អាជ្ញាធរពាក់ព័ន្ធកំពុងបន្តស្វែងរកឧទ្ធម្ភាគចក្រដែលបានបាត់នៅតំបន់ជួរភ្នំក្រវ៉ាញ ក្នុងភូមិសាស្រ្តស្រុកវាលវែង ខេត្តពោធិ៍សាត់ ដែលបាត់ការទាក់ទងកាលពីថ្ងៃសុក្រសប្តាហ៍មុន។
រដ្ឋលេខាធិការ និងជាអ្នកនាំពាក្យក្រសួងការពារជាតិ លោក ឈុំ សុជាត ប្រាប់វីអូអេថា មកត្រឹមម៉ោង ២ រសៀលថ្ងៃចន្ទនេះ ក្រុមការងារជួយសង្រ្គោះមិនទាន់មានតម្រុយបន្ថែមពីឧទ្ធម្ភាគចក្រដែលបានបាត់ការទាក់ទងនេះនៅឡើយទេ។ លោកបន្ថែមថា ពេលនេះអាកាសធាតុមិនអំណាយផលសម្រាប់ការស្វែងរកឡើយ។
លោកថ្លែងថា៖ «ដូចប្អូនដឹងហើយ តំបន់ហ្នឹងជាតំបន់ភ្នំ តំបន់ភ្នំក្រវ៉ាញ ហើយភ្នំក្រវ៉ាញយើងឥឡូវមានអាកាសធាតុភ្លៀងនៅក្បែរ។ យើងឥឡូវភ្លៀង ចឹងហើយភ្នំពិបាកដើរចូលក្នុងព្រៃ។ និយាយរួម ពិបាកក្នុងភូមិសាស្រ្តធ្វើដំណើររុករកតែម្តង ហើយយើងខ្វះឧបករណ៍តាមដានដែរ។ យើងអត់មានឧបករណ៍បច្ចេកទេសតាមដានពីផ្កាយរណបអីទេ យើងរកដោយថ្មើរជើង ដោយភ្នែកយើង អ៊ីចឹងត្រូវតែមានការលំបាកបន្តិចហើយ»។
អធិការស្រុកវាលវែង ខេត្តពោធិ៍សាត់ លោក ធាង ឡេង ប្រាប់វីអូអេថា មកត្រឹមម៉ោង ២ រសៀលថ្ងៃចន្ទនេះ លោកមិនទាន់មានដំណឹងអ្វីបន្ថែមចំពោះការបាត់ឧទ្ធម្ភាគចក្រនៅក្នុងតំបន់ជួរភ្នំក្រវ៉ាញទេ ដោយសារអាកាសធាតុមិនល្អដែលបង្កការលំបាកសម្រាប់ការស្វែងរក។
លោកថ្លែងថា៖ «មកដល់ពេលនេះ តម្រុយនៃការរុករកគឺយើងមិនទាន់ទទួលបាន ដោយសារក្រុមរុករកយើងមានពីរក្រុមគឺក្រុមជើងអាកាស និងក្រុមថ្មើរជើង។ ក្រុមថ្មើរជើងក៏ចេញល្បាតអត់រួច ដោយសារតែពេលវេលានេះ គឺអាកាសធាតុកំពុងតែមានភ្លៀង មានខ្យល់ហើយសម្បូរទៅដោយពពក។ អ៊ីចឹងទាំងថ្មើរជើង ទាំងផ្លូវអាកាស មិនអាចធ្វើការបាន។ ហើយមួយទៀតតំបន់ដែលយើងត្រូវរុករកមិនមានសេវាទាក់ទងគ្នាទេ»។
រដ្ឋមន្ត្រីការពារជាតិលោក ទៀ សីហា ថ្លែងនៅក្នុងពិធីមួយ នៅខណ្ឌកំបូល រាជធានីភ្នំពេញ កាលពីថ្ងៃទី១៤ ខែកក្កដា ឆ្នាំ២០២៤។ (Facebook / ក្រសួងការពារជាតិ)
