អង្គការការពារសិទ្ធិមនុស្សអន្តរជាតិ Amnesty International និយាយថា មេដឹកនាំនយោបាយក្នុងពិភពលោក រួមមានលោកប្រធានាធិបតីស.រ.អា. Donald Trump ប្រើវោហាសាស្ត្រមិនគប្បី ដែលមេដឹកនាំប្រទេសតូចៗប្រើប្រាស់ធ្វើឲ្យចុះខ្សោយប្រសិទ្ធភាពបេសកកម្មការពារសិទ្ធិមនុស្សក្នុងពិភពលោក។
របាយការណ៍ប្រចាំឆ្នាំ២០១៦របស់អង្គការការពារសិទ្ធិមនុស្សអន្តរជាតិ Amnesty International និយាយអំពីស្ថានភាពសិទ្ធិមនុស្សនៅក្នុងប្រទេសចំនួន១៥៩ ដោយផ្តោតសំខាន់លើសិទ្ធិមនុស្សក្នុងពេលសង្គ្រាម និងវិបត្តិជនភៀសខ្លួនហើយនឹងការរឹតបន្តឹងសេរីភាពពលរដ្ឋក្នុងប្រទេសនានា ដែលមេដឹកនាំយកវោហាសាស្ត្រមិនសមហេតុផលរបស់មេដឹកនាំប្រទេសធំៗធ្វើជាលេស។
របាយការណ៍របស់អង្គការការពារសិទ្ធិមនុស្សអន្តរជាតិ Amnesty International ដែលមានឈ្មោះថា «ស្ថានភាពសិទ្ធិមនុស្សក្នុងពិភពលោក» និយាយថា អ្នកនយោបាយក្នុងប្រទេសរំលោភសិទ្ធិមនុស្សផ្សេងៗបានប្រើលេសខាងសេដ្ឋកិច្ច និងសន្តិសុខដើម្បីបង្ក្រាបការរិះគន់ខាងនយោបាយ។
ក្រោយពីការចេញរបាយការណ៍របស់អង្គការ Amnesty International លោក Adotei Akwei នៃអង្គការពារសិទ្ធិមនុស្សអន្តរជាតិការពារសិទ្ធិមនុស្សអន្តរជាតិនេះប្រចាំស.រ.អា. និយាយថា មេដឹកនាំប្រទេសតូចៗតែងតែប្រើប្រាស់វោហាសាស្ត្រ និងនយោបាយរបស់មេដឹកនាំប្រទេសធំៗដូចជាស.រ.អា.ជាដើម ដើម្បីធ្វើជាលេសបង្ក្រាបអ្នកប្រឆាំង។
«មិនមែនគ្រាន់តែវោហាសាស្ត្រនោះទេដែលបង្កគ្រោះថ្នាក់នោះ។ ការអនុវត្តគោលនយោបាយក៏នាំឲ្យរដ្ឋាភិបាលផ្សេងៗធ្វើតាមដែរ»។
ជាក់ស្តែងលោកនាយករដ្ឋមន្ត្រីហ៊ុន សែន នៅសប្តាហ៍នេះ បានបន្តប្រើប្រាស់ចំណាត់ការរបស់រដ្ឋបាលលោកប្រធានាធិបតីស.រ.អា. Donald Trump ជាហេតុផលសម្រាប់អ្វីដែលរដ្ឋាភិបាលរបស់លោកធ្វើការបង្ក្រាបលើបាតុកម្ម ការបញ្ចេញមតិ និងវិធានការប្រឆាំងបណ្តាញព័ត៌មាន មន្ត្រីសង្គមស៊ីវិល ហើយនឹងរហូតដល់ការថតសំឡេងសន្ទនាឯកជន។
ក្នុងសុន្ទរកថាកាលពីថ្ងៃចន្ទ នៅក្នុងពិធីសម្ពោធសាងសង់ផ្លូវក្រវ៉ាត់ក្រុង លោកហ៊ុន សែន និយាយថា សូម្បីតែស្រុកអាមេរិកក៏មានទំនាស់នយោបាយដែរ ហើយលោកចាំតែបន្ទរតាមក្រោយប៉ុណ្ណោះ។
លោកនាយករដ្ឋមន្ត្រីហ៊ុន សែន ថ្លែងក្នុងសុន្ទរកថានៅក្នុងពិធីសម្ពោធសាងសង់ផ្លូវក្រវ៉ាត់ក្រុង នៅរាជធានីភ្នំពេញ កាលពីថ្ងៃចន្ទ ទី៦ ខែមីនា ឆ្នាំ២០១៧។ (រូបដកស្រង់ចេញពីទំព័រហ្វេសប៊ុកលោកនាយករដ្ឋមន្ត្រី ហ៊ុន សែន)
លោកហ៊ុន សែន បានបន្ត ដោយលើកយកការចាប់បាតុករបង្កការបំផ្លាញក្នុងពេលធ្វើបាតុកម្មក្រោយការបោះឆ្នោតនៅស.រ.អា.ធ្វើការការពារមូលហេតុសម្រាប់ការបង្ក្រាបបាតុកម្មនៅប្រទេសកម្ពុជាដែលមានកម្មករស្លាប់យ៉ាងតិច៤នាក់ ដោយសារការបាញ់គ្រាប់កាំភ្លើងពិតទៅលើបាតុករ។
