វ៉ាស៊ីនតោន៖ សាលាក្តីខ្មែរក្រហមចាប់ផ្តើមចាត់វិធានការលើសំណុំរឿងខ្មែរក្រហម០០៤ដែលរដ្ឋាភិបាលបានជំទាស់។ អ្នកឃ្លាំមើលខ្លះចាត់ទុកថា ការបង្ហាញពីទីតាំងឧក្រិដ្ឋកម្មមួយចំនួនដល់សាធារណជននិងជនរងគ្រោះ បន្ទាប់ពីសំណុំរឿងនេះត្រូវជាប់គាំងដំណើរជាច្រើនឆ្នាំនេះជាសញ្ញាវិជ្ជមាន។
សហចៅក្រមស៊ើបអង្កេតនៃសាលាក្តីកាត់ទោសខ្មែរក្រហមនៅថ្ងៃពុធនេះបានបង្ហាញទីតាំងឧក្រិដ្ឋកម្មសំណុំរឿង០០៤ មួយចំនួនដល់សាធារណជន និងជនរងគ្រោះបន្ទាប់ពីគាំងដំណើរតាំងពីឆ្នាំ២០០៨ ដែលក្រុមអ្នកឃ្លាំមើលខ្លះ ចាត់ទុកថា ការបង្ហាញទីតាំងនេះអាចផ្តល់ឱកាសដល់ជនរងគ្រោះអាចដាក់ពាក្យប្តឹងជនជាប់ចោទបាន។
នៅក្នុងសេចក្តីប្រកាសព័ត៌មានមួយរបស់សហចៅក្រមស៊ើបអង្កេតលោក ម៉ាក ហាមិន (Mark Harmon) ភាគីអង្គការសហប្រជាជាតិ បានបញ្ជាក់ពីទីតាំងកាប់សម្លាប់សម័យខ្មែរក្រហម ភាគច្រើនជាមន្ទីរសន្តិសុខ។ ក្នុងនោះគឺខេត្តបាត់ដំបងមាន៣ទីតាំងគឺស្ថិតក្នុងស្រុកបាណន់និងស្រុកគាស់ក្រឡ។ ខេត្តពោធិ៍សាត់មាន៥ទីតាំង ស្ថិតក្នុងស្រុកបាកាន និងស្រុកកណ្តៀង។ ខេត្តតាកែវមាន៤ទីតាំងស្ថិតនៅក្នុងស្រុកកោះអណ្តែត គីរីវង្ស និងត្រាំកក់។ ខេត្តកំពង់ធំមួយកន្លែងក្នុងទីរួមខេត្តកំពង់ធំ។ ហើយខេត្តកំពង់ចាមមួយកន្លែងស្ថិតក្នុងស្រុកចម្ការលើ។
សហចៅក្រមស៊ីបអង្កេតទាំងពីរបានបញ្ជាក់ថា៖
«សាក្សីឬជនរងគ្រោះដែលមានព័ត៌មានទាក់ទងនឹងទីតាំងឧក្រិដ្ឋកម្មខាងលើទាំងនេះ អាចទាក់ទងអង្គភាពគាំពារជនរងគ្រោះនៃអង្គជំនុំជម្រះវិសាមញ្ញក្នុងតុលាការកម្ពុជា ដើម្បីទទួលព័ត៌មានបន្ថែមអំពីភស្តុតាង និងលក្ខខណ្ឌដែលអាចដាក់ពាក្យធ្វើជាដើមបណ្តឹងរដ្ឋប្បវេណី»។
លោក នេត្រ ភក្ត្រា អ្នកនាំពាក្យសាលាក្តីកាត់ទោសខ្មែរក្រហមបានអះអាងថា៖
«ការចេញទីតាំងឧក្រិដ្ឋកម្មហ្នឹងគឺដើម្បីជូនដំណឹងទៅឲ្យជនរងគ្រោះ ឬក៏អ្នកពាក់ព័ន្ធនានាដែលចង់ក្លាយខ្លួនជាដើមបណ្តឹងរដ្ឋប្បវេណីក្នុងសំណុំរឿងហ្នឹង ហើយ និងជនណាខ្លះដែលគាត់ចង់ធ្វើសាក្សីអីចឹងទៅ។ ហើយដំណើរការ ស៊ើបអង្កេតស្ថិតនៅជាការសម្ងាត់»។
