លោកប្រធានាធិបតី Joe Biden បានព្រមានប្រឆាំងនឹងសង្គ្រាមទ្រង់ទ្រាយធំនៅក្នុងប្រទេសលីបង់ ហើយនិយាយថា វាដល់ពេលដែលត្រូវបញ្ចប់ជម្លោះនៅតំបន់ហ្កាហ្សា ខណៈពេលដែលលោកថ្លែងសុន្ទរកថាចុងក្រោយរបស់លោកក្នុងនាមជាប្រធានាធិបតីអាមេរិក កាលពីថ្ងៃអង្គារទៅកាន់មេដឹកនាំរាប់រយនាក់នៅឯមហាសន្និបាតអង្គការសហប្រជាជាតិ។
លោក Biden បាននិយាយដោយសំដៅទៅលើជម្លោះដែលកំពុងកើនឡើងរវាងអ៊ីស្រាអែល និងក្រុម Hezbollah ថា៖ «សង្គ្រាមទ្រង់ទ្រាយធំមិនហុចផលប្រយោជន៍ដល់អ្នកណាម្នាក់នោះទេ។ លោកថា ដំណោះស្រាយការទូតនៅតែអាចធ្វើទៅបាន។
នៅលើជម្លោះជិតមួយឆ្នាំរវាងអ៊ីស្រាអែល និងក្រុមហាម៉ាស់នៅតំបន់ហ្កាហ្សា លោក Biden បានជំរុញឱ្យបណ្តាភាគី «បញ្ចប់លក្ខខណ្ឌ» នៃកិច្ចព្រមព្រៀងបទឈប់បាញ់គ្នា និងការដោះលែងចំណាប់ខ្មាំង ដែលត្រូវបានគាំទ្រដោយក្រុមប្រឹក្សាសន្តិសុខអង្គការសហប្រជាជាតិ។
ស្តីពីកិច្ចខិតខំប្រឹងប្រែងរបស់អ៊ុយក្រែនដើម្បីប្រយុទ្ធប្រឆាំងនឹងការឈ្លានពានរបស់រុស្ស៊ី លោក Biden បាននិយាយថា «យើងមិនអាចធុញទ្រាន់បានទេ។ យើងមិនអាចងាកមុខចេញបានទេ ហើយយើងនឹងមិនបោះបង់ការគាំទ្ររបស់យើងចំពោះអ៊ុយក្រែនឡើយ រហូតទាល់តែអ៊ុយក្រែនឈ្នះដោយសន្តិភាពដ៏ត្រឹមត្រូវ និងយូរអង្វែង»។
សុន្ទរកថារបស់ លោក Biden កើតឡើងចំពេលវេលាសំខាន់។ នេះបើយោងតាម អ្នកស្រី Linda Thomas-Greenfield ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិ៕