មន្ត្រីអន្តោប្រវេសន៍កម្ពុជាកំពុងរង់ចាំការសម្រេចចុងក្រោយពីប្រមុខថ្នាក់ដឹកនាំកម្ពុជា ក្នុងការទទួលយកជនភៀសខ្លួនស្ម័គ្រចិត្តដំបូង៤រូបពីកោះណូរូ (Nauru) ក្រោយពីបានបញ្ចប់ការពិនិត្យរួចរាល់នូវឯកសាររបស់ជនភៀសខ្លួនទាំងនោះ។
លោក សុខ ផល អគ្គនាយកនៃអគ្គនាយកដ្ឋានអន្តោប្រវេសន៍បានប្រាប់អ្នកសារព័ត៌មានបន្ទាប់ពីពិធីរំលឹកខួបលើកទី៧០ឆ្នាំនៃការបង្កើតកម្លាំងនគរបាលជាតិកម្ពុជាក្នុងបរិវេណក្រសួងមហាផ្ទៃថា មន្តី្រអន្តោប្រវេសន៍កម្ពុជាដែលបានបញ្ជូនទៅកោះនេះចំនួនបីលើកបានពិនិត្យឯកសារពាក់ព័ន្ធទាំងឡាយរបស់ជនភៀសខ្លួនដែលចង់មកតាំងទីលំនៅអចិន្រ្តៃយ៍នៅក្នុងប្រទេសកម្ពុជាទាំង៤នាក់នេះរួចរាល់ហើយ ដោយរង់ចាំការយល់ព្រមពីលោកនាយករដ្ឋមន្ត្រី ហ៊ុន សែនតែប៉ុណ្ណោះ។
លោកបានមានប្រសាសន៍ថា៖ «យើងបញ្ជូនមនុស្សទៅ៣លើកនេះគឺថាយើងបានពិនិត្យហើយ ហើយសំខាន់ជាងគេគឺការស្ម័គ្រចិត្តរបស់គាត់។ ប៉ុន្តែនេះគឺថាជូនដល់ប្រមុខរដ្ឋាភិបាលលោកសម្រេច។ កំពុងរាយការណ៍ជូនថ្នាក់ដឹកនាំដើម្បីសម្រេច»។
ដោយឡែក លោក ស ខេង រដ្ឋមន្ត្រីក្រសួងមហាផ្ទៃ ដែលបានចូលរួមក្នុងពិធីនេះដែរ ពុំអាចធ្វើការបញ្ជាក់បានថាតើពេលណាទើបជនភៀសខ្លួនទាំង៤រូបនេះមកដល់ប្រទេសកម្ពុជា ហើយតើពួកគេនឹងត្រូវទៅរស់នៅកន្លែងណានោះឡើយ។
លោកនិយាយថា៖ «បើខ្ញុំថានៅឲ្យខ្ញុំឆ្លើយថាម៉េចឥឡូវហ្នឹង។ ខ្ញុំថានៅ ខ្ញុំថានៅមានន័យគ្រប់គ្រាន់ហើយ»។
ជនទាំង៤រួបដែលបានទទួលសិទ្ធិជាជនភៀសខ្លួនពីរដ្ឋាភិបាលប្រទេសអូស្រ្តាលីនោះ រួមមានជនជាតិ រ៉ូហ៊ីងយ៉ា (Rohingya)ម្នាក់ និងជនជាតិអ៊ីរ៉ង់៣នាក់ផ្សេងទៀត។
រដ្ឋាភិបាលប្រទេសកម្ពុជាបានចុះអនុស្សរណៈយោគយល់ ជាមួយប្រទេសអូស្រា្តលីនៅក្នុងឆ្នាំ២០១៤ដើម្បីទទួលយកជនភៀសខ្លួនជាង១ពាន់នាក់ដែលសុំសិទ្ធិជ្រកកោននៅក្នុងប្រទេសអូស្ត្រាលី ដែលត្រូវអាជ្ញាធរប្រទេសនេះដាក់ឲ្យរស់នៅក្នុងជំរុំនៅលើកោះដាច់ស្រយ៉ាលមួយដែលហៅថា ណូរូ «Nauru»។
កិច្ចព្រមព្រៀងនេះគឺត្រូវបានធ្វើឡើងជាថ្នូរនឹងអ្វីដែលគេពណ៌នាថា ជាកម្មវិធីជំនួយដែលមានទឹកប្រាក់ជាង៣០លានដុល្លារពីប្រទេសអូស្ត្រាលីវិញ។
កិច្ចព្រមព្រៀងទទួល និងបញ្ជូនជនភៀសខ្លួនពីកោះណូរូនេះ ត្រូវបានទទួលការរិះគន់យ៉ាងខ្លាំងពីអង្គការសិទ្ធិមនុស្សជាតិនិងអន្តរជាតិ ដោយអះអាងថាបានរំលោភអនុសញ្ញាជនភៀសខ្លួនរបស់អង្គការសហប្រជាជាតិ។ លើសពីនេះទៅទៀតពួកគេនិយាយថាប្រទេសកម្ពុជាដ៏ក្រីក្រមួយនេះ នៅមានបញ្ហាប្រឈម ជាច្រើនដូចជា អំពើពុករលួយ ភាពក្រីក្រ ស្ថាប័នតុលាការនៅមិនទាន់ឯករាជ្យ អំពើនិទ័ណ្ឌភាព និងទំនាស់ដីធ្លីដ៏ច្រើន។
លោក បណ្ឌិត កែម ឡី អ្នកស្រាវជាវកិច្ចការអភិវឌ្ឍសង្គម បានមើលឃើញកិច្ចព្រមព្រៀងទទួលយកជនភៀសខ្លួនពីកោះណូរូនេះ ថាជាដំណើរកាទូតកខ្វក់ ដោយកិច្ចព្រមព្រៀងនេះនឹងធ្វើឲ្យកម្ពុជាទទួលបន្ទុកធ្ងន់ធ្ងរបន្ថែមទៀតក្នុងកញ្ចប់ថិវកាជាតិនៅពេលដែលប្រទេសអូស្រ្តាលីឈប់ផ្តល់ជំនួយ។
លោកនិយាយថា៖ «យើងត្រូវរំលែកថវិកាជាតិរបស់យើងទៅទទួលខុសត្រូវចំពោះការរស់រានមានជីវិតរបស់គេ ដូច្នេះថវិកាយើងកាន់តែស្តើងទៅ ប្រសិនជាយើងទទួលកាន់តែច្រើននៅពេលដែលអូស្រ្តាលីឈប់ជួយក្នុងរយះពេលមួយឆ្នាំទៅពីរឆ្នាំ»៕