បន្ថែមលើគេហទំព័រដែលខ្លួនកំពុងមាន មជ្ឈមណ្ឌលឯកសារកម្ពុជា(DC-Cam) កំពុងរៀបចំដំណើរការគេហទំព័រថ្មីមួយទៀតសម្រាប់ដាក់បញ្ចូលឯកសារពាក់ព័ន្ធនឹងសម័យកម្ពុជាប្រជាធិបតេយ្យឬខ្មែរក្រហម។ មន្ត្រីរបស់មជ្ឈមណ្ឌលឯកសារកម្ពុជាបានឱ្យដឹងថា គេហទំព័រនេះនឹងក្លាយជាបណ្ណាល័យសំខាន់មួយសម្រាប់សាធារណជន ពិសេសយុវវ័យក្នុងការស្វែងយល់ពីរបបខ្មែរក្រហម ដោយសារតែព័ត៌មាននៅលើគេហទំព័រនេះមានលក្ខណៈសាមញ្ញនិងងាយយល់។
មជ្ឈមណ្ឌលឯកសារកម្ពុជាបានឱ្យដឹងថា ខ្លួននឹងបើកដំណើរការគេហទំព័រថ្មីមួយនៅដើមឆ្នាំ២០១៧នេះ ដោយដាក់បញ្ចូលឯកសារប្រមាណមួយលានឯកសារដែលមជ្ឈមណ្ឌលមាន ដើម្បីជាកន្លែងសម្រាប់ឱ្យយុវជន កម្ពុជាស្វែងយល់ពីប្រវត្តិសាស្ត្រខ្មែរក្រហម។
លោក ផេង ពង្សរ៉ាស៊ី ប្រធានគម្រោងស្ដីពីការសិក្សាអំពីប្រល័យពូជសាសន៍នៅកម្ពុជានៃមជ្ឈមណ្ឌលឯកសារកម្ពុជាប្រាប់ VOA កាលពីរសៀលថ្ងៃសៅរ៍ថា គេហទំព័រថ្មីនេះមានអាសយដ្ឋាន www.thekhmerrougehistory.com ហើយនឹងបើកដំណើរការនៅក្នុងសប្ដាហ៍ទី២នៃខែមករា ឆ្នាំ២០១៧ ។
យុវជនមួយក្រុមកំពុងមើលគេហទំព័រថ្មីសម្រាប់អប់រំយុវជនអំពីសម័យខ្មែរក្រហម តាមទូរស័ព្ទដៃ។ (រូបថត៖ អ៊ុច មករា/មជ្ឈមណ្ឌលឯកសារកម្ពុជា(DC-Cam))
លោកផេង ពង្សរ៉ាស៊ី បន្តថា គោលបំណងនៃការបង្កើតគេហទំព័រនេះគឺដើម្បីជាប្រភពឯកសារមួយសម្រាប់ឲ្យសាធារណជនជាតិនិងអន្តរជាតិអាចស្វែងយល់ពីប្រវត្តិសាស្ត្រនៃរបបវាលពិឃាតខ្មែរក្រហម ដោយឯកសារដែលដាក់នៅលើគេហទំព័រនេះមានលក្ខណៈសម្រាយនិងងាយយល់សម្រាប់សាធារណជនទូទៅ។ លោកថា កន្លងទៅ មជ្ឈមណ្ឌលធ្លាប់បានបោះពុម្ពជាសៀវភៅដើម្បីចែកចាយ ក៏ប៉ុន្តែសៀវភៅទាំងនោះមិនអាចទៅដល់ដៃមនុស្សគ្រប់គ្នានោះទេ។
