គណៈកម្មាធិការជាតិរៀបចំការបោះឆ្នោត(គ.ជ.ប) បានអំពាវនាវឱ្យប្រជាពលរដ្ឋដែលមានឈ្មោះក្នុងបញ្ជីបោះឆ្នោត ប៉ុន្តែមិនមានអត្តសញ្ញាណបណ្ណសញ្ជាតិខ្មែរ ប្រញាប់សុំលិខិតបញ្ជាក់ពីអាជ្ញាធរ ដើម្បីអាចបោះឆ្នោតបាននាថ្ងៃទី២៣ ខែកក្កដាខាងមុខ។ នេះបើតាមសេចក្ដីជូនដំណឹងមួយរបស់គ.ជ.ប ចុះថ្ងៃទី២៤ ខែមិថុនា ឆ្នាំ២០២៣។
សេចក្ដីជូនដំណឹងបញ្ជាក់ថា៖ «ចំពោះប្រជាពលរដ្ឋដែលមានឈ្មោះក្នុងបញ្ជីបោះឆ្នោតផ្លូវការឆ្នាំ២០២២ ដែលបានប្រើឯកសារបញ្ជាក់អត្តសញ្ញាណបម្រើឱ្យការចុះឈ្មោះបោះឆ្នោត ហើយមិនទាន់មានអត្តសញ្ញាណបណ្ណសញ្ជាតិខ្មែរ (អ.ខ) ឬមិនទាន់ទទួលបាន ឬបាត់ ឬខូច ឬកែតម្រូវ សូមប្រញាប់រួសរាន់ទៅស្នើសុំឯកសារបញ្ជាក់អត្តសញ្ញាណបណ្ណបម្រើឱ្យការបោះឆ្នោត (ឯ.អ) ពីគណៈកម្មការឃុំ សង្កាត់រៀបចំការបោះឆ្នោត និងត្រូវសុំបញ្ជាក់សុពលភាពដោយអាជ្ញាធរឃុំសង្កាត់នៃឃុំសង្កាត់ដែលខ្លួនត្រូវទៅបោះឆ្នោតឱ្យបានទាន់ពេលវេលា»។
រយៈពេលស្នើសុំលិខិតបញ្ជាក់នេះ ចាប់ផ្តើមពីថ្ងៃទី២២ ខែមិថុនា ដល់ថ្ងៃទី២១ ខែកក្កដា ឆ្នាំ២០២៣។ ប្រជាពលរដ្ឋខ្មែរប្រមាណ៩លាន៧សែននាក់មានឈ្មោះក្នុងបញ្ជីបោះឆ្នោតរបស់គ.ជ.ប។
គួរបញ្ជាក់ថា កាលពីពេលថ្មីៗនេះ រដ្ឋាភិបាលបានចេញអនុក្រឹត្យមួយ ដោយអនុញ្ញាតអ្នកដែលមានអត្តសញ្ញាណបណ្ណហួសសុពលភាព អាចប្រើប្រាស់អត្តសញ្ញាណបណ្ណនេះសម្រាប់ការបោះឆ្នោតនាពេលខាងមុខបាន៕