លោក ស ខេង ឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃ និងលោកស្កុត ម៉ូរីសុន (Scott Morrison) រដ្ឋមន្ត្រីក្រសួងអន្តោប្រវេសន៍និងកិច្ចការពារព្រំដែនអូស្ត្រាលីបានចុះហត្ថលេខាជាផ្លូវការនៅរសៀលថ្ងៃសុក្រនេះលើអនុស្សរណៈយោគយល់គ្នាទាក់ទងទៅនឹងការទទួលយកជនភៀសខ្លួនបរទេសពីប្រទេសអូស្រ្តាលីឲ្យស្នាក់នៅកម្ពុជា។
កិច្ចព្រមព្រៀងនៃប្រទេសទាំងពីរបង្កឲ្យមានការរិះគន់ជាច្រើន ដំណាលគ្នានឹងសកម្មជននិងជនរងគ្រោះដោយសារជម្លោះដីធ្លីនៅក្នុងទីក្រុងភ្នំពេញធ្វើការតវ៉ាប្រឆាំងទៅនឹងកិច្ចព្រមព្រៀងនេះដែរ។
ក៏ប៉ុន្តែទោះជាយ៉ាងណាក៏ដោយទាំងលោក ស ខេង ទាំងលោក ស្កុត ម៉ូរីសុន មិនផ្តល់សេចក្តីអធិប្បាយណាមួយដល់ក្រុមអ្នកយកព័ត៌មានដែលព្យាយាមស្រែកសួរនោះទេ។
ប្រទេសអូស្រ្តាលីត្រូវគេដឹងថា នឹងផ្តល់ថវិកាជំនួយដល់កម្ពុជាចំនួន៤០លានដុល្លារអូស្ត្រាលីឬស្មើនឹងប្រមាណ៣៥លានដុល្លារអាមេរិកសម្រាប់រយៈពេលបួនឆ្នាំក្នុងការតាំងលំនៅថ្មីនៃជនភៀសខ្លួនទាំងនេះ។ នេះគឺជាជំនួយបន្ថែមពីលើប្រាក់ជំនួយប្រមាណ៨០លានដុល្លារដែលរដ្ឋាភិបាលក្រុងកង់ប៊ែរ៉ា ផ្តល់ដល់កម្ពុជានៅក្នុងពេលនេះ។
Your browser doesn’t support HTML5
កម្ពុជាចុះហត្ថលេខាទទួលយកជនភៀសខ្លួនពីអូស្ត្រាលី
បើតាមសេចក្តីប្រកាសរួមក្រោយពីពិធីចុះហត្ថលេខានៅរសៀលនេះក្នុងក្រសួងមហាផ្ទៃភាគីទាំងពីរឲ្យដឹងថា អូស្ត្រាលីនឹងជួយដល់កម្ពុជាក្នុងការផ្តល់លំនៅដល់ជនភៀសដោយអូស្ត្រាលីរ៉ាប់រងការចំណាយក្នុងការបញ្ជូនជនភៀសខ្លួននិងការកសាងសមត្ថភាពរបស់ពួកគេសម្រាប់ការរស់នៅក្នុងប្រទេសកម្ពុជា។ កម្ពុជា គឺជាអ្នកកំណត់ចំនួននិងពេលវេលាដែលត្រូវទទួលយកជនភៀសខ្លួនទាំងនេះ។
យ៉ាងណាក៏ដោយ លោករដ្ឋមន្ត្រីក្រសួងអន្តោប្រវេសន៍និងកិច្ចការពារព្រំដែនអូស្ត្រាលី ស្កុត ម៉ូរីសុន ត្រូវបណ្តាញផ្សព្វផ្សាយបរទេសស្រង់សម្តីថា ក្រុមដំបូងនៃជនភៀសខ្លួនទាំងនេះនឹងមកដល់ប្រទេសកម្ពុជាក្នុងអំឡុងចុងឆ្នាំ២០១៤។
សេចក្តីថ្លែងការណ៍រួមដដែលបញ្ជាក់ថា កម្ពុជានឹងទទួលយកជនភៀសខ្លួននេះជាក្រុមតូចជាការសាកល្បងជំហានដំបូង ហើយការតាំងលំនៅថ្មីនៅកម្ពុជារបស់ក្រុមជនអន្តោប្រវេសន៍ទាំងនេះត្រូវស្ថិតក្រោមគោលការណ៍ស្មគ្រ័ចិត្ត។
លោក ស ខេង កាលពីថ្ងៃព្រហស្បតិ៍បានប្រាប់ក្រុមអ្នកយកព័ត៌មានថា កម្ពុជានឹងទទួលយកជនភៀសខ្លួនចំនួនតិចតួចបំផុតត្រឹមតែបួនទៅប្រាំនាក់សម្រាប់ជំហានដំបូង។ លោកស ខេង និយាយនៅក្នុងសេចក្តីថ្លែងការណ៍រួមនៅថ្ងៃនេះថា កម្ពុជាមានកាតព្វកិច្ចក្នុងការជួយដល់ជនភៀសខ្លួនទាំងនេះហើយទង្វើនេះគឺជាសកម្មភាព«មនុស្សធម៌»។
ដោយឡែកលោក ស្កុត ម៉ូរីសុន ក៏បានសរសើរកម្ពុជាក្នុងសេចក្តីថ្លែងការណ៍នោះដែរថា «កម្ពុជាកំពុងបង្ហាញលទ្ធភាពនិងឆន្ទៈរបស់ខ្លួនដើម្បីរួមចំណែកជាវិជ្ជមានដល់បញ្ហាមនុស្សធម៌»។
លោក សួន ប៊ុនសក្តិ ប្រធានលេខាធិការដ្ឋាននៃគណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជាដែលបានតាមដានកិច្ចចុះហត្ថលេខាលើអនុស្សរណៈយោគយល់គ្នានៅថ្ងៃនេះបានស្តីបន្ទោសដល់ការបិទខ្ទប់ព័ត៌មានពីសំណាក់រដ្ឋាភិបាលប្រទេសទាំងពីរ។
«បញ្ហាគឺយើងមិនដឹងថា ជនភៀសខ្លួនសញ្ជាតិណាខ្លះ មានចំនួនប៉ុន្មាននាក់ ហើយបញ្ហាមួយទៀត កាលណាយើងមិនដឹងពីស្ថានភាពជនភៀសខ្លួននេះគឺអាចបង្កអសន្តិសុខដល់កម្ពុជាដែរ។ ហើយការចុះហត្ថលេខានេះ ភាគីទាំងពីរមិនបានបង្ហាញគោលបំណងថា ហេតុអ្វីបានជាកម្ពុជាហ៊ានទទួលយកជនភៀសខ្លួន។ ហេតុអ្វីបានជាអូស្ត្រាលីត្រូវការបញ្ជូនជនភៀសខ្លួនមកកម្ពុជា»។
អង្គការការពារសិទ្ធិមនុស្សធំៗដូចជា Amnesty International ដែលមានមូលដ្ឋានក្នុងទីក្រុងឡុងដ៍ និងអង្គការឃ្លាំមើលសិទ្ធិមនុស្ស Human Rights Watch បានរិះគន់ការសម្រេចចិត្តរបស់រដ្ឋាភិបាលទាំងពីរក្នុងការបញ្ជូនជនភៀសខ្លួនពីអូស្ត្រាលីមកកាន់កម្ពុជា។
លោកស្រី អេឡែន ភាសុន(Elaine Pearson) នាយិកានៃអង្គការឃ្លាំមើលសិទ្ធិមនុស្ស ប្រចាំប្រទេសអូស្ត្រាលីអធិប្បាយនៅថ្ងៃនេះដែរថា កម្ពុជាដែល «មានប្រវត្តិគួរឲ្យរន្ធត់ក្នុងកិច្ចការពារជនភៀសខ្លួននិងកម្ពុជាដែលកំពុងផុងជ្រៅក្នុងការរំលោភសិទ្ធិមនុស្សយ៉ាងធ្ងន់ធ្ងរ។ កម្ពុជាមិនបានបង្ហាញឆន្ទៈឬលទ្ធភាពសម្រាប់ការពារជនភៀសខ្លួនឲ្យបានត្រឹមត្រូវនោះទេ។»
ទោះជាបែបនេះក្តីមន្ត្រីនាំពាក្យរដ្ឋាភិបាលលោក ផៃ ស៊ីផាន បានច្រានចោលការលើកឡើងបែបនេះ។
ជាមួយគ្នានេះអ្នកនាំពាក្យស្ថានទូតសហរដ្ឋអាមេរិកក្នុងក្រុងភ្នំពេញលោក Jay Raman «លើកទឹកចិត្ត»ដល់កម្ពុជានិងអូស្ត្រាលីឲ្យ«រកដំណោះស្រាយដែលមានប្រយោជន៍និងប្រកបដោយចីរភាព» សម្រាប់ជនភៀសខ្លួននិងអ្នកស្វែងរកសិទ្ធិជ្រកកោណដោយអនុលោមតាមនិយាមអន្តរជាតិ»។
មានជនអន្តោប្រវេសន៍ខុសច្បាប់ដែលមានជនជាតិផ្សេងៗ «ប្រមាណ១.០០០នាក់កំពុងស្ថិតក្នុងជំនុំបណ្តោះអាសន្ននៃសាធារណរដ្ឋណោរុ (Nauru) ដែលជាដីកោះដ៏តូចមួយក្នុងដែនសមុទ្រប៉ាស៊ីភិកនិងជាប្រទេសដែលចាយលុយដុល្លារអូស្រ្តាលី។
សូមបញ្ជាក់ថា ប៉ុន្មានម៉ោងប៉ុណ្ណោះមុននឹងលោក ស ខេង និងលោក ស្កុត ម៉ូរីសុន (Scott Morrison) បានចុះហត្ថលេខាលើអនុស្សរណៈយោគយល់គ្នាទាក់ទងទៅនឹងការទទួលយកជនភៀសខ្លួនបរទេសពីប្រទេសអូស្រ្តាលីឲ្យស្នាក់នៅកម្ពុជា សកម្មជននិងជនរងគ្រោះដោយសារជម្លោះដីធ្លីនៅក្នុងទីក្រុងភ្នំពេញក្នុងនោះមានព្រះសង្ឃផងដែរ សរុបប្រមាណជា២០០នាក់បានធ្វើការតវ៉ាប្រឆាំងទៅនឹងកិច្ចព្រមព្រៀងនេះនៅពីមុខស្ថានទូតប្រទេសអូស្រ្តាលីក្នុងទីក្រុងភ្នំពេញ។
បាតុកម្មដែលមានការពង្រាយដោយកងនគរបាលប្រឆាំងបាតុកម្មនិងកងរាជអាវុធហត្ថជាច្រើន បានអំពាវនាវឲ្យប្រទេសទាំងពីរផ្អាកការចុះហត្ថលេខាខាងលើដោយសំអាងថា កម្ពុជាខ្លួនឯងត្រូវដោះស្រាយបញ្ហាភាពក្រីក្រនិងបញ្ហាសិទ្ធិមនុស្សជាមុនសិន៕