«អ៊ីចឹងហើយបានជាការកែប្រែគំនិតនេះមកជាការធ្វើវេបសាយមួយដែលវា permanent (អចិន្ត្រៃយ៍) ដែលសិស្សគ្រប់ជំនាន់ យុវវ័យគ្រប់ជំនាន់អាចមើលឃើញ ដោយគ្រាន់តែគាត់កាន់ទូរស័ព្ទដៃគាត់ទៅគាត់អាចមើលពេលណាបានពេលហ្នឹង។ នេះជាគោលគំនិតធំរបស់យើង។ ហើយមួយទៀត យើងបង្កើតនេះ មិនមែនថាគោលដៅសំខាន់តែកូនក្មេងៗទេ អ្នកណាក៏ដោយក៏អាចមើលឃើញដែរទាំងចាស់ទាំងអី ហើយជាពិសេសគឺអ្នកដែលនៅឆ្ងាយៗពីទីក្រុង ហើយអ្នកដែលពុំទាន់បានទទួលការអប់រំណាសោះពីប្រវត្តិសាស្ត្រខ្មែរក្រហម ប៉ុន្តែគាត់មានទូរស័ព្ទដៃកាន់ គាត់អាចមើលឃើញ ជាពិសេស Smart Phone (ទូរស័ព្ទទំនើប) គាត់អាចមើលឃើញ ចឹងគាត់អាចរៀនតាមហ្នឹងបាន តាមទូរស័ព្ទគាត់អីចឹង មិនបាច់យើងទៅផ្ទាល់ក៏បាន»។
លោក ផេង ពង្សរ៉ាស៊ី ឱ្យដឹងដែរថា គេហទំព័រនេះចែកចេញជាបីផ្នែកធំៗមានដូចជា ការសង្ខេបព្រឹត្តិការណ៍សំខាន់ៗចាប់តាំងពីថ្ងៃកកើតដំបូងនៃខ្មែរក្រហមរហូតដល់ដំណើរការនៃការរៀបចំតុលាការកូនកាត់ដើម្បីកាត់ទោសមេដឹកនាំខ្មែរក្រហម ផ្នែកពន្យល់ពាក្យដែលមានប្រើប្រាស់នៅក្នុងសម័យខ្មែរក្រហម និងផ្នែកដែលរៀបរាប់ពីជីវប្រវត្តិរបស់កម្មាភិបាលខ្មែរក្រហម ព្រមទាំងអ្នករស់រានមានជីវិតនិងបាត់ជីវិតក្នុងរបបនោះ។ ឯកសារនៅលើគេហទំព័រនេះមានជាទម្រង់វីដេអូ រូបភាព សំឡេង និងអត្ថបទ។
លោក ផេង ពង្សរ៉ាស៊ី ឱ្យដឹងដែរថា គេហទំព័រនេះមានពីរភាសាគឺភាសាខ្មែរនិងភាសាអង់គ្លេស។ លោកបន្តថា គេហទំព័រនេះអនុញ្ញាតឱ្យអ្នកអានបញ្ចេញជាមតិយោបល់និងសួរសំណួរផងដែរ ដោយក្រុមការងាររបស់មជ្ឈមណ្ឌលឯកសារកម្ពុជានឹងធ្វើការឆ្លើយតបទៅវិញ។
យោងតាមមជ្ឈមណ្ឌលឯកសារកម្ពុជា ប្រជាពលរដ្ឋខ្មែរជាង១,៧លាននាក់ត្រូវបានគេជឿថាបានស្លាប់ដោយសារការអត់ឃ្លាន ការធ្វើការហួសកម្លាំងនិងការកាប់សម្លាប់ នៅចន្លោះឆ្នាំ១៩៧៥ដល់ឆ្នាំ១៩៧៩ ក្រោមរបបខ្មែរក្រហម។
លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជននិងកីឡាប្រាប់VOA កាលពីល្ងាចថ្ងៃសៅរ៍ថា គេហទំព័រនេះនឹងក្លាយទៅជាប្រភពព័ត៌មានមួយទៀត បន្ថែមលើសៀវភៅគោលអំពីប្រវត្តិខ្មែរក្រហមដែលក្រសួងបានដាក់សម្រាប់ឱ្យសិស្សរៀននៅតាមសាលា។ លោកបន្តថា ការសិក្សាពីប្រវត្តិសាស្ត្រគឺជារឿងដ៏សំខាន់ដែលអាចធ្វើឱ្យប្រជាពលរដ្ឋយល់ដឹងពីអត្តសញ្ញាណជាតិច្បាស់និងដឹងរឿងពិត ដើម្បីទប់ស្កាត់កុំឱ្យប្រវត្តិសាស្ត្រដែលមិនល្អកើតមានដដែលៗ។
