រដ្ឋាភិបាលកម្ពុជាបានប្រកាសដាក់ឱ្យអនុវត្តគោលការណ៍ណែនាំស្តីពីកិច្ចការពារកុមារលើប្រព័ន្ធអនឡាញសម្រាប់ក្រុមហ៊ុនបចេ្ចកវិទ្យាឌីជីថល ដើម្បីធានាសុវត្ថិភាពកុមារលើប្រព័ន្ធអនឡាញ។ នេះបើតាមសេចក្ដីប្រកាសព័ត៌មានមួយរបស់អង្គការយូនីសេហ្វ (Unicef) ចុះថ្ងៃទី ៦ ខែកក្កដា ឆ្នាំ ២០២៣។
អង្គការយូនីសេហ្វបានសហការជាមួយក្រសួងប្រៃសណីយ៍ និងទូរគមនាគមន៍ ដើម្បីធ្វើកិច្ចការនេះ។ បើតាមសេចក្តីប្រកាសព័ត៌មាន គោលការណ៍ណែនាំស្តីពីកិច្ចការពារកុមារលើប្រព័ន្ធអនឡាញនេះលើកទឹកចិត្តឱ្យបណ្តាក្រុមហ៊ុនបច្ចេកវិទ្យាឌីជីថលដែលពាក់ព័ន្ធ បណ្តាញទំនាក់ទំនងសង្គមនានាក្នុងវិស័យនេះ ចូលរួមទប់ស្កាត់ បង្កើនសុវត្ថិភាព និងឆ្លើយតបឱ្យបានទាន់ពេលវេលាចំពោះគ្រោះថ្នាក់ដែលកំពុងកើតមានក្នុងទម្រង់ថ្មីៗ ដែលកើតចេញពីការប្រើប្រាស់បច្ចេកវិទ្យា ឱ្យស្របទៅតាមសិទ្ធិកុមារ និងស្តង់ដារក្រមសីលធម៌ខ្ពស់បំផុត។
លោក មាស ប៊ុនលី មន្ត្រីជំនាញផ្នែកទំនាក់ទំនងនៃអង្គការយូនីសេហ្វកម្ពុជា ថ្លែងថាការប្រើប្រាស់បណ្ដាញប្រព័ន្ធអនឡាញកើនឡើងខ្លាំងនៅកម្ពុជា អំឡុងពេលការរាតត្បាតជំងឺកូវីដ ដែលវាផ្ដល់ផលងាយស្រួលសម្រាប់ការសិក្សារបស់កុមារ។ ប៉ុន្តែលោកសង្កេតឃើញថា មានផលអវិជ្ជមានមួយចំនួន ដោយកុមារបានក្លាយជាជនរងគ្រោះពីជនឆ្លៀតឱកាស តាមរយៈការសម្លុតគំរាមតាមប្រព័ន្ធអនឡាញក្នុងទម្រង់ផ្សេងៗគ្នា។
លោកប្រាប់វីអូអេថា៖ «អ៊ីចឹងករណីទាំងអស់ហ្នឹង វាអាចជាការផ្ញើរូបភាពឱ្យកុមារនូវរូបភាពមិនសមរម្យ អាសអាភាស ឬក៏ការធ្វើឱ្យគ្នាមានភាពអាម៉ាសនៅលើអនឡាញជាដើម ការគំរាមគ្នាជាដើម ទាំងអស់ហ្នឹង វាធ្វើឱ្យប៉ះពាល់យ៉ាងខ្លាំងទៅដល់សតិអារម្មណ៍កុមារ និងសុវត្ថិភាពកុមារ បានន័យថា ជាកន្លែងដែលគាត់រៀនសូត្រ ដែលគាត់ត្រូវរីកចម្រើនទាក់ទងគ្នា ក៏អាចជាកន្លែងដែលគាត់ត្រូវបានគេរំលោភបំពានធ្វើបាបដែរ»។
ខណៈការប្រើប្រាស់ប្រព័ន្ធអនឡាញផ្តល់នូវឱកាសទំនាក់ទំនងគ្មានដែនកំណត់ដល់មនុស្សគ្រប់វ័យ កុមារដែលមានកម្រិតនៃការយល់ដឹងតិចតួចអំពីប្រព័ន្ធអនឡាញបានក្លាយជាមុខសញ្ញាដ៏សំខាន់សម្រាប់ជនឆ្លៀតឱកាសកេងប្រវ័ញ្ចតាមប្រព័ន្ធអនឡាញ។ នេះបើតាមលោក មាស ប៊ុនលី។
