នៅក្នុងដំណើរទស្សនកិច្ចលើកដំបូងរបស់លោកនាយករដ្ឋមន្រ្តី ហ៊ុន ម៉ាណែត ទៅកាន់ទីក្រុងតូក្យូ កម្ពុជានិងជប៉ុនបានប្តេជ្ញាពង្រឹងទំនាក់ទំនងនិងកិច្ចសហប្រតិបត្តិការរវាងប្រទេសទាំងពីរឱ្យកាន់តែស៊ីជម្រៅនិងគ្រប់ជ្រុងជ្រោយ។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ចុះថ្ងៃទី ១៨ ខែធ្នូ ឆ្នាំ ២០២៣។
រដ្ឋមន្ត្រីការបរទេសកម្ពុជា លោក សុខ ចិន្តាសោភា និងប្រមុខការទូតជប៉ុន អ្នកស្រី កាមិកាវ៉ា យ៉ូកុ (Kamikawa Yoko) បានជួបគ្នា កាលពីថ្ងៃទី ១៧ ខែធ្នូ ឆ្នាំ ២០២៣ នៅអំឡុងពេលដែលរដ្ឋមន្ត្រីការបរទេសកម្ពុជាចូលរួមកិច្ចប្រជុំកំពូលរំឭកខួបអនុវស្សាវរីយ៍អាស៊ាន-ជប៉ុន ដើម្បីអបអរខួប ៥០ ឆ្នាំនៃមិត្តភាពនិងកិច្ចសហប្រតិបត្តិការរវាងអាស៊ាន-ជប៉ុន។
ក្រសួងការបរទេសកម្ពុជាបញ្ជាក់ថា៖ «រដ្ឋមន្ត្រីការបរទេសទាំងពីរបានបញ្ជាក់សាជាថ្មីនូវការប្តេជ្ញាចិត្តបន្តពង្រឹង និងពង្រីកបន្ថែមនូវទំនាក់ទំនងទ្វេភាគី និងកិច្ចសហប្រតិបត្តិការពហុវិស័យដែលកំពុងរីកចម្រើនរវាងប្រទេសទាំងពីររួមមានវិស័យនយោបាយ សេដ្ឋកិច្ច ហេដ្ឋារចនាសម្ព័ន្ធ ការពារជាតិ និងសន្តិសុខ ការបោសសម្អាតមីន ប្រតិបត្តិការរក្សាសន្តិភាព ការផ្លាស់ប្តូររវាងប្រជាជននិងប្រជាជន ការអភិវឌ្ឍធនធានមនុស្ស ការអភិវវឌ្ឍឌីជីថល និងសន្តិសុខអ៊ីនធឺណិត»។
បើនិយាយពីក្របខណ្ឌអន្តរជាតិវិញ ភាគីទាំងពីរបានឯកភាពពង្រឹងកិច្ចសហប្រតិបត្តិការរវាងប្រទេសទាំងពីរបន្ថែមទៀត នៅក្នុងក្របខណ្ឌតំបន់និងអន្តរជាតិ រួមមានអង្គការសហប្រជាជាតិ និងអាស៊ាន-ជប៉ុន។
យោងតាមលទ្ធផលនៃកិច្ចប្រជុំកំពូលរំឭកខួបអនុស្សាវរីយ៍ ដើម្បីអបអរសារទរឆ្នាំទី ៥០ នៃមិត្តភាពនិងកិច្ចសហប្រតិបត្តិការអាស៊ាន-ជប៉ុន នាយករដ្ឋមន្ត្រីកម្ពុជា លោក ហ៊ុន ម៉ាណែត វាយតម្លៃខ្ពស់ចំពោះទំនាក់ទំនងកម្ពុជា-ជប៉ុន ដែលជាសក្ខីភាពបង្ហាញពីភាពរឹងមាំផ្អែកលើសាមគ្គីភាពក្នុងភាពចម្រុះ និងបានបញ្ជាក់ពីភាពចាំបាច់ក្នុងការរួមគ្នាបង្ហាញនូវកម្លាំងនៃសន្តិភាព ដើម្បីធានាថា តំបន់អាស៊ីប៉ាស៊ីហ្វិកនឹងមិនក្លាយជាវេទិកាថ្មីមួយទៀតនៃជម្លោះប្រដាប់អាវុធ។
