អ្នកជំនាញសិទ្ធិមនុស្សបានសម្តែងការជំទាស់នឹងការចាប់ខ្លួនមនុស្សជាច្រើនដោយប្រតិបត្តិការដ៏ធំនាពេលថ្មីៗនេះក្នុងប្រទេសបង់ក្លាដែស។
មន្ត្រីបង់ក្លាដែសនិយាយថាខ្លួនបានចាប់មនុស្សជាង១១.០០០នាក់ដើម្បីជាការឆ្លើយតបភ្លាមៗនិងធ្ងន់ធ្ងរចំពោះការសម្លាប់យ៉ាងសាហាវឃោរឃៅជាច្រើនដែលសង្ស័យថាប្រព្រឹត្តដោយក្រុមសកម្មប្រយុទ្ធឥស្លាម។
ប៉ុន្តែអង្គការឃ្លាំមើលសិទ្ធិមនុស្ស Human Rights Watch ដែលមានមូលដ្ឋានក្នុងទីក្រុងញូវយ៉កមានការសង្ស័យថាការចាប់ខ្លួនក្នុងទ្រង់ទ្រាយធំដូចនេះអាចជាលទ្ធផលនៃការស៊ើបអង្កេតដិតដល់ ឬក៏វានឹងជួយកាត់បន្ថយអំពើហិង្សាក្នុងប្រទេសនេះប្រកបដោយប្រសិទ្ធភាព។
លោក Brad Adams នាយកអង្គការសិទ្ធិមនុស្សប្រចាំតំបន់អាស៊ីបានបញ្ជាក់ថា «ការចាប់ខ្លួនមនុស្សរាប់ពាន់នាក់ក្នុងរយៈពេលតែពីរបីថ្ងៃគឺជាទិដ្ឋភាពដែលគេបានឃើញដដែលនៅក្នុងប្រទេសបង់ក្លាដែស ប៉ុន្តែវាមិនបានជួយជំរុញឱ្យមានជំនឿថាការសម្លាប់មនុស្សដ៏គួរឱ្យរន្ធត់នេះនឹងបញ្ចប់ឬថាពួកគេនឹងទទួលបានការកាត់ទោសតាមផ្លូវច្បាប់ទេ»។
នៅក្នុងសេចក្តីថ្លែងការណ៍មួយដែលចេញផ្សាយដោយអង្គការឃ្លាំមើលសិទ្ធិមនុស្សនៅថ្ងៃសុក្រនេះបានដកស្រង់សេចក្តីរាយការណ៍សារព័ត៌មាននានាថាប៉ូលិសបានទទួលប្រាក់សំណូកដើម្បីដោះលែងអ្នកដែលត្រូវគេចាប់ឃាត់ខ្លួនទាំងនោះ។
ប៉ូលិសបានចាប់ឃាត់ខ្លួនមនុស្សជាច្រើនពាន់នាក់ចាប់តាំងពីថ្ងៃសុក្រសប្តាហ៍មុននៅក្នុងយុទ្ធនាការបង្ក្រាបលើអំពើហិង្សាដែលបានបង្កលើជនរងគ្រោះជាង៣០នាក់ក្នុងប្រទេសបង់ក្លាដែសចាប់តាំងពីដើមឆ្នាំមុន ក្នុងនោះមានអ្នកសរសេរប្លុក សកម្មជនសិទ្ធិមនុស្សស្រឡាញ់ភេទដូចគ្នា អ្នកកាន់សាសនាគ្រិស្ត និងអ្នកកាន់សាសនាហិណ្ឌូ។ ជនជ្រុលនិយម ISIS បានប្រកាសទទួលខុសត្រូវចំពោះការសម្លាប់មនុស្សជាង២០នាក់៕