មន្ត្រីជំនាញរូបនេះជំរុញឱ្យមានការចូលរួមយកចិត្តទុកដាក់ ជាពិសេសពីឪពុកម្ដាយ បណ្ដាក្រុមហ៊ុនដែលពាក់ព័ន្ធនឹងបណ្ដាញទំនាក់ទំនងសង្គម អ្នកផលិតមាតិកា និងក្រសួងពាក់ព័ន្ធនានា ត្រូវចាត់វិធានការរហ័សក្នុងការទប់ស្កាត់នូវការគំរាមកំហែងណាមួយដែលអាចកើតឡើងលើកុមារតាមប្រព័ន្ធអ៊ិនធឺណិត។ លោកសង្ឈឹមថា គោលការណ៍នេះជាជំហានដ៏ធំមួយ ដើម្បីការពារកុមារកម្ពុជាលើប្រព័ន្ធអនឡាញ ដែលមានការចូលរួមពិភាក្សាពីអ្នកជំនាញមកពីគ្រប់ស្ថាប័ន។
រូបឯកសារ៖ សិស្សមួយក្រុមដើរនៅក្នុងបរិវេណវិទ្យាល័យមួយក្នុងរាជធានីភ្នំពេញអំឡុងថ្ងៃដំបូងនៃបវេសនកាលឆ្នាំសិក្សា២០២០-២០២១ នៅរាជធានីភ្នំពេញ កាលពីថ្ងៃទី១១ ខែមករា ឆ្នាំ ២០២១។ (ទុំ ម្លិះ/វីអូអេ)
របាយការណ៍ដែលមានចំណងជើង «ការបញ្ឈប់គ្រោះថ្នាក់ក្នុងប្រទេសកម្ពុជា» របស់អង្គការយូនីសេហ្វ បង្ហាញថា ក្នុងចំណោមកុមារកម្ពុជា ១០ នាក់ ដែលមានអាយុចន្លោះពី ១២ ទៅ ១៧ ឆ្នាំ កុមារលើសពីម្នាក់បានទទួលរងការកេងប្រវ័ញ្ច ឬការរំលោភបំពានផ្លូវភេទតាមប្រព័ន្ធអនឡាញក្នុងទម្រង់ណាមួយ។
អ្នកផលិតមាតិកាឌីជីថល លោក ជី សុផាត សាទរចំពោះការដាក់ឱ្យអនុវត្តគោលការណ៍នេះ ដែលអាចជួយកាត់បន្ថយភាពងាយរងគ្រោះរបស់កុមារលើប្រព័ន្ធអនឡាញ ខណៈកន្លងទៅមានការលួងលោមបោកបញ្ឆោតកុមារក្នុងទម្រង់ផ្សេងៗបានកើតឡើងជាហូរហែលើប្រព័ន្ធបណ្ដាញសង្គមអនឡាញ។
លោកថ្លែងថា៖ «អ៊ីចឹងក្រសួងសមត្ថកិច្ចគាត់គួរតែមានការអនុវត្តឱ្យបានត្រឹមត្រូវទៅ ខ្ញុំគិតថាជាផ្នែកមួយដែលអាចជួយទៅកុមារជាច្រើនផ្សេងទៀតដែរ ក្រៅពីហ្នឹងមានអង្គការពាក់ព័ន្ធឬអាណាព្យាបាល ដែលជាពិសេសគាត់គួរតែចូលរួមក្នុងយុទ្ធនាការហ្នឹងបន្ថែមដែរ»។
អ្នកស្រី តាន់ សុដានី ប្រធាននាយកដ្ឋានគោលនយោបាយនៃក្រសួងប្រៃសណីយ៍ និងទូរគមនាគមន៍ ប្រាប់វីអូអេតាមប្រព័ន្ធតេឡេក្រាមនៅថ្ងៃសុក្រនេះថា តាមរយៈការសិក្សាស្រាវជ្រាវ និងធ្វើកិច្ចសម្ភាសផ្ទាល់ជាមួយកុមារកម្ពុជាដែលមានអាយុចន្លោះពី ១២ ដល់ ១៧ ឆ្នាំ អំពីការប្រើប្រាស់អ៊ីនធឺណិតរបស់ពួកគេ បានរកឃើញថា កុមារប្រមាណ ៩% ធ្លាប់ទទួលនូវសារទំនាក់ទំនងតាមប្រព័ន្ធឌីជីថលដែលគេប្រើប្រាស់ ដើម្បីស្នើសុំឱ្យចែករំលែករូបភាពមិនសមរម្យ ដោយបង្ហាញផ្នែកឯកជននៃរាងកាយរបស់ខ្លួន។