កាលពីថ្ងៃអាទិត្យ រដ្ឋមន្រ្តីក្រសួងការពារជាតិកម្ពុជា លោក ទៀ សីហា បានថ្លែងថា ឧទ្ធម្ភាគចក្រដែលបាត់ខ្លួននោះហោះហើរក្នុងបេសកកម្មហ្វឹកហ្វឺននៅតាមតំបន់ ដើម្បីមើលបច្ចេកទេស និងឧបករណ៍ទំនើបកម្មលើវិស័យហោះហើរ។
លោកថ្លែងថា៖ «ហើយខ្ញុំក៏មិនទាន់សន្និដ្ឋានយ៉ាងណាទេ ប៉ុន្តែក្នុងបេសកកម្មរបស់យើង គឺមានអ្នកបើកបរអ្នកជំនាញ Pilot (អ្នកបើកឧទ្ធម្ភាគចក្រ) យើងមួយ និងជំនួយការម្នាក់។ មានតែពីររូបតែប៉ុណ្ណោះដែលបានហ្វឹកហ្វឺនហោះហើរទៅគោលដៅដែលបានកំណត់ក្នុងបេសកកម្ម។ ជាអកុសល យើងឃើញថាក្នុងថ្ងៃហ្នឹង អាកាសធាតុមិនអំណោយផល ហើយបានផ្តាច់ការទាក់ទងគ្នាមកទល់ពេលនេះចូលថ្ងៃទី ២ ហើយ»។
លោករដ្ឋមន្រ្តីការពារជាតិក៏បានអំពាវនាវដល់អ្នកផ្សាយព័ត៌មានកុំផ្សាយព័ត៌មានមិនពិត និងបញ្ចៀសការភ័ន្តច្រឡំនានា ខណៈក្រុមការងារកំពុងស្វែងរក។
បើតាមលិខិតស្តីពីផែនការហោះហើររបស់កងទ័ពជើងអាកាសដែលវីអូអេទទួលបាន មន្រ្តីយោធាពីរនាក់ គឺលោក ស៊ុន ផ្លា ប្រធានក្រុម និងលោក ខេង ឆៃយុទ្ធ អាកាសយានិកត្រូវបានអនុញ្ញាតឱ្យហ្វឹកហ្វឺនផ្លូវឆ្ងាយ ដោយហោះចេញនៅម៉ោង ១១ ព្រឹក ថ្ងៃទី ១២ ខែកក្កដា និងត្រូវឡប់មកវិញ នៅម៉ោង ២ រសៀលថ្ងៃដដែល។
តាមសេចក្តីជូនដំណឹងរបស់ក្រសួងការពារជាតិ ឧទ្ធម្ភាគចក្រមួយគ្រឿង បានបាត់ការទាក់ទងពីទីបញ្ជាការទ័ពអាកាស ក្នុងភូមិសាស្រ្តជួរភ្នំក្រវ៉ាញ ខេត្តពោធិ៍សាត់ និងខេត្តកោះកុង កាលពីថ្ងៃទី ១២ ខែកក្កដា ឆ្នាំ ២០២៤។ ក្រសួងការពារជាតិបញ្ជាក់ថា ហេតុការណ៍នេះបានកើតឡើងក្នុងអំឡុងពេលហោះហើរហ្វឹកហ្វឺន ដែលការហោះហើរនេះ ស្ថិតនៅក្នុងផែនការហោះហើរហ្វឹកហ្វឺនជាប្រចាំរបស់កងទ័ពជើងអាកាសនៅតំបន់នោះ។
ឧទ្ធម្ភាគចក្រដែលបានបាត់នោះ ជាប្រភេទឧទ្ធម្ភាគចក្រ Z-9 ដែលផលិតនៅប្រទេសចិន។ កម្ពុជាបានទិញឧទ្ធម្ភាគចក្រប្រភេទ Z-9 ចំនួន ១២ គ្រឿង កាលពីឆ្នាំ ២០១៣។
កាលពីឆ្នាំ ២០១៤ ឧទ្ធម្ភាគចក្រប្រភេទ Z-9 នេះ ក៏ធ្លាប់បានធ្លាក់ម្តងហើយនៅតំបន់ជាយក្រុងភ្នំពេញ ដែលកាលនោះបណ្តាលឱ្យមនុស្ស ៤ នាក់ស្លាប់ និងម្នាក់រងរបួសធ្ងន់៕