ចំណែកលោក អ៊ឹម សុភា ប្រធានកម្មវិធីផ្សព្វផ្សាយនៃអង្គភាពជនរងគ្រោះរបស់សាលាក្តីខ្មែរក្រហមបានអះអាងថា មកដល់ពេលនេះមានអ្នកដាក់ពាក្យប្តឹងតាំងខ្លួនជាដើមបណ្តឹងរដ្ឋប្បវេណីចំនួន៨៤៧នាក់ ដើម្បីតតាំងជាមួយជនជាប់ចោទ ហើយគ្មានអ្នកដាក់ពាក្យប្តឹងផ្នែកព្រហ្មទណ្ឌជាធម្មតានៅឡើយទេ។ តែលោកគិតថា ការប្រកាសរបស់សហចៅក្រមស៊ើបអង្កេតរឿងទីតាំងឧក្រិដ្ឋកម្មនេះនឹងជួយដល់ដំណើរការនីតិវិធី។
«តាមពិតការបង្ហាញនូវព័ត៌មានបន្ថែមបែបនេះនឹងជួយទៅដល់សាធារណជន ក៏ដូចជាជនរងគ្រោះបានយល់ដឹងបន្ថែមទៀត»។
ដោយឡែក លោក យុ ឆាំង ប្រធានមជ្ឃមណ្ឌលឯកសារកម្ពុជាវិញបានអះអាងថា សេចក្តីថ្លែងការណ៍របស់សហចៅក្រមស៊ើបអង្កេតជាការខិតខំរបស់តុលាការ។
«ខ្ញុំគិតថាខាងតុលាការព្យាយាមដោះស្រាយបញ្ហានេះទៅតាមនីតិវិធីដើម្បីឲ្យលទ្ធផលដែលសម្រេចបានចុងក្រោយ យើងអាចទទួលបានទាំងអស់គ្នា។ ហើយខ្ញុំគិតថា វាជាសញ្ញាវិជ្ជមាន»។
នៅក្នុងសំណុំរឿង០០៤ មានជនជាប់ចោទចំនួន៣នាក់ គឺលោក យឹម ទិត ឬតាទិតលោក អោម អាន ឬតាអាន និងអ្នកស្រី អ៊ឹម ចែម ដែលជាអតីតកម្មាភិបាលខ្មែរក្រហម ដែលត្រូវសហព្រះរាជអាជ្ញាចោទប្រកាន់តាំងពីខែវិច្ឆិកាឆ្នាំ២០០៨ ថាមានជាប់ពាក់ព័ន្ធនឹងការកាប់សម្លាប់ក្នុងទសវត្សរ៍១៩៧០ ពេលពួកកម្មាភិបាលទាំងនេះគ្រប់គ្រងក្នុងតំបន់ពាយ័ព្យប្រទេស តំបន់មជ្ឈឹម និងតំបន់ដទៃទៀត។ ជនជាប់ចោទពីរនាក់ គឺអ្នកស្រីអ៊ឹម ចែម និងតាអាន បានបដិសេធថា មិនជាប់ពាក់ព័ន្ធនឹងការកាប់សម្លាប់ទេក្នុងកិច្ចសម្ភាសន៍ជាពិសេសជាមួយវីអូអេជាបន្តបន្ទាប់។
សាលាក្តីកាត់ទោសខ្មែរក្រហមដែលចូលរួមដោយអ.ស.ប.ក៏បានតែងតាំងសហមេធាវីដល់សំណុំរឿង០០៣ ផងដែរនៅសប្តាហ៍នេះ ដែលដំណើរការរំកិលទៅមុខនៃសំណុំរឿងទាំងពីរដែលលោកនាយករដ្ឋមន្ត្រីហ៊ុន សែនធ្លាប់បដិសេធដាច់អហង្កានេះ កើតឡើងក្រោយពេលដែលសហចៅក្រមស៊ើបអង្កេតអ.ស.ប. សញ្ជាតិអាមេរិក លោកម៉ាក ហាមិន ត្រូវបានតែងតាំងកាលពីខែមិថុនា។ លោក ម៉ាក ហាមិនត្រូវបានត្រូវតែងតាំងជំនួសសហចៅក្រមបរទេសមុនៗដែលបានលាឈប់ពីមុខតំណែងដោយសារតែមិនអាចដំណើរការសំណុំរឿងសេសសល់ទាំងពីរបាននៅពេលមានការជ្រៀតជ្រែកផ្នែកនយោបាយ៕