ប្រធានាធិបតីសហរដ្ឋអាមេរិកលោក Joe Biden បានព្រមានកាលពីថ្ងៃអង្គារថា ករណីឆ្លងជំងឺកូវីដ១៩ នៅក្នុងសហរដ្ឋអាមេរិក នឹងបន្តកើនឡើង ហើយថា ក្នុងប៉ុន្មានសប្តាហ៍ខាងមុខទៀតនេះ ជារយៈពេលនៃការប្រឈមខ្លាំងមួយនៃការឆ្លងវីរុសបំប្លែងថ្មីអូមីក្រុង។
លោក Biden បានថ្លែងយ៉ាងដូច្នេះ បន្ទាប់ពីលោកបានជួបជាមួយក្រុមអ្នកជំនាញនៃយុទ្ធនាការប្រឆាំងជំងឺកូវីដ១៩ របស់សេតវិមានកាលពីថ្ងៃអង្គារ។ លោកបានលើកទឹកចិត្តដល់ពលរដ្ឋអាមេរិកាំងទាំងអស់«ឲ្យឆ្លៀតយកឱកាសនូវអ្វីដែលយើងមាន» ហើយបាននិយាយថា «មិនមានអ្វីត្រូវដោះសារអំពីការមិនចង់ចាក់វ៉ាក់សាំងប្រឆាំងនឹងជំងឺកូវីដ១៩នោះទេ»។
លោក Biden ក៏បានដោះស្រាយផងដែរពីការខ្វះខាតក្នុងការធ្វើតេស្តនាពេលនេះ ដែលធ្វើឲ្យពលរដ្ឋអាមេរិកកាំងជាច្រើនមិនសប្បាយចិត្ត ហើយលោកបានសន្យាថា នឹងធ្វើឲ្យការចាក់វ៉ាក់សាំងដូសជំរុញ និងការធ្វើតេស្តជំងឺកូវីដ១៩ មានកាន់តែច្រើនថែមទៀតក្នុងសហរដ្ឋអាមេរិក។
លោកមានប្រសាសន៍បន្តទៀតថា៖ «យើងកំពុងធ្វើឲ្យមានភាពប្រសើរឡើង។ លោកបន្ថែមទៀតថា លោកបានបញ្ជាឲ្យរដ្ឋាភិបាលទិញថ្នាំគ្រាប់របស់ក្រុមហ៊ុន Pfizer សម្រាប់ព្យាបាលជំងឺកូវីដ១៩ ទ្វេដងពីចំនួន ១០លានទៅ ២០លានបន្ទះ។
បើយោងតាមទីភ្នាក់ងារព័ត៌មាន Bloomberg របស់អាមេរិក ដែលបានចេញផ្សាយកាលពីថ្ងៃអង្គារម្សិលមិញ សហរដ្ឋអាមេរិក កំពុងប្រឈមនឹងការឆ្លងរាលដាលយ៉ាងខ្លាំងនៃជំងឺកូវីដ១៩ ដោយមានការឆ្លងជាង ១លានករណីត្រូវបានគេរាយការណ៍នៅក្នុងរយៈពេល២៤ម៉ោងចុងក្រោយនេះ។
សហរដ្ឋអាមេរិក បានផ្តល់វ៉ាក់សាំងប្រឆាំងជំងឺកូវីដ១៩ ដល់ប្រទេសនានានៅជុំវិញពិភព លោកប្រមាណជាង ៣១៥លានដូស ហើយបានសន្យាថា នឹងផ្តល់ក្នុងចំនួនសរុបទាំងអស់ ១ពាន់២០០លានដូស។ អ្នកជំនាញសុខភាពមួយចំនួនលើកឡើងថា ក្រុមប្រទេសអ្នកមាននៅមិនទាន់បានធ្វើការងារឲ្យបានគ្រប់គ្រាន់នៅឡើយទេ ក្នុងការផ្តល់វ៉ាក់សាំងដល់ប្រទេសផ្សេងៗនៅលើពិភពលោក ដើម្បីទប់ទល់នឹងការឆ្លងរាលដាលនៃវីរុសបំប្លែងខ្លួនថ្មីនៃជំងឺកូវីដ ១៩នោះ៕