បើតាមសេចក្តីប្រកាសព័ត៌មានដដែល លោក ហ៊ុន ម៉ាណែត បានស្នើឱ្យមានការយកចិត្តទុកដាក់បន្ថែមទៀតលើការអភិវឌ្ឍធនធានមនុស្ស ជាពិសេសតាមរយៈកម្មវិធីអប់រំ និងការបង្កើតនូវការយល់ដឹងទូលំទូលាយរួមទាំងការគាំទ្រដល់វិស័យវប្បធម៌ សិល្បៈ និងកម្មវិធីផ្លាស់ប្តូរទំនាក់ទំនងយុវជនអាស៊ីបូព៌ា ដើម្បីពង្រឹងសមត្ថភាពនិងភាពធន់របស់យុវជន។
នាយករដ្ឋមន្ត្រីកម្ពុជាលោក ហ៊ុន ម៉ាណែត និងភរិយាគឺលោកស្រី ពេជ្រ ច័ន្ទមុន្នី ថតរូបជាមួយនាយករដ្ឋមន្ត្រីជប៉ុនលោក Fumio Kishida និងភរិយាគឺលោកស្រី Yuko Kishida នៅទីក្រុងតូក្យូ ប្រទេសជប៉ុន កាលពីថ្ងៃទី១៦ ខែធ្នូ ឆ្នាំ២០២៣។
នាយករដ្ឋមន្ត្រីកម្ពុជាក៏បានគាំទ្រគំនិតផ្តួចផ្តើមសហបង្កើតឧស្សាហកម្មយានយន្តជំនាន់ថ្មីអាស៊ាន-ជប៉ុន និងគម្រោងរបស់នាយករដ្ឋមន្ត្រីជប៉ុន ក្នុងការកៀរគរមូលនិធិ ៣៥ ពាន់លានដុល្លារអាមេរិក សម្រាប់រយៈពេល ៥ ឆ្នាំ តាមរយៈភាពជាដៃគូរវាងរដ្ឋនិងឯកជនក្នុងតំបន់អាស៊ាន។
ក្រសួងការបរទេសកម្ពុជាបញ្ជាក់ថា៖ «ការគាំទ្រគំនិតផ្តួមផ្តើមទាំងនេះនឹងរួមចំណែកដល់ការអនុវត្តកម្មវិធីនយោបាយអាទិភាពរបស់រាជរដ្ឋាភិបាលកម្ពុជាផងដែរ ជាពិសេសការលើកកម្ពស់ជីវភាពរបស់ប្រជាពលរដ្ឋ តាមរយៈការនាំមកនូវកាលានុវត្តភាពថ្មីៗ និងការបង្កើតឱកាសការងារ»។
បើយោងតាមសេចក្តីប្រកាសព័ត៌មានក្រសួងការបរទេសជប៉ុន ចុះថ្ងៃទី ១៧ ខែធ្នូ កម្ពុជានិងជប៉ុនក៏បានយល់ព្រមធ្វើការជាមួយគ្នា ដើម្បីដោះស្រាយបញ្ហាទាំងឡាយដែលកំពុងប្រឈមនៅក្នុងតំបន់និងសហគមន៍អន្តរជាតិ រួមមានការលើកកម្ពស់ស្ត្រី សន្តិភាព និងសន្តិសុខ ស្ថានភាពនៅមីយ៉ាន់ម៉ា ស្ថានភាពនៅសមុទ្រចិនខាងត្បូងនិងខាងកើត ការឆ្លើយតបទៅនឹងកូរ៉េខាងជើងលើបញ្ហានុយក្លេអ៊ែរ និងមីស៊ីល បញ្ហាការចាប់ពង្រាត់ ការឈ្លានឈានរបស់រុស្ស៊ីលើអ៊ុយក្រែន និងស្ថានភាពជុំវិញអ៊ីស្រាអែល និងប៉ាឡេស្ទីន។
