អង្គការការពារសិទ្ធិសេរីភាពរបស់អ្នកសារព័ត៌មានអន្តរជាតិមួយ បានចេញសេចក្តីប្រកាសព័ត៌មានដោយរិះគន់សេចក្តីសម្រេចរបស់សាលាឧទ្ធរណ៍កម្ពុជា ដែលបានសម្រេចច្រានចោលបណ្តឹងសាទុក្ខរបស់អតីតអ្នកយកព័ត៌មានអាស៊ីសេរីពីររូប ដោយស្នើឲ្យសាលាឧទ្ធរណ៍នេះបដិសេធការស៊ើបអង្កេតបន្ថែមរបស់សាលាដំបូងរាជធានីភ្នំពេញលើបទចោទចារកម្មមកលើអ្នកទាំងពីរ។
គណៈកម្មការការពារអ្នកសារព័ត៌មាន ឬ Committee to Protect Journalists (CPJ) អះអាងថា ការបន្តកាត់ទោសលោក យាង សុធារិន្ទ និងលោក អ៊ួន ឈិន អតីតអ្នកយកព័ត៌មានអាស៊ីសេរីនេះ នឹងបន្តធ្វើឲ្យលទ្ធិប្រជាធិបតេយ្យនៅកម្ពុជាខូចខាតកាន់តែខ្លាំង។
លោក Shawn Crispin មន្ត្រីជាន់ខ្ពស់ទទួលបន្ទុកតំបន់អាស៊ីអាគ្នេយ៍ប្រចាំគណៈកម្មការ CPJ បានថ្លែងនៅក្នុងសេចក្តីប្រកាសព័ត៌មាន នៅថ្ងៃទី២៨ ខែមករានេះថា៖
«អាជ្ញាធរកម្ពុជាគួរតែឈប់ចាត់ទុកអ្នកយកព័ត៌មានលោក យាង សុធារិន្ទ និងលោក អ៊ួន ឈិន ដូចជាឧក្រិដ្ឋជនតទៅទៀត ហើយគួរតែទម្លាក់បទចោទប្រកាន់ក្លែងក្លាយមកលើអ្នកទាំងពីរ។ កាលណាការបៀតបៀនសិទ្ធិតាមផ្លូវច្បាប់លើអ្នកយកព័ត៌មានទាំងពីររូបនេះនៅតែបន្ត នោះភាពជឿទុកចិត្តបាននៃលទ្ធិប្រជាធិបតេយ្យរបស់កម្ពុជាដែលកំពុងតែរងការខូចខាតរួចហើយនោះ នឹងកាន់តែខូចខាតខ្លាំងជាងមុន»។
មន្ត្រី CPJ ជាន់ខ្ពស់រូបនេះបានថ្លែងដូច្នេះ នៅថ្ងៃអង្គារ ក្រោយពេលដែលសាលាឧទ្ធរណ៍បានសម្រេចច្រានចាលការស្នើសុំរបស់មេធាវីលោក យាង សុធារិន្ទ និងលោក អ៊ួន ឈិន ឲ្យសាលាឧទ្ធរណ៍បដិសេធសេចក្តីសម្រេចរបស់តុលាការរាជធានីភ្នំពេញ ដែលមានបំណងស៊ើបអង្កេតបន្ថែមទៀតលើបុរសទាំងពីរ ពីបទចារកម្ម។
អតីតអ្នកសារព័ត៌មានអាស៊ីសេរីទាំងពីររូប ត្រូវបានសមត្ថកិច្ចចាប់ និងឃុំខ្លួន កាលពីថ្ងៃទី១៤ ខែវិច្ឆិកា ឆ្នាំ២០១៧ ដោយតុលាការចោទប្រកាន់ថា ពួកគេទាំងពីរបានផ្តល់ព័ត៌មានឲ្យរដ្ឋបរទេសដែលអាចបង្កឲ្យប៉ះពាល់ដល់សន្តិសុខជាតិ។ បច្ចុប្បន្ន ពួកគេទាំងពីរកំពុងស្ថិតនៅក្រៅមន្ទីរឃុំឃាំងបណ្តោះអាសន្ន ក្រោមការឃ្លាំមើលរបស់តុលាការ បន្ទាប់ពីត្រូវបានឃុំខ្លួនក្នុងពន្ធនាគារព្រៃស អស់រយៈពេលជិតដប់ខែ។
កាលពីថ្ងៃទី២៦ ខែកក្កដា ឆ្នា២០១៩កន្លងទៅ លោក អ៊ួន ឈិន និងលោក យាង សុធារិន្ទ ត្រូវបានតុលាការកាត់ទោស តែមិនមានការប្រកាសសាលក្រម។ កាលពីថ្ងៃទី៣ ខែតុលា ឆ្នាំ២០១៩ តុលាការបានបង្គាប់ឲ្យស៊ើបអង្កេតសំណុំរឿងពួកគេឡើងវិញ ដោយមិនកំណត់ថ្ងៃបើកសវនាការ ដោយគ្រាន់តែបញ្ជាក់ថា សំណុំរឿងនេះមិនទាន់មានព័ត៌មានគ្រប់គ្រាន់ និងត្រូវការពេលវេលាសម្រាប់បន្តការស៊ើបអង្កេត៕