«ពីមុននេះ ពេលបាតុកម្មគ្រឹប នៅស្រុកអាមេរិកប្រឆាំងលទ្ធផលបោះឆ្នោត មានការបង្ក្រាបចាប់រាប់រយ រាប់ពាន់នាក់។ ខាងសារព័ត៌មានមួយចំនួនសម្ភាស NGOs ស្រុកខ្មែរថា តើខុសច្បាប់ទេបង្ក្រាបហ្នឹងត្រូវឬមិនត្រូវ រំលោភសិទ្ធិមនុស្សឬអត់? គេថា អត់ទេ ធ្វើហ្នឹងត្រឹមត្រូវហើយ អត់រំលោភសិទ្ធិមនុស្សទេ ដើម្បីការពារដើម្បីរក្សាស្ថិរភាពនយោបាយនៅស្រុកអាមេរិក។ អីចឹងខ្ញុំឆ្លើយទៅវិញថា បើអីចឹង ខ្ញុំធ្វើពីមុនក៏មិនខុសដែរ ដើម្បីរក្សាស្ថិរភាពស្រុកខ្មែរ»។
ទោះជាយ៉ាងណា បាតុកម្មនៅស.រ.អា.ដែលមានមនុស្សកន្លះលាននាក់ ចូលរួមមិនមានមនុស្សស្លាប់ និងគ្មានការបាញ់គ្រាប់កាំភ្លើងពិតលើបាតុករទេ។
លោកយ័ប គឹមទឹង ប្រធានសមាគមខ្មែរអាមេរិកាំងដើម្បីសិទ្ធិមនុស្ស និងលទ្ធិប្រជាធិបតេយ្យ និយាយប្រាប់វីអូអេនៅថ្ងៃអង្គារថា លោកនាយករដ្ឋមន្ត្រីគួរយកចំណុចល្អធ្វើជាគំរូទើបប្រជាជនស្រឡាញ់ច្រើន។ លោកបន្តថាលោកនាយករដ្ឋមន្ត្រីហ៊ុន សែន មិនអាចយកវិធានការទប់ស្កាត់អំពើហិង្សាក្នុងពេលបាតុកម្មនៅស.រ.អា.ទៅប្រៀបធៀបនឹងការបង្ក្រាបដោយនៅប្រទេសកម្ពុជា ដែលមានការបាញ់ស្លាប់បាតុករនោះទេ។
«ស្រុកអាមេរិកាំងមានច្បាប់ត្រឹមត្រូវច្រើន ហើយគេធ្វើហ្នឹង គេមានច្បាប់ចាប់ បើសិនធ្វើខុស។ ហើយយើងទៅប្រៀបធៀប ដូចខ្ញុំឃើញតាមវីដេអូ បាតុកម្មស្រុកខ្មែរ ខ្ញុំឃើញប៉ូលិសយកដែក យកអីទៅវ៉ៃមនុស្សច្បាស់ៗហ្មង ដូចថា ជាក់ស្តែងហ្មងណា៎។ អាហ្នឹងមើលទៅឃើញថា ឃោរឃៅខ្លាំង។ នៅស.រ.អា.គេចាប់មនុស្សចាប់អី លើកលែងតែមនុស្សនោះតដៃតអីវ៉ៃមកគេ ហើយគេមិនវ៉ៃជាក់ស្តែងអីយ៉ាងនេះទេ។ គេខំចាប់តាមសម្រួល បាទ»។
លោកនិយាយថា នៅស.រ.អា.មានតុល្យភាពអំណាច ហើយតុលាការស.រ.អា.ឯករាជ្យពីអំណាចប្រធានាធិបតី។ ប្រព័ន្ធតុលាការនៅស.រ.អា.មិនចេះតែធ្វើតាមវិធានការនីតិប្រតិបត្តិរបស់លោកប្រធានាធិបតី Donald Trump នោះទេ។
«នៅស្រុកអាមេរិកដូចលោក Donald Trump អីអញ្ចឹងគាត់ខំធ្វើប្រទ្រូលប្រត្រាស់ ប៉ុន្តែគេនៅមានតុលាការរបស់គេ នៅមានរដ្ឋសភារបស់គេ។ ប្រធានាធិបតីមានអំណាចមួយចំណែក តុលាការមានអំណាចមួយចំណែករដ្ឋសភាមានអំណាចមួយចំណែកដែរ។ ប្រទេសខ្មែរយើងអង្គការជាច្រើនដាក់ពិន្ទុខ្មែរយើងថា ប្រទេសអត់មានសេរីភាព អត់មានច្បាប់អីត្រឹមត្រូវ ពីព្រោះ តុលាការ រដ្ឋសភា ព្រឹទ្ធសភាអី អត់មានអំណាចទៅទប់ទល់លោក[នាយករដ្ឋមន្ត្រី] ម៉្លោះហើយធ្វើឲ្យគេមើលឃើញថា ប្រទេសខ្មែរហ្នឹងដើរតាមដូចជាថាអំណាចផ្តាច់ការ»។
របាយការណ៍អង្គការការពារសិទ្ធិមនុស្សអន្តរជាតិ Amnesty International ក៏បានបង្ហាញកង្វល់ថា ប្រទេសនានាដែលធ្លាប់ជួយលើកស្ទួយប្រជាធិបតេយ្យហាក់ដូចជាបិទភ្នែកមិនមើលគ្រោះថ្នាក់ខាងសិទ្ធិមនុស្ស ហើយបន្ថយការតាំងចិត្តគាំទ្រផ្នែកសិទ្ធិមនុស្ស៕