ការប្រយុទ្ធគ្នាតាមផ្លូវគោកនិងការវាយប្រហារតាមផ្លូវអាកាសនៅបន្តទៅមុខកាលពីយប់ថ្ងៃសៅរ៍ឈានចូលថ្ងៃអាទិត្យនៅក្នុងតំបន់ហ្កាហ្សា (Gaza)។
មន្ទីរពេទ្យ Shifa ដែលជាមន្ទីរពេទ្យធំជាងគេបង្អស់នៅក្នុងតំបន់ហ្កាហ្សា ត្រូវបានហ៊ុមព័ទ្ធទាំងស្រុង។ នេះបើតាមការបញ្ជាក់របស់លោក Mohammad Abu Salmiya ដែលជាប្រធានមន្ទីរពេទ្យនេះកាលពីយប់ថ្ងៃសៅរ៍។
ទារកពីរនាក់បានស្លាប់កាលពីថ្ងៃសៅរ៍នៅឯមន្ទីរពេទ្យ Shifa នេះ ហើយទារករាប់សិបនាក់ទៀតប្រឈមនឹងហានិភ័យនៅពេលដែលមិនមានប្រេងឥន្ធនៈសម្រាប់ម៉ាស៊ីនភ្លើង។
លោក Abu Salmiya បានថ្លែងតាមទូរសព្ទដោយមានឮសូរស្នូកាំភ្លើងនិងការផ្ទុះថា៖ «គ្រឿងបរិក្ខារពេទ្យលែងដំណើរការ។ អ្នកជំងឺ ជាពិសេសអ្នកដែលស្ថិតក្នុងបន្ទប់ព្យាបាលដិតដល់ បានចាប់ផ្ដើមស្លាប់»។
នាយករដ្ឋមន្ត្រីអ៊ីស្រាអែលលោក Benjamin Netanyahu បានបដិសេធយ៉ាងខ្លាំងក្លាចំពោះការអំពាវនាវឱ្យមានកិច្ចឈប់បាញ់គ្នាណាដែលមិនរួមបញ្ចូលនូវការដោះលែងចំណាប់ខ្មាំងដែលក្រុមហាម៉ាស់ (Hamas) បានចាប់យកទៅក្នុងអំឡុងពេលដែលក្រុមនេះឆ្មក់វាយប្រហារដ៏ភ្ញាក់ផ្អើលលើអ៊ីស្រាអែលកាលពីថ្ងៃទី ៧ ខែតុលា។
អង្គការគ្រូពេទ្យគ្មានព្រំដែន (MSF) បានបញ្ជាក់ថា មន្ទីរពេទ្យនៅក្នុងតំបន់ហ្កាហ្សាបានរង «ការបាញ់ផ្លោងដាក់ឥតឈប់ឈរ»។
អង្គការនេះបន្ថែមថា មន្ទីរពេទ្យ Shifa បានរងការបាញ់ផ្លោងដាក់ជាច្រើនដង ដែលក្នុងនោះផ្នែកសម្រាលកូននិងផ្នែកពិនិត្យព្យាបាលជំងឺក៏បានរងការបាញ់ផ្លោងផងដែរ ដែលបណ្ដាលឱ្យមានអ្នកស្លាប់និងរងរបួសជាច្រើន។
ស្របពេលនេះដែរ លោក Netanyahu បានច្រានចោលនូវគំនិតដែលចង់ឱ្យអាជ្ញាធរប៉ាឡេស្ទីនគ្រប់គ្រងលើតំបន់ហ្កាហ្សានៅពេលណាដែលសង្គ្រាមរវាងអ៊ីស្រាអែលនិងក្រុមហាម៉ាស់បញ្ចប់ទៅ។ គោលជំហរបស់លោក Netanyahu នេះគឺផ្ទុយពីគោលជំហរបស់រដ្ឋបាលប្រធានាធិបតីសហរដ្ឋអាមេរិកលោក Joe Biden។
លោក Netanyahu បាននិយាយនៅឯសន្និសីទកាសែតមួយកាលពីថ្ងៃសៅរ៍ថា៖ «ចាំបាច់ត្រូវមានអ្វីមួយផ្សេងនៅទីនោះ»។ លោកថ្លែងដូច្នេះនៅពេលដែលដែលគេសួរថាតើអាជ្ញាធរប៉ាឡេស្ទីនដែលមានការគ្រប់គ្រងផ្នែករដ្ឋបាលមួយផ្នែកនៅក្នុងតំបន់ West Bank ដែលជាតំបន់កាន់កាប់ដោយអ៊ីស្រាអែល អាចនឹងគ្រប់គ្រងតំបន់ហ្កាហ្សាបន្ទាប់ពីសង្គ្រាមចប់ឬក៏អត់។
លោក Netanyahu បន្ថែមថា៖ «នឹងមិនមានអាជ្ញាធរស៊ីវិលណាដែលអប់រំក្មេងជំនាន់ក្រោយឱ្យស្អប់អ៊ីស្រាអែល ឱ្យសម្លាប់ប្រជាជនអ៊ីស្រាអែល ឱ្យកម្ទេចប្រទេសអ៊ីស្រាអែលបានទេ»។
កាលពីថ្ងៃពុធសប្ដាហ៍មុន រដ្ឋមន្ត្រីការបរទេសសហរដ្ឋអាមេរិកលោក Antony Blinken បានបង្ហាញអំពីលក្ខខណ្ឌសម្រាប់រដ្ឋាភិបាលក្រោយសង្គ្រាមសម្រាប់ដែនដីប៉ាឡេស្ទីន។
លោកបាននិយាយថា៖ «រដ្ឋាភិបាលនោះត្រូវតែមានការគ្រប់គ្រងដែលដឹកនាំដោយប៉ាឡេស្ទីន ហើយតំបន់ហ្កាហ្សាត្រូវបង្រួបបង្រួមជាមួយនឹងតំបន់ West Bank នៅក្រោមអាជ្ញាធរប៉ាឡេស្ទីន»។
ទាហានអ៊ីស្រាអែលបានប្រយុទ្ធជាមួយនឹងខ្មាន់កាំភ្លើងក្រុមហាម៉ាស់នៅខាងក្រៅមន្ទីរពេទ្យ Shifa កាលពីថ្ងៃសោរ៍ ដោយធ្វើឱ្យអ្នករងរបួសដោយសារសង្គ្រាម បុគ្គលិកសុខាភិបាល និងជនស៊ីវិលដែលរត់ភៀសខ្លួនរាប់ពាន់នាក់ជាប់ផុងនៅក្នុងការប្រយុទ្ធនេះ។