រដ្ឋាភិបាលលោកនាយករដ្ឋមន្ត្រី ហ៊ុន សែន បានស្គាល់មុខសញ្ញាជនដៃដល់ដែលប្រើអំពើហិង្សាលើតំណាងរាស្ត្ររបស់គណបក្សជំទាស់ពីររូប ក៏ប៉ុន្តែមិនទាន់បានធ្វើការចោទប្រកាន់ជនសង្ស័យណាមួយនោះទេ។
មន្ត្រីក្រសួងមហាផ្ទៃបានឲ្យដឹងនាថ្ងៃអង្គារនេះថា អាជ្ញាធរកម្ពុជាបានស្គាល់មុខជនដៃដល់ ដែលបានវាយប្រហារលើតំណាងរាស្ត្រពីររូបរបស់គណបក្សជំទាស់នៅមុខស្ថាប័នរបស់ខ្លួននៅថ្ងៃច័ន្ទសប្តាហ៍មុននេះ។
លោកនាយឧត្តមសេនីយ ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់ VOA ថា ក្រុមជំនាញនៃគណៈកម្មការស៊ើបអង្កេតករណីវាយប្រហារលើតំណាងរាស្ត្រ បានស្គាល់មុខសញ្ញាជាក់លាក់ និងបានប្រមូលឯកសារទិន្នន័យមួយចំនួនពីមន្ទីររដ្ឋសភា ពីម្ចាស់ទំព័រហ្វេសប៊ុក រួមទាំងសាក្សីផ្ទាល់ភ្នែក អ្នកបើករថយន្តរបស់ជនរងគ្រោះ និងតំណាងមេធាវីរបស់ជនរងគ្រោះផងដែរ។ ក៏ប៉ុន្តែមិនទាន់មានការចោទប្រកាន់ជាផ្លូវច្បាប់នៅឡើយទេ។
«យើងមិនទាន់បានចោទប្រកាន់អីជាផ្លូវការនោះទេ ក៏ប៉ុន្តែយើងមានឯកសារ ភ័ស្តុតាង ហើយនិងរូបភាពតាមរយៈអ្វីដែលយើងបានពីអគ្គលេខាធិការដ្ឋានរដ្ឋសភា ក៏ប៉ុន្តែយើងនៅតែស្នើសុំឲ្យមានកិច្ចសហការពីម្ចាស់ទំព័រហ្វេសប៊ុក ព្រោះធម្មតាយើងមិនមែនឃើញរូបភាពនៅក្នុងហ្នឹងហើយ យើងទៅធ្វើការចាប់តាមរូបភាពនោះទេ ព្រោះធម្មតាហ្វេសប៊ុកហ្នឹង យើងមិនអាចយកជាផ្លូវការបានទេ ទាល់តែសុំឲ្យម្ចាស់ទំព័រហ្វេសប៊ុកហ្នឹងបញ្ជាក់ជាមួយយើងផ្ទាល់។ ក៏ប៉ុន្តែទោះជាយ៉ាងណាក៏ដោយ យើងនឹងមានលទ្ធផលនាពេលឆាប់ៗនេះ»។
យ៉ាងណាក៏ដោយ លោកនាយឧត្តមសេនីយ ខៀវ សុភ័គ មិនបានបញ្ជាក់ពីចំនួន និងអត្តសញ្ញាណរបស់ជនសង្ស័យនោះទេ ដោយលោកលើកឡើយថា ក្រុមជំនាញកំពុងធ្វើការប្រៀបធៀប និងកំណត់មុខសញ្ញាបន្តនៅឡើយ។
នាថ្ងៃច័ន្ទសប្តាហ៍កន្លងទៅ តំណាងរាស្ត្រពីរនាក់របស់គណបក្សជំទាស់គឺលោក គង់ សភា និងលោក ញ៉យ ចំរើន ត្រូវបានក្រុមជនជនបិទមុខវាយប្រហារ ក្រោយពេលដែលជនទាំងនោះស្ទាក់រថយន្ត និងទាញអ្នកតំណាងរាស្ត្រចេញពីរថយន្ត ខណៈពេលបើកចេញពីមន្ទីររដ្ឋសភា។ ការវាយដំនេះមិនមានកិច្ចអន្តរាគមន៍ពីកម្លាំងសមត្ថកិច្ចនោះទេ។ គេជឿជាក់ថា ក្រុមជនសង្ស័យទាំងនោះគឺជាបាតុករដែលនៅសេសសល់ពីការតវ៉ាឲ្យដកលោក កឹម សុខា ចេញពីតំណែងនាអនុប្រធានទីមួយរដ្ឋសភា។
