡូវនេះអាចបង្កើននូវរូបភាពអវិជ្ជមានសម្រាប់កម្ពុជានៅទូទាំងសាកលលោក ដូច្នេះ ការរឹតត្បិតសិទ្ធិស៊ីវិលនិងសិទ្ធិខាងនយោបាយនៅពេលបច្ចុប្បន្នហើយនឹងព្រិត្តិការណ៍នៅពេលថ្មីៗនេះ ប្រហែលបានបញ្ជូនសញ្ញាអវិជ្ជមានទៅកាន់អ្នកវិនិយោគទុន អ្នកប្រើប្រាស់ទំនិញ ដៃគូពាណិជ្ជកម្មនៅបរទេស ដែលអាចធ្វើឲ្យប៉ះពាល់សេដ្ឋកិច្ចកម្ពុជា»។
លោកនាយករដ្ឋមន្រ្តីហ៊ុន សែនដែលបានដឹកនាំប្រទេសអស់រយៈពេលជាង៣ទសវត្សរ៍ បានប្រឈមការបោះឆ្នោតសាកលនៅឆ្នាំក្រោយ បន្ទាប់ពីបានបាត់បង់អាសនៈក្រុមប្រឹក្សាឃុំ សង្កាត់ជិត១ភាគ៣នៅក្នុងការបោះឆ្នោតក្រុមប្រឹក្សាឃុំ សង្កាត់នៅដើមឆ្នាំនេះទៅគណបក្សសង្គ្រោះជាតិ៕
ប្រែសម្រួលដោយជឹង ប៉ូជីន