បើតាមក្រសួងការបរទេសជប៉ុន ភាគីទាំងពីរក៏បានបញ្ជាក់អំពីការធ្វើការជាមួយគ្នា ដើម្បីពង្រឹងភាពជាដៃគូយុទ្ធសាស្រ្តគ្រប់ជ្រុងជ្រោយ ហើយរក្សានិងពង្រឹងសណ្តាប់ធ្នាប់អន្តរជាតិ ដែលសេរី និងចំហ ដោយផ្អែកលើមូលដ្ឋានច្បាប់។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លោក គិន ភា ប្រាប់វីអូអេថា ទំនាក់ទំនងកម្ពុជានិងជប៉ុនមានលក្ខណៈល្អប្រសើរ មិនមានភាពរកាំរកូសជាមួយគ្នាឡើយ ជាពិសេសទំនាក់ទំនងរវាងរដ្ឋាភិបាលនិងរដ្ឋាភិបាល ប្រជាជន និងប្រជាជន ខណៈក្នុងក្រសែភ្នែករបស់ប្រជាជនកម្ពុជា ជប៉ុនជាមិត្តដ៏ល្អ ដែលបានជួយកសាង ក៏ដូចជាអភិវឌ្ឍប្រទេសកម្ពុជាគ្រប់វិស័យ។
លោកថ្លែងថា៖ «បង្ហាញឱ្យឃើញថាទំនាក់ទំនងរវាងប្រទេសទាំងពីរកាន់តែមានលក្ខណៈស៊ីជម្រៅគ្រប់ជ្រុងជ្រោយ គ្រប់វិស័យ គ្រប់កម្រិត ហើយវាក៏បង្ហាញឱ្យឃើញអំពីតុល្យភាពនៃទំនាក់ទំនងការបរទេសរបស់កម្ពុជាជាមួយបណ្តាប្រទេសនៅក្នុងតំបន់ និងពិភពលោកផងដែរ»។
បើតាមលោក គិន ភា ការប្រកួតប្រជែងរបស់មហាអំណាចជារឿងធម្មតា ហើយការរឹតចំណងភាពជាដៃគូជាមួយពួកគេ គឺដើម្បីរក្សាតុល្យភាព ហើយចៀសពីរបៀបវារៈនៃការប្រកួតប្រជែងឥទ្ធិពល។ លោកជំរុញឱ្យកម្ពុជាកាន់តែពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយជាមួយបណ្តាប្រទេសមហាអំណាចផ្សេងៗបន្ថែមទៀត។
កាលពីចុងឆ្នាំ ២០២២ មេដឹកនាំកម្ពុជា និងជប៉ុនបានព្រមព្រៀងគ្នាដំឡើងភាពជាដៃគូទៅជា«ដៃគូយុទ្ធសាស្ត្រគ្រប់ជ្រុងជ្រោយ» នៅឆ្នាំ ២០២៣ នេះ នៅពេលខួបលើកទី ៧០ ឆ្នាំនៃចំណងការទូតរវាងប្រទេសទាំងពីរ។
អតីតនាយករដ្ឋមន្ត្រីកម្ពុជា លោក ហ៊ុន សែន ធ្លាប់បានលើកឡើងថា ទំនាក់ទំនងកម្ពុជានិងជប៉ុនបានឈានដល់ដំណាក់កាលល្អបំផុតដែលមិនធ្លាប់មាននៅក្នុងប្រវត្តិសាស្ត្រ ហើយថា លោកនិងប្រជាជនកម្ពុជារង់ចាំពេលវេលានេះជាយូរមកហើយ៕