ការវាយប្រហារលើតំណាងរាស្ត្រ ដែលមានអភ័យឯកសិទ្ធិនេះ ត្រូវបានថ្កោលទោស និងរងការរិះគន់យ៉ាងខ្លាំងជាបន្តបន្ទាប់ពីអង្គការសង្គមស៊ីវិលនានា និងស្ថានទូតនានាប្រចាំនៅប្រទេសកម្ពុជា។ ក្នុងនោះមានអង្គការឃ្លាំមើលសិទ្ធិមនុស្ស Human Rights Watch ដែលមានទីតំាងនៅក្នុងទីក្រុង New York សហរដ្ឋអាមេរិកផងដែរ។
លោក Brad Adams នាយកអង្គការឃ្លាំមើលសិទ្ធិមនុស្ស ប្រចាំអាស៊ី បានបញ្ជាក់នៅក្នុងសេចក្តីថ្លែងការណ៍ថា អសមត្ថភាពនិង នយោបាយភាវូបនីយកម្មនៃតុលាការកម្ពុជា គឺបង្ហាញយ៉ាងច្បាស់នៅក្នុងករណីនេះដែលសកម្មជនសិទ្ធិមនុស្សត្រូវ។
អង្គការសិទ្ធិមនុស្សនេះបាននិយាយថា «ការវាយប្រហារយ៉ាងយង់ឃ្នង»លើតំណាងរាស្ត្រគណបក្សប្រឆាំងគឺស្រដៀងទៅនឹងអ្វីដែលធ្លាប់បានកើតឡើងចំពោះគណបក្សជំទាស់ផ្សេងទៀត ដែលធ្លាប់បានប្រកួតប្រជែងជាមួយលោកនាយករដ្ឋមន្ត្រី ហ៊ុន សែន នាអំឡុងឆ្នាំ១៩៩០។ អង្គការឃ្លាំមើលសិទ្ធិដដែលក៏បានបង្ហាញផងដែរថា បាតុកម្មប្រឆាំងនឹងលោក កឹមសុខា អនុប្រធានគណបក្សសង្គ្រោះជាតិនោះគឺមានការគាំទ្រពីលោកឧត្តមសេនីយ គន់ គឹម សមាជិកអចិន្ត្រៃយ៍នៃគណបក្សប្រជាជនកម្ពុជា ដែលបានចេញសេចក្តីថ្លែងការណ៍គាំទ្រការទម្លាក់លោក កឹម សុខា ពីតំណែងអនុប្រធានទី១នៃរដ្ឋសភាក្នុងថ្ងៃបាតុកម្មនោះផងដែរ។
លោក Brad Adamsប្រធានការិយាល័យប្រចាំតំបន់អាស៊ីរបស់អង្គការឃ្លាំមើលសិទ្ធិមនុស្ស Human Rights Watch បានសរសេរក្នុងសេចក្តីថ្លែងការណ៍កាលពីសប្តាហ៍មុនយ៉ាងដូច្នេះថា៖«ការប្រើប្រាស់អំពើហិង្សារបស់ពលរដ្ឋដើម្បីវាយប្រហារលើតំណាងរាស្ត្រគណបក្សជំទាស់នោះ បានបញ្ជូនសញ្ញាភ័យខ្លាចមួយដល់ប្រជាពលរដ្ឋកម្ពុជា ហើយវាបង្ហាញពីរលកនៃអំពើហិង្សាផ្នែកនយោបាយថ្មីមួយដែលអាចកើតឡើងគ្រប់ពេល និងគ្រប់ទីកន្លែង»។
សេចក្តីថ្លែងការណ៍រួមផ្សេងមួយទៀត ដែលចេញដោយអង្គការសង្គមស៊ីវិលសំខាន់ៗក្នុងស្រុកក្រោយការផ្ទុះអំពើហិង្សានោះបានសរសេរថា ក្នុងចំណោមបាតុករ ដែលបានស្រែកប្រឆាំងនឹងលោក កឹម សុខា នៅមុខរដ្ឋសភាកាលថ្ងៃច័ន្ទនោះក៏មានកងសន្តិសុខ និងមន្ត្រីនគរបាលដែរ ហើយពួកគេភាគច្រើនមានបង់កក្រមា ឬមានក្រណាត់ក្រហមបិទភ្ជាប់នឹងអាវជាសញ្ញាផងដែរ។
នាយឧត្តមសេនីយ៍ ខៀវ សុភ័គ បានបញ្ជាក់ប្រាប់ VOA នាថ្ងៃអង្គារនេះថា ការលើកឡើងរបស់ក្រុមផ្សេងៗគឺជាសេរីភាពរបស់ពួកគេ ក៏ប៉ុន្តែបញ្ហាចម្បងគឺការតាមចាប់ខ្លួនជនដៃដល់មកផ្តន្ទាទោស។
