តុលាការរាជធានីភ្នំពេញ នៅថ្ងៃពុធនេះ បានយកខ្លឹមសារនៃការឆ្លើយឆ្លងសន្ទនាឯកជនលើបណ្តាញទំនាក់ទំនងសង្គម Facebook និង Telegram ដើម្បីទាញយកចម្លើយជនជាប់ចោទពីររូប គឺកញ្ញា ស កន្និកា និងលោក តុន និមល ដែលស្ថិតក្នុងសំណុំរឿងការឃុំខ្លួនលោករ៉ុង ឈុន។
លោក រ៉ុង ឈុន ប្រធានសហភាពសហជីពកម្ពុជា កំពុងត្រូវបានជំនុំជម្រះ ដោយលោកប្រឈមនឹងការចោទប្រកាន់ពីបទ«ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម»។
ក្រោយការចាប់ខ្លួនលោក រ៉ុង ឈុន ការតវ៉ាអហិង្សាបានកើតឡើងជាបន្តបន្ទាប់ ហើយសកម្មជនមួយចំនួន ក៏ត្រូវបានចាប់ខ្លួន ដែលក្នុងនោះក៏មានកញ្ញា ស កន្និកា និងលោក តុន និមល ផងដែរ។
អ្នកទាំងពីរជាអតីតក្រុមយុវជនរបស់គណបក្សសង្គ្រោះជាតិ ដែលត្រូវបានរំលាយចោលកាលពីឆ្នាំ២០១៧។
នៅក្នុងសវនាការនាព្រឹកថ្ងៃពុធ ទាំងកញ្ញា ស កន្និកា និងលោក តុន និមល ត្រូវបានតុលាការសួរឲ្យបំភ្លឺអំពីតួនាទីរបស់ពួកគាត់នៅក្នុងការរៀបចំការតវ៉ាឲ្យដោះលែងលោក រ៉ុង ឈុន និងអំពីថាតើពួកគាត់បានដឹង ឬចែករំលែកសេចក្តីថែ្លងការណ៍របស់លោក រ៉ុង ឈុន ពាក់ព័ន្ធនឹងការបោះបង្គោលព្រំដែនកម្ពុជា-វៀតណាម ក្នុងស្រុកពញាក្រែកខេត្តត្បូងឃ្មុំ ដែរឬអត់។
មុនការសួរដេញដោលជនជាប់ចោទទាំងពីរខាងលើ លោក រ៉ុង ឈុន ស្ថិតក្នុងសម្លៀកបំពាក់អ្នកជាប់ឃុំ ត្រូវបានតំណាងអយ្យការលោក សេង ហៀង សួរអំពីទំនាក់ទំនងរបស់លោកជាមួយកញ្ញា ស កន្និកា និងលោក តុន និមល។
លោក សេង ហៀង ក៏បានសួរនាំលោក រ៉ុង ឈុន ផងដែរ អំពីការបង្កើតសមាគមមួយឈ្មោះ សមាគមសេដ្ឋកិច្ចក្រៅប្រព័ន្ធដើម្បីសង្គម។
មុននឹងឆ្លើយ លោករ៉ុង ឈុន បានត្អូញត្អែរ ប្រាប់តំណាងអយ្យការ និងអ្នកឃ្លាំមើលសវនាការដែលមានតំណាងស្ថានទូត មន្ត្រីសិទ្ធិមនុស្សរបស់អង្គការសហប្រជាជាតិ ក៏ដូចជាអ្នកសង្កេតការណ៍ផ្សេងទៀត អំពីស្ថានភាពនៅក្នុងពន្ធនាគារ ដែលមានលក្ខណៈតូចចង្អៀត និងការប្រើប្រាស់ប្រព័ន្ធរំខានរលកសញ្ញាទូរស័ព្ទ ដែលលោកថា បានធ្វើឲ្យប៉ះពាល់ការចងចាំរបស់លោក។
ក្រោយការផ្ដោះផ្ដងរវាងលោក សេង ហៀង និងលោក រ៉ុង ឈុន ដែលវិលវល់ត្រឹមការព្យាយាមរបស់តំណាងអយ្យការក្នុងការភ្ជាប់ទំនាក់ទំនងរវាងលោក រ៉ុង ឈុន និងសកម្មជនទាំងពីរគឺ កញ្ញា ស កន្និកា និងលោក តុន និមល ភាពតានតឹងក៏ផ្ទុះឡើងរវាងចៅក្រមនិងមេធាវីការពារក្ដី។
ក្រោយជាងកន្លះម៉ោងនៃការសួរដេញដោលរបស់តំណាងអយ្យការ និងតំណាងមេធាវីរដ្ឋាភិបាលពីររូបមកលើលោក រ៉ុង ឈុន ជុំវិញការចេញសេចក្តីថ្លែងការណ៍ពាក់ព័ន្ធនឹងបញ្ហាព្រំដែននោះ ការប្រកែកគ្នាតឹងសរសៃកររវាងលោកប្រធានក្រុមប្រឹក្សាជំនុំជម្រះ លិ សុខា និងលោក ជូង ជូងី មេធាវីការពារក្តីឲ្យកញ្ញា ស កន្និកា បានផ្ទុះឡើងមួយស្របក់។
ភាពតានតឹងនេះ បានកើតឡើងនៅពេលលោក លិ សុខា ផ្តើមសួរកញ្ញា ស កនិ្នកា អំពីការប្រើប្រាស់ប្រព័ន្ធទូរស័ព្ទដៃ និងរូបភាពនៃទូរស័ព្ទដៃ ដែលតុលាការថា ជាវត្ថុតាងដែលអាជ្ញាធរមានសមត្ថកិច្ចបានដកហូតពីកញ្ញា ស កន្និកា។
លោក ជូង ជូងី បាននិយាយទាំងច្រឡោតថា៖ «អាហ្នឹងមិនមែនជាទូរស័ព្ទទេ គឺជាក្រដាស»។
លោក លិ សុខា និងលោក ជូង ជូងី បានប៉ះសម្តីគ្នាខ្លាំងៗបន្តទៀត ជុំវិញការបង្ហាញរូបភាពទូរស័ព្ទនេះ រហូតលោកជូងីបានទះតុមួយទំហឹងក្នុងសវនាការ និងទាមទារឲ្យតុលាការបង្ហាញភស្តុតាងទូរស័ព្ទជាក់ស្តែង។
ក្នុងដំណាក់កាលនៃការបន្តសួរដេញដោល កញ្ញា ស កន្និកា អតីតយុវជនសង្គ្រោះជាតិក្នុងក្រុងតាខ្មៅនោះ លោក លិ សុខា ព្យាយាមយកចម្លើយពីកញ្ញា ស កន្និកា អំពីគោលបំណងនៃការបង្កើតសមាគមសេដ្ឋកិច្ចក្រៅប្រព័ន្ធដើម្បីសង្គម និងទំនាក់ទំនងរបស់កញ្ញា ស កន្និកា ជាមួយលោក តុន និមល និងបុគ្គលមួយចំនួនតាមបណ្តាញទំនាក់ទំនងហ្វេសប៊ុក ឬតេឡេក្រាម (Telegram)។
កញ្ញា កន្និកា ប្រាប់តុលាការថា ការបង្កើតសមាគមនោះ គឺគ្រាន់តែជាគម្រោងមិនទាន់មានប្រតិបត្តិការទេ ហើយគោលបំណងនៃការបង្កើតសមាគមនោះ គឺចង់ជួយធ្វើឲ្យជីវភាពរបស់អាជីវករមានភាពប្រសើរឡើង ដោយគ្មានចេតនាបង្កភាពវឹកវរក្នុងសង្គមទេ។
នៅពេលលោក លិ សុខា តាំងសំណួរពាក់ព័ន្ធនឹងការបង្កើតក្រុមមួយក្នុងប្រព័ន្ធតេឡេក្រាម ក្រោយការចាប់ខ្លួនលោក រ៉ុង ឈុន នោះ កញ្ញា ស កន្និកា បកស្រាយថា៖ «អ្វីដែលបង្កើតក្នុងតេឡេក្រាម គឺដើម្បីជួយលោកគ្រូ រ៉ុង ឈុន ព្រោះគាត់ជាមនុស្សដែលជួយសង្គមបានច្រើន ធ្វើឲ្យខ្ញុំគោរពគាត់ និងស្រឡាញ់គាត់ពីចម្ងាយ»។
លោក សុខា បន្តសំណួរថា៖ «លោកស្រីគាំទ្រសេចក្តីថ្លែងការណ៍របស់គាត់ទេ? លោកស្រីគាំទ្រទេ?»។
កញ្ញា កន្និកា ផ្តល់ការពន្យល់ថាដោយសាររវល់លក់ដូរ កញ្ញាមិនបានដឹងអំពីសេចក្តីថ្លែងការណ៍នោះទេ។
កញ្ញានិយាយថា៖ «ខ្ញុំអត់បានឃើញទេ។ ខ្ញុំជាអាជីវករ រវល់លក់ដូរ ខ្ញុំជំពាក់បំណុលធនាគារពីរឆ្នាំហើយ»។
លោក លិ សុខា បានបន្ថែមសំណួរថា៖ «លោកស្រីបានឃើញគេបង្ហោះទេ»? កញ្ញា កន្និកាឆ្លើយថា៖ «ឃើញ»។
លោក សុខា សួរបន្តថា៖ «មានបាន Share ទេ?»។
កញ្ញា ស កនិ្នកា ដែលបញ្ជាក់ប្រាប់ក្រុមប្រឹក្សាជំនុំជម្រះថា មានគណនីឈ្មោះ«កាកា តាខ្មៅ» [Kaka Takhmao] ទាំងក្នុងប្រព័ន្ធហ្វេសប៊ុក និងតេឡេក្រាមនោះ បានតបថា៖ «ពេលខ្លះshare ខ្លះអត់ ដោយសាររវល់ដែរ»។
តមកទៀត លោកចៅក្រម លិ សុខា បានដេញដោលសួរកញ្ញា ស កន្និកា អំពីទំនាក់ទំនងរវាងកញ្ញាជាមួយនឹងលោក តុន និមល ដែលកញ្ញា កន្និកា ថា ជាមិត្តភ័ក្ត និងការឆ្លើយឆ្លងគ្នាតាមប្រព័ន្ធបណ្តាញសង្គមនៅមុនពេលអាជ្ញាធរមានសមត្ថកិច្ចធ្វើការឃាត់ខ្លួនអ្នកទាំងពីរ។
អស់ពីរឿងសេចក្តីថ្លែងការណ៍នោះ តំណាងអយ្យការលោក សេង ហៀង បានជជីកសួរកញ្ញា កន្និកា ពាក់ព័ន្ធនឹងបញ្ហាព្រំដែន និងការចែករំលែកសេចក្តីថ្លែងការណ៍លោក រ៉ុង ឈុន តាមបណ្តាញសង្គម ប៉ុន្តែអាជីវករដ៏មមាញឹកនៅតាខ្មៅរូបនេះនិយាយថា កញ្ញាមិនបានចូលរួមក្នុងកិច្ចការព្រំដែននេះ។
កញ្ញា កន្និកា ក៏ត្រូវបានសួរដោយមេធាវីរបស់កញ្ញាគឺលោក សំ សុគង់ អំពីថាតើកញ្ញាធ្លាប់ចូលរួមតវ៉ាដើម្បីទាមទារឲ្យដោះលែងលោក រ៉ុង ឈុន និងអំពីសកម្មភាពនានាដែលកញ្ញាបានចូលរួមជាមួយលោក រ៉ុង ឈុន។
កញ្ញា កន្និកា បកស្រាយថា កញ្ញាចូលរួមខ្លះៗដែរ ដើម្បីទាមទារឲ្យអាជ្ញាធរដោះលែងលោក រ៉ុង ឈុន ព្រោះលោករ៉ុង ឈុនជាមនុស្សល្អសម្រាប់គ្រប់គ្នា ហើយថាលោករ៉ុង ឈុនតែងចុះជួយកម្មករដែលមានបញ្ហាការងារ។
នៅក្នុងអង្គសវនាការជាងបីម៉ោងនោះ ក្រុមប្រឹក្សាជំនុំជម្រះ ក៏ព្យាយាមឲ្យកញ្ញា កន្និកា បញ្ជាក់ថា កញ្ញាមានបានរៀបចំផែនការ និងកេណ្ឌមនុស្សឲ្យមកតវ៉ាទាមទារឲ្យមានការដោះលែងលោក រ៉ុង ឈុន។
លោក តុន និមល ក៏ត្រូវបានសួរសំណួរស្រដៀងគ្នានេះ។
ប៉ុន្តែជនជាប់ទាំងពីរ បានប្រកែកថា ពួកគេបានធ្វើសកម្មភាព តវ៉ាឲ្យមានការដោះលែងលោក រ៉ុង ឈុន នៅទីក្រុងភ្នំពេញតែពីរនាក់ប៉ុណ្ណោះ។
សម្រាប់លោក តុន និមល បានប្រាប់ក្រុមប្រឹក្សាជំនុំជម្រះថា លោកបានដឹងអំពីការចេញសេចក្តីថ្លែងការណ៍របស់លោក រ៉ុង ឈុន ពាក់ព័ន្ធនឹងបញ្ហាព្រំដែន និងដំណើរចុះទៅពិនិត្យព្រំដែនរបស់លោក រ៉ុង ឈុន នៅខេត្តត្បូងឃ្មុំតាមបណ្តាញសង្គមហ្វេសប៊ុក។
នៅពេលដែលមេធាវីមួយរូបរបស់រដ្ឋាភិបាលសួរលោកទៅវិញទៅមកអំពីសកម្មភាពរបស់លោក រ៉ុង ឈុនក្នុងបញ្ហាព្រំដែន និងសកម្មភាពផ្សេងទៀតនោះ លោក តុន និមល ឆ្លើយទាំងខឹងសម្បារថា៖ «ខ្ញុំអត់យល់ ខ្ញុំអត់ឆ្លើយ។ បើខ្ញុំយល់ ខ្ញុំឆ្លើយបាត់ហើយ»។
លោក អំ សំអាត នាយករងទទួលបន្ទុកឃ្លាំមើល និងការពារសិទ្ធិមនុស្សអង្គការលីកាដូ ថ្លែងជាមួយអ្នកកាសែតនៅក្រៅតុលាការក្រុងភ្នំពេញ ថ្ងៃទី៣ ខែកុម្ភៈ ឆ្នាំ២០២១។ (ហ៊ុល រស្មី/វីអូអេ)
នៅក្រៅតុលាការរាជធានីភ្នំពេញ លោក អំ សំអាត នាយករងទទួលបន្ទុកឃ្លាំមើលនៃអង្គការការពារសិទ្ធិមនុស្សលីកាដូ ប្រាប់អ្នកកាសែតថាតុលាការគួរមានការបែងចែកឲ្យច្បាស់លាស់រវាងការប្រព្រឹត្ត បទល្មើស និងការបញ្ចេញមតិរបស់ពលរដ្ឋ ដែលអាចធ្វើឡើងទៅតាមគ្រប់វិធី រួមមានប្រព័ន្ធបច្ចេកវិទ្យា ការនិយាយស្តីដោយផ្ទាល់ សិល្បៈគំនូរ ឬក៏ការបោះពុម្ពផ្សាយផ្សេងទៀតជាដើម។
លោកបន្ថែមថា៖ «ហើយបើសិនជាសិទ្ធិឯកជនត្រូវបានឃ្លាំមើលគ្រប់ទាំងអស់អាហ្នឹង ក៏វាមិនមែនហៅថា សេរីភាព ឯកជនដែរ ក៏ប៉ុន្តែបើសិនជាយើងមើលក្នុងការណ៍ដែលយកបណ្តាញទំនាក់ទំនងយកមកធ្វើជាភស្តុតាង បើយើងមើលទៅ ចម្លើយ ហាក់បីដូចជាអត់ទាន់ វាជាសិទ្ធិឯកជនរបស់គេ។ វាដូចជាមិន មិនជាមានពាក់ព័ន្ធជាមួយនឹងបទល្មើសដែលចោទប្រកាន់ហ្នឹងទេ»។
លោក សំ សុគង់ មេធាវីការពារក្តីឲ្យកញ្ញា ស កន្និកា និងលោក រ៉ុង ឈុន ប្រាប់វីអូអេតាមទូរស័ព្ទថា តុលាការព្យាយាមរកបន្ទុកបន្ថែមមកដាក់លើលោក រ៉ុង ឈុន ដោយផ្អែកលើការទាក់ទងគ្នាជាលក្ខណៈឯកជនរបស់កញ្ញា ស កន្និកា និងលោក តុន និមល ជាមួយបុគ្គលផ្សេងទៀតតាមបណ្តាញទាក់ទងអេឡិកត្រូនិកមកធ្វើជាភស្តុតាងគាំទ្រការចាប់ខ្លួន និងចោទប្រកាន់លោក រ៉ុង ឈុន។
«ការប្រើតេឡេក្រាម និងការ Share អីផ្សេងៗហ្នឹង ខ្ញុំគិតថា ដូចជាមិន ជាភស្តុតាងទេ ដោយសារប្រជាពលរដ្ឋខ្មែរយើងទាំងអស់ហ្នឹង នរណា ក៏គាត់ប្រើដែរហ្វេសប៊ុក ហើយshare នោះដែរ»។
មេធាវីការពារក្ដីរូបនេះបន្តថា៖ «ហើយការ Share ការ Like ខ្ញុំគិតថា វា មិនៗ ជាការបញ្ចេញគំនិតខ្លួនឯងទេ គ្រាន់តែយកព័ត៌មានរបស់អ្នកដទៃ យកទៅចែកចាយឲ្យគេ គ្រាន់តែឃើញ គ្រាន់តែមើល ហើយរបៀបសំខាន់ទាក់ទងនឹងបទល្មើសលុះត្រាតែមានចេតនា ដូចថាមានបំណង។ ហើយខ្ញុំគិតថា ការ Share ការ Like គឺជាគេហៅថា ការប្រើប្រាស់សិទ្ធិក្នុងការ សេរីភាពក្នុងការបញ្ចេញមតិច្រើនជាងអាយកមកជាបទល្មើស»។
បន្ទាប់ពីការសួរដេញដោលរបស់តុលាការក្រុងភ្នំពេញ នៅព្រឹកថ្ងៃពុធនេះ តុលាការលើកពេលបន្តសវនាការនៅថ្ងៃទី១៧ ខែកុម្ភៈ ឆ្នាំ២០២១ខាងមុខនេះ៕