ការពន្យារពេលកាត់ទោសផលិតករភាពយន្ត ជនជាតិអូស្ត្រាលី លោក James Ricketson វ័យ៦៩ឆ្នាំរូបនេះ សម្រេចកាលពីថ្ងៃសុក្រទី១៥ តាមសំណើរបស់លោកផ្ទាល់។ លោកបាននិយាយថាក្រុមមេធាវីនៅមិនទាន់បានឃើញពាក្យបណ្តឹងប្រឆាំងនិងលោក ឬក៏មានភស្តុតាងតិចតួចបំផុតក្នុងការចោទប្រកាន់ប្រឆាំងទៅនឹងរូបលោក។ លោកបានប្រាប់ទៅកាន់តុលាការតាមសម្តីដើមថា៖
«វាគឺជាសិទ្ធិរបស់ខ្ញុំស្របតាមផ្លូវច្បាប់នៃប្រទេសកម្ពុជា ក្នុងការទទួលបាននូវភស្តុតាងនៃទោសកំហុសរបស់ខ្ញុំ។ ដើម្បីឲ្យខ្ញុំអាចបង្កើតនូវការការពារចំពោះមុខតុលាការបាន។ ក្នុងអំឡុងពេលមួយឆ្នាំកន្លងមកនេះ ខ្ញុំមិនបានទទួលភស្តុតាងណាមួយឡើយ»។
លោក Ricketson ត្រូវបានចាប់ឃុំខ្លួននៅក្នុងខែមិថុនា ឆ្នាំ២០១៧ បន្ទាប់ពីលោកបានបង្ហោះដ្រូនដើម្បីថតបាតុកម្មរបស់គណបក្សសង្គ្រោះជាតិ ដែលជាគណបក្សប្រឆាំង។ គណបក្សប្រឆាំងនេះ ត្រូវបានរំលាយកាលពីចុងឆ្នាំមុនដោយចោទថាមានបំណងផ្តួលរំលំរដ្ឋាភិបាលនៅមុនការបោះឆ្នោតថ្នាក់ជាតិចូលមកដល់នៅក្នុងខែកក្តដាខាងមុខនេះ។
អ្នកផលិតភាពយន្តឯកសារសញ្ជាតិអូស្ត្រាលី លោក James Ricketson ដែលមន្ត្រីជាន់ខ្ពស់របស់រដ្ឋាភិបាលកម្ពុជាចោទថាជា អ្នកផ្តល់ព័ត៌មានសម្ងាត់ដល់លោក សម រង្ស៊ី ត្រូវបានមន្ត្រីពន្ធនាគារនាំយកមកបង្ហាញខ្លួន នៅតុលាការកំពូលនៅព្រឹកថ្ងៃពុធ ទី១៧ ខែមករា ឆ្នាំ២០១៨។ (ហ៊ុល រស្មី/VOA)
លោក Ricketson ត្រូវបានចោទប្រកាន់ពីបទចារកម្ម ដែលបានចែងក្នុងមាត្រា៤៤៦នៃក្រមព្រហ្មទណ្ឌកម្ពុជា។ មាត្រា៤៤៦ហាមឃាត់ការប្រមូលព័ត៌មាន ដែលមានផលប៉ះពាល់ដល់សន្តិសុខជាតិ។ លោកប្រឈមនឹងការជាប់ពន្ធនាគារ១០ឆ្នាំប្រសិនបើរកឃើញថាមានទោស។
លោកព្រះរាជអាជ្ញា សៀង សុខ បានបញ្ជាក់ថាលោក Ricketson នឹងត្រូវកាត់ទោសស្របតាមមាត្រា៤៤៦ ប៉ុន្តែលោកមិនបានបញ្ជាក់ព័ត៌មានបន្ថែមពីបទចោទជាក់លាក់លើជនជាតិអូស្រាលីរូបនេះនោះទេ។
លោក Ricketson បានប្រាប់តុលាការថា តាំងពីលោកត្រូវបានចាប់ខ្លួនមក លោកបានឃើញតែឯកសារកម្រាស់១១ទំព័រតែប៉ុណ្ណោះដែលត្រូវជាមួយនឹងរបាយការណ៍របស់នគរបាល និងសារអ៊ីមែល ចំនួន២៥ ដែលបានទាញយកពីកុំព្យូទ័ររបស់លោក ដែលឯកសារទាំងនេះបានចងក្រងដោយចៅក្រមស៊ើបសួរ ពេជ្រ វិជ្ជាធរ។
ចៅក្រមស៊ើបសួរលោក ពេជ្រ វិជ្ជាធរ មិនបានផ្តល់ការអត្ថាធិប្បាយណាមួយឡើយដល់ VOA កាលពីថ្ងៃសុក្រ ទី១៥ ខែមិថុនា ពាក់ព័ន្ធនឹងព័ត៌មានលម្អិតអំពីបទចោទប្រកាន់ប្រឆាំងទៅនឹងលោក Ricketson ដោយរុញឲ្យទៅសួរ អ្នកនាំពាក្យតុលាការ។
លោកលី សុផាន់ណា ក៍បានបដិសេធមិនធ្វើការអត្ថាធិប្បាយណាមួយដែរ។ ការស៊ើបអង្កេតរបស់ចៅក្រមស៊ើបសួរលោក ពេជ្រ វិជ្ជាធរ បានបិទបញ្ចប់កាលពីចុងខែមុន។ ប៉ុន្តែលោក Ricketson ក៍បានប្រាប់តុលាការផងដែរថា លោកមិនបានទទួលដីកាកោះហៅ ឬក៏ដីកាចោទប្រកាន់ណាមួយនោះទេមុនពេលសវនការ។
អ្នកតំណាងរបស់ស្ថានទូតអូស្រាលីដែលបានទៅចូលរួមនៅក្នុងការជំនុំជម្រះនេះ បានបដិសេធមិនផ្តល់ការអត្ថាធិប្បាយណាមួយឡើយ។
ចៅក្រមជំនុំជម្រះ លោក សេង លាង បានទទួលស្គាល់សិទ្ធិស្របច្បាប់របស់លោក Ricketson ក្នុងការមើលសំណុំរឿង ហើយលោកបានប្រាប់ថាកាលបរិច្ឆេទសវនការថ្មី នឹងត្រូវកំណត់ក្នុងអំឡុងពេលតិចជាងមួយខែ។
លោក Ricketson ជាប់ឃុំឃាំងនៅក្នុងពន្ធនាគាររួមជាមួយអ្នកទោសចំនួនជាង១២០នាក់ផ្សេងទៀត រហូតដល់ពេលដែលលោកត្រូវបានបញ្ជូនទៅកន្លែងសម្រាកព្យាបាលជំងឺកាលពីចុងខែមុន។ គ្រួសាររបស់លោកបានប្រាប់ថាសុខភាពរបស់លោកបានធ្លាក់ចុះយ៉ាងខ្លាំង៕
ប្រែសម្រួលដោយ យូ សុធារី