គណបក្សប្រជាជនកម្ពុជានិងគណបក្សសង្គ្រោះជាតិបានព្រមព្រៀងគ្នាធ្វើវិសោធនកម្មបទបញ្ជាផ្ទៃក្នុងនៃរដ្ឋសភា ដោយនៅក្នុងជំពូកទី៣៤ថ្មី បានតម្រូវឱ្យគណៈកម្មការទាំងឡាយរបស់រដ្ឋសភាមានសិទ្ធិកោះអញ្ជើញរដ្ឋមន្ត្រី ឬ វរៈជនណាមួយមកបំភ្លឺអំពីបញ្ហាអ្វីមួយដែលពាក់ព័ន្ធនឹងការទទួលខុសត្រូវរបស់ខ្លួនហើយរដ្ឋមន្ត្រី ឬ វរៈជននោះចាំបាច់ត្រូវតែចូលមកបំភ្លឺក្នុងរដ្ឋសភា។
ការសម្រេចកែសម្រួលបទបញ្ជាផ្ទៃក្នុងនៃរដ្ឋសភាថ្មីនេះ បានធ្វើឡើងក្រោមកិច្ចប្រជុំក្រុមការងារមកពីគណបក្សទាំងពីរដែលមានភាគីម្ខាងៗចំនួន៦រូបដឹកនាំដោយលោក ឈាង វុន ខាងគណបក្សប្រជាជនកម្ពុជា និង លោក យ៉ែម បុញ្ញឫទ្ធិខាងគណបក្សសង្គ្រោះជាតិ។
លោក យ៉ែម បុញ្ញឫទ្ធិប្រធានក្រុមការងារខាងគណបក្សសង្គ្រោះជាតិមានប្រសាសន៍ប្រាប់អ្នកកាសែតក្រោយពីកិច្ចប្រជុំបិទទ្វារនៅថ្ងៃអង្គារនេះថាគណបក្សទាំងពីរបានឯកភាពគ្នាដើម្បីបើកផ្លូវឱ្យមានការបង្កើតគណៈកម្មការបន្ថែមនៅក្នុងប្រការទី៦ថ្មី។
លោកបានបញ្ជាក់ថាការជជែកគ្នាយូរនៅពេលនេះដោយសារតែក្រុមការងារបានលើកឡើងពីសំណួរដែលត្រូវចោទសួរទៅលើរាជរដ្ឋាភិបាលដែលកន្លងមកមិនបានអនុវត្តន៍ឱ្យបានពេញលេញដើម្បីឱ្យសមាជិករដ្ឋាភិបាលមកឆ្លើយក្នុងរដ្ឋសភា។
លោកបាននិយាយថា៖«ដែលមួយរយៈកន្លងមកនៅមានការខ្វះចន្លោះដែលមិនបានអនុវត្តឱ្យបានពេញលេញ។ យើងបានជជែកប្តូរយោបល់គ្នាយ៉ាងយូរលើចំណុចនេះដើម្បីព្យាយាមឱ្យខាងរាជរដ្ឋាភិបាល ខាងនីតិប្រតិបត្តិគាត់អនុវត្តទៅតាមបទបញ្ជាផ្ទៃក្នុងសភាក្នុងការមកឆ្លើយបំភ្លឺដោយផ្ទាល់មាត់ឬដោយលិខិត»។
លោក ឈាង វុន ប្រធានក្រុមការងារខាងគណបក្សប្រជាជនកម្ពុជាមានប្រសាសន៍ថាការមកឆ្លើយបំភ្លឺក្នុងរដ្ឋសភារបស់មន្ត្រីរដ្ឋាភិបាលនេះជាឆន្ទៈរបស់លោកនាយករដ្ឋមន្ត្រីហ៊ុន សែន ដែលលោកធ្លាប់បានអះអាងថារដ្ឋមន្ត្រីដែលកោះអញ្ជើញដោយរដ្ឋសភាត្រូវតែមក។
លោកមានប្រសាសន៍ថានៅមានចំណុចមួយចំនួនដែលនៅសេសសល់ក៏ប៉ុន្តែយើងនឹងបន្តពិភាក្សាគ្នានៅពេលក្រោយ។
លោកមានប្រសាសន៍ថា៖«ចំណុចខ្លះដែលនៅសេសសល់យើងនឹងយកជជែកគ្នានៅពេលក្រោយ។ហើយពេលក្រោយហ្នឹងតាមខ្ញុំយល់គឺនៅពេលដែលសមាជិកសភាទាំងអស់មកអង្គុយធ្វើការជាមួយគ្នាឯកភាពគ្នាហើយយើងយកយន្តការសភាយកមកប្រើប្រាស់ក្នុងការកែសម្រួលអ្វីដែលនៅសេសសល់»។
មន្ត្រីរដ្ឋាភិបាល ឬវរៈជនកន្លងមកមិនសូវត្រូវបានគណៈកម្មការជំនាញរបស់រដ្ឋសភាកោះអញ្ជើញមកសាកសួរបានច្រើនទេពាក់ព័ន្ធការទទួលខុសត្រូវរបស់ខ្លួន។
គណបក្សប្រឆាំងនៅក្នុងរដ្ឋសភាធ្លាប់បានកោះអញ្ជើញមន្ត្រីរដ្ឋាភិបាលមកសាកសួរជាច្រើនលើតែភាគច្រើនត្រូវបានបដិសេធឬក៏មកឆ្លើយបំភ្លឺដែរតែត្រូវបានកំណត់ពេលឬសំណួរ។
លោក ឈាង វុន បានបញ្ជាក់ថាការកំណត់សំណួរនិងរយៈពេល នៅក្នុងវិសោធនកម្មបទបញ្ជាផ្ទៃក្នុងនៃរដ្ឋសភាថ្មីនេះគណបក្សទាំងពីរបានជជែកគ្នាច្រើនថាតើយើងត្រូវប្រើនីតិវិធីអ្វីដើម្បីទទួលស្គាល់តួនាទីគ្នាទៅវិញទៅមក។
ក្រុមការងារនៃគណបក្សទាំងពីរនៅថ្ងៃអង្គារនេះបានបើកកិច្ចប្រជុំចំនួនបីផ្សេងៗគ្នាគឺកិច្ចប្រជុំដើម្បីធ្វើវិសោធនកម្មបទបញ្ជាផ្ទៃក្នុងនៃរដ្ឋសភា កិច្ចប្រជុំកែសម្រួលសមាសភាពគណៈកម្មាធិការជាតិរៀបចំការបោះឆ្នោត និង កិច្ចជុំ ធ្វើវិសោធនកម្មច្បាប់រដ្ឋធម្មនុញដោយបន្ថែមមាត្រាទី១៥ដែលតម្រូវឱ្យបង្កើតគណៈកម្មការជំនាញរបស់រដ្ឋសភាមួយបន្ថែមទៀត។
រាល់កិច្ចប្រជុំទាំងអស់មានកិច្ចប្រជុំខ្លះមិនទាន់បានបញ្ចប់ទេ។ គណបក្សទាំងពីរសន្យាថានឹងបន្តពិភាក្សាគ្នាបន្ថែមទៀតនៅពេលដែលគណបក្សសង្គ្រោះជាតិធ្វើសច្ចាប្រណិធានស្បថចូលកាន់មុខតំណែងជាសមាជិកសភាតំណាងរាស្ត្រ៕