ដោយមើលឃើញពីហានិភ័យនៃគ្រោះថ្នាក់លើប្រព័ន្ធអនឡាញចំពោះកុមារ អ្នកស្រីថា ក្រសួងប្រៃសណីយ៍បានរៀបចំគោលការណ៍នេះឡើង ដើម្បីឱ្យក្រុមហ៊ុនបច្ចេកវិទ្យាឌីជីថលនៅក្នុងស្រុកទាំងអស់ អនុវត្តនូវវិធានសំខាន់ៗ ៦ ចំណុចរួមមានការវាយតម្លៃផលប៉ះពាល់សិទ្ធិកុមារនៅក្នុងប្រព័ន្ធក្រុមហ៊ុនអនឡាញ ការដាក់បញ្ចូលការគោរពសិទ្ធិកុមារនៅក្នុងប្រតិបត្តិការអាជីវកម្ម លើកកម្ពស់ការយល់ដឹងអក្ខរកម្មឌីជីថល និងបង្កើតបរិស្ថានសុវត្ថិភាពលើប្រព័ន្ធអនឡាញ ដែលជាផ្នែកមួយដ៏សំខាន់ក្នុងការកាត់បន្ថយគ្រោះថ្នាក់លើកុមារ។
អ្នកស្រីបន្ដថា កិច្ចការពារដែលមានប្រសិទ្ធភាព គឺទាមទារការចូលរួមពីគ្រប់ភាគីពាក់ព័ន្ធជាច្រើន ដូចជាឪពុកម្តាយ អាណាព្យាបាល គ្រូបង្រៀន ដែលត្រូវមានការយល់ដឹងពីសុវត្ថិភាពប្រព័ន្ធអនឡាញ ដែលអាចការពារ និងឆ្លើយតបទៅនឹងហានិភ័យដែលអាចកើតឡើងលើប្រព័ន្ធអនឡាញបានភ្លាមៗ។
មន្ត្រីជំនាញរូបនោះឱ្យដឹងទៀតថាកន្លងទៅ ក្រសួងក៏ធ្លាប់បានសហការជាមួយក្រសួងអប់រំក្នុងការរៀបចំយុទ្ធនាការលើកកម្ពស់ការយល់ដឹង និងបង្កើតវគ្គបណ្តុះបណ្តាលខ្លីៗអំពីសុវត្ថិភាពតាមប្រព័ន្ធអនឡាញដល់សិស្សវិទ្យាល័យផងដែរ ហើយជាជំហានបន្ទាប់ ក្រសួងនឹងរៀបចំវគ្គបណ្តុះបណ្តាលដល់ក្រុមហ៊ុនបច្ចេកវិទ្យាឌីជីថលទាំងអស់ ដើម្បីយល់ឱ្យបានស៊ីជម្រៅអំពីវិធីសាស្រ្តអនុវត្ត និងការប្រើប្រាស់ឧបករណ៍ផ្សេងៗ ដូចដែលមានចែងក្នុងគោលការណ៍។
បើតាមគោលការណ៍ណែនាំដែលវីអូអេទទួលបាន ក្រុមហ៊ុនបច្ចេកវិទ្យាឌីជីថលត្រូវដាក់ចេញឱ្យបានច្បាស់លាស់នូវលក្ខខណ្ឌនៃការប្រើប្រាស់ ដែលហាមប្រាមមាតិកាឬសកម្មភាពទាំងឡាយណា ដែលអាចបង្កើតឱ្យមានរូបភាពសម្ភារៈរំលោភបំពានកុមារឬកេងប្រវ័ញ្ចនិងរំលោភបំពានផ្លូវភេទកុមារតាមប្រព័ន្ធអនឡាញ។ ចំណែកប្រតិបត្តិករផ្តល់សេវាអ៊ីនធឺណិតត្រូវបិទការចូលប្រើប្រាស់ URLs ខុសច្បាប់ទាំងឡាយណា ដែលបញ្ជាក់ដោយអាជ្ញាធរកម្ពុជា និងអង្គភាពអនុវត្តច្បាប់អន្តរជាតិ៕