«អ្នកណាគេថាអីថាទៅ បងមិនយកចិត្តទុកដាក់នោះទេ សំខាន់គឺរកជនល្មើស ជនដៃដល់ ដែលវ៉ៃតំណាងរាស្ត្រនោះ។ ព្រោះគេថា ចេះតែថាទៅ។ អ្នកខ្លះគេថា អញ្ចេះ អ្នកខ្លះគេថា អញ្ចុះ។ អ្នកខ្លះគេថា ជាល្បិចរបស់គណបក្សសង្គ្រោះជាតិ តែយើងមិនជាជឿនោះទេ។ តែរឿងសំខាន់គឺជនរងគ្រោះនៅមន្ទីរពេទ្យ ហើយរកអ្នកជនដៃដល់នោះមកឲ្យឃើញ»។
លោក យ៉ែម ប៉ុញ្ញាឫទ្ធិ អ្នកនាំពាក្យគណបក្សសង្គ្រោះជាតិប្រាប់ VOA ថា មកដល់ពេលនេះ សភាពរបួសរបស់អ្នកតំណាងរាស្ត្រទាំងពីរនៅមានភាពឈឺចាប់នៅឡើយ ទោះបីជាមានការវះកាត់ និងការពិនិត្យពីក្រុមគ្រូពេទ្យនៅប្រទេសថៃក៏ដោយ។
«គាត់មានអាការៈធូរស្រាលជាងមុនក្រោយពីទទួលបានការវះកាត់។ ក៏ប៉ុន្តែនៅតែមានបញ្ហាឈឺក្បាល វិលមុខ ហើយនិងឈឺក្នុងខ្លួន ដោយសារត្រូវរបួសធ្ងន់ មិនដឹងថា ត្រូវគ្រាំដល់កម្រិតណា។ ដូច្នេះវេជ្ជបណ្ឌិតថៃលោកពុំទាន់អនុញ្ញាតឲ្យចេញពីពេទ្យនៅឡើយ ប្រហែលជាត្រូវធ្វើការស្គេនម្តងទៀតលើខ្លួនប្រាណនិងក្បាលទាំងមូលតែម្តងបាទ»។
យោងតាមទំព័រហ្វេសប៊ុកផ្ទាល់ខ្លួនរបស់លោក សម រង្ស៊ី ប្រធានគណបក្សសង្គ្រោះជាតិ បានឲ្យដឹងថា លោកបានទៅសួរសុខតំណាងរាស្ត្ររបស់លោកពីររូប ដែលកំពុងព្យាបាលរបួស មុនពេលធ្វើមាតុភូមិនិវត្តន៍មកកាន់ប្រទេសកម្ពុជាវិញនាល្ងាចថ្ងៃអង្គារនេះ។ នៅក្នុងកម្រងរូបភាពដែលផ្សាយលើទំព័រហ្វេសប៊ុករបស់លោកនោះមានតំណាងរាស្ត្រសំខាន់ៗមួយចំនួនគឺលោក កឹម សុខា អនុប្រធានគណបក្សសង្គ្រោះជាតិ និងលោក គង់ គាំ ដែលជាឪពុកបង្កើតរបស់តំណាងរាស្ត្រ គង់ សភា ដែលរងរបួសនោះ។
ស្ថិតក្នុងវ័យ៧៤ឆ្នាំ អ្នកនយោបាយជើងចាស់គឺលោក គង់ គាំ តំណាងព្រឹទ្ធសភា និងជាប្រធានគណបក្សសម រង្ស៊ី ដែលគេស្គាល់ថា ជាជំនិតរបស់លោក សម រង្ស៊ី បានប្រកាសចូលនិវត្តន៍ពីព្រឹទ្ធសភា និងដកខ្លួនពីគណបក្សជំទាស់កាលពីថ្ងៃច័ន្ទដោយបញ្ហាសុខភាព។
ការវាយប្រហារទៅលើតំណាងរាស្ត្រគណបក្សជំទាស់ទាំងពីររូប និងការដកលោក កឹម សុខា ចេញពីតំណែងអនុប្រធានទី១នៃរដ្ឋសភាកើតឡើង បន្ទាប់ពីមានអរិភាពនយោបាយរវាងគណបក្សកាន់អំណាចរបស់លោក ហ៊ុន សែន និងគណបក្សជំទាស់នាពេលថ្មីៗនេះ ក្រោយពេលតំណាងរាស្ត្រគណបក្សសង្គ្រោះជាតិបញ្ជាក់ការមន្ទិលសង្ស័យអំពីការប្រើប្រាស់ផែនទី និងការបោះបង្គោលព្រំដែនរវាងប្រទេសកម្ពុជា និងប្រទេសវៀតណាម។ ក្នុងនោះយ៉ាងហោចណាស់សកម្មជនគណបក្សជំទាស់ជាង១០រូប និងសមាជិកព្រឹទ្ធសភាមួយរូប ត្រូវបានចាប់ឃុំខ្លួន និងកាត់ទោសបន្តបន្ទាប់។ ការណ៍នេះធ្វើឲ្យមានក្តីបារម្ភពីសំណាក់អង្គការសិទ្ធិមនុស្សធំៗ និងអង្គការសហប្រជាជាតិ៕