ប្រធានាធិបតីសហរដ្ឋអាមេរិកលោក Joe Biden និងលោកស្រី Jill Biden ដែលជាភរិយា បានធ្វើដំណើរទៅកាន់ទីក្រុង Fort Myers រដ្ឋ Florida កាលពីថ្ងៃពុធ ដោយបានជិះឧទ្ធម្ភាគចក្រ Marine One ពិនិត្យមើលការខូចខាតដែលបណ្ដាលមកពីព្យុះសង្ឃរា Ian និងបានជួបជាមួយនឹងមន្ត្រី ពលរដ្ឋ និងម្ចាស់អាជីវកម្មនានាដែលរងផលប៉ះពាល់ដោយសារព្យុះដ៏ប្រល័យនេះ។
ចំនួនអ្នកស្លាប់ដោយសារខ្យល់ព្យុះនេះបានកើនរហូតដល់យ៉ាងតិច ១០៩ នាក់ ដោយក្នុងនោះ ១០៥ នាក់គឺស្លាប់នៅក្នុងរដ្ឋ Florida ហើយក្រៅពីនេះគឺស្លាប់នៅក្នុងរដ្ឋ North Carolina។ ក្នុងចំណោមនោះ អ្នកស្លាប់ជាង ៥០ នាក់គឺនៅក្នុងស្រុក Lee នៃរដ្ឋ Florida ដែលរងគ្រោះខ្លាំងក្លាជាងគេបំផុតដោយសារខ្យល់ព្យុះនេះ។
លោក Biden បានជួបជាមួយនឹងថ្នាក់ដឹកនាំថ្នាក់រដ្ឋនិងថ្នាក់មូលដ្ឋាន ដែលក្នុងនោះរួមមានទាំងអភិបាលរដ្ឋ Florida លោក Ron DeSantis និងសមាជិកព្រឹទ្ធសភាលោក Marco Rubio និងលោក Rick Scott ផងដែរ ដើម្បីពិភាក្សាអំពីកិច្ចប្រឹងប្រែងរើបឡើងវិញពីគ្រោះមហន្តរាយនេះ។
កន្លងមក លោក Biden មានការខ្វែងគំនិតគ្នាជាមួយនឹងលោក DeSantis ដែលអាចជាគូប្រជែងរបស់លោកនៅក្នុងការបោះឆ្នោតប្រធានាធិបតីឆ្នាំ ២០២៤ ខាងមុខ លើបញ្ហាអន្តោប្រវេសន៍និងបញ្ហាផ្សេងៗទៀត។ ចំណែកឯលោក Rubio និងលោក Scott វិញ លោកទាំងពីរធ្លាប់រិះគន់ខ្លាំងក្លាលើគោលនយោបាយរបស់រដ្ឋបាលលោក Biden។
ប៉ុន្តែនៅពេលឥឡូវនេះ គូប្រជែងនយោបាយទាំងនេះបានទុកការខ្វែងគំនិតគ្នាមួយឡែក ដោយងាកមកផ្ដោតលើកិច្ចប្រឹងប្រែងរើបឡើងវិញពីគ្រោះមហន្តរាយនេះ។
លោក Biden បាននិយាយនៅក្នុងសន្និសីទកាសែតរួមគ្នាមួយជាមួយនឹងលោក DeSantis ថា៖ «នេះគឺជាការចូលរួមទាំងអស់គ្នារបស់ជនរួមជាតិសហរដ្ឋអាមេរិក»។
លោក Biden បានសន្យាថានឹង «សម្របសម្រួលគ្រប់ផ្នែកទាំងអស់នៃរដ្ឋាភិបាលសហព័ន្ធដើម្បីជួយដល់តម្រូវការបន្ទាន់នានានិងការកសាងឡើងវិញរយៈពេលវែង» នៅក្នុងរដ្ឋ Florida។
លោក Biden បានបញ្ជាក់ថា ពលរដ្ឋនៅរដ្ឋ Florida ណាដែលមិនបានទិញធានារ៉ាប់រងគ្រោះមហន្តរាយប្រហែលជាអាចមានសិទ្ធិទទួលបានថវិការហូតដល់ ៨ ម៉ឺនដុល្លារពីរដ្ឋាភិបាលអាមេរិកដើម្បីជួសជុលឬក៏សាងសង់ផ្ទះក៏ដូចជាដើម្បីជួសជុលឬក៏ទិញយានយន្តរបស់ពួកគេឡើងវិញ។
លោកបានថ្លែងដូច្នេះថា៖ «ខ្ញុំចង់ឱ្យពលរដ្ឋនៃរដ្ឋ Florida បានដឹងថា ខ្ញុំនិងរដ្ឋាភិបាលសហរដ្ឋអាមេរិកតាំងចិត្តថាយើងនឹងចាកចេញពីទីនេះទេ។ យើងនឹងជួយអ្នករហូតទាល់តែដំណើរការរើបឡើងវិញពីគ្រោះមហន្តរាយនេះចប់រួចរាល់»។
លោក DeSantis បានថ្លែងអំណរគុណដល់លោក Biden ដែលបានធ្វើទស្សនកិច្ចទៅកាន់រដ្ឋរបស់លោក និងបានសរសើរទីភ្នាក់ងារសហព័ន្ធគ្រប់គ្រងគ្រោះមហន្តរាយ (FEMA) ដោយបាននិយាយថា «យើងមានសំណាងខ្លាំងណាស់ដែលមានកិច្ចសម្របសម្រួលល្អជាមួយនឹងសេតវិមាននិងជាមួយនឹងទីភ្នាក់ងារ FEMA»៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន Associated Press និងទីភ្នាក់ងារព័ត៌មាន Reuters។
លោក Biden ទៅពិនិត្យមើលការខូចខាតដោយសារព្យុះ Ian នៅរដ្ឋ Florida
ប្រធានាធិបតីសហរដ្ឋអាមេរិកលោក Joe Biden ថ្លែងកាលពីថ្ងៃទី៥ ខែតុលា ឆ្នាំ២០២២ ក្រោយពិនិត្យមើលការខូចខាតបណ្ដាលមកពីព្យុះសង្ឃរា Ian នៅទីក្រុង Fort Myers Beach រដ្ឋ Florida សហរដ្ឋអាមេរិក។
ទីក្រុង Fort Myers រដ្ឋ Florida —