«បាទតាមពិតមានពាក្យស្លោកមួយថា បើយើងមិនដឹងប្រវត្តិសាស្ត្រ អាប្រវត្តិសាស្ត្រហ្នឹងនឹងកើតឡើងវិញ។ ចឹងហើយយើងត្រូវដឹង ត្រូវរៀនទាំងមេរៀនល្អ ទាំងមេរៀនអាក្រក់។ ចឹងដើម្បីធ្វើការវិភាគថា តើយើងចង់ទៅណា? តើយើងមកពីណា? អ៊ីចឹងដើម្បីយើងទៅណាហ្នឹង យើងត្រូវមានហៅថា ត្រៀមខ្លួនរួចស្រេចដើម្បីកសាងជាតិ។ ចឹងកសាងជាតិក៏ត្រូវដឹងប្រវត្តិសាស្ត្រដែរ»។
លោកហង់ ជួន ណារ៉ុន ឱ្យដឹងដែរថា កន្លងទៅ ក្រសួងបានសហការជាមួយមជ្ឈមណ្ឌល់ឯកសារកម្ពុជាដើម្បីផលិតជាសៀវភៅសម្រាប់គ្រូនិងសិស្សនៅថ្នាក់វិទ្យាល័យនិងបង្រៀនបំប៉នគ្រូជារៀងរាល់ឆ្នាំផងដែរ។ លោកបន្តថា ដើម្បីបង្កើនការយល់ដឹងពីសម័យខ្មែរក្រហម ក្រសួងបានដាក់បញ្ចូលសំណួរពាក់ព័ន្ធនឹងរបបនេះទៅក្នុងការប្រឡងថ្នាក់ជាតិជារៀងរាល់ឆ្នាំ។
លោក ឡាត់ គី មន្ត្រីសិទ្ធិមនុស្សនៃសមាគមការពារសិទ្ធិមនុស្សអាដហុក ដែលឃ្លាំមើលដំណើរការកាត់ទោសខ្មែរក្រហម ប្រាប់VOAថា គេហទំព័រថ្មីនេះនឹងដើរតួនាទីយ៉ាងសំខាន់ក្នុងការថែរក្សាឯកសារប្រវត្តិសាស្ត្រសម្រាប់ឱ្យកូនខ្មែរទាំងសម័យនេះនិងជំនាន់ក្រោយក្នុងការស្វែងយល់។
«វាមានការងាយស្រួលសម្រាប់សាធារណជនទូទៅ ជាពិសេសអ៊ុំពូមីងដែលជាដើមបណ្ដឹងរដ្ឋប្បវេណី ជនរងគ្រោះដែលរស់រានមានជីវិត អាចនៅក្នុងការស្វែងយល់អំពីឯកសារនានាពាក់ព័ន្ធនឹងសាច់រឿងរងគ្រោះរបស់គាត់បាទ»។
បើតាមលោក ផេង ពង្សរ៉ាស៊ី ក្រុមការងាររបស់មជ្ឈមណ្ឌលឯកសារកម្ពុជានឹងធ្វើបច្ចុប្បន្នភាពគេហទំព័រនេះជាបន្តបន្ទាប់ ដោយដាក់បញ្ចូលព័ត៌មានថ្មីបន្ថែម ដើម្បីទាក់ទាញយុវជនឱ្យចាប់អារម្មណ៍ចង់ចូលមើលនិងស្វែងយល់ពីប្រវត្តិសាស្ត្រឱ្យបានកាន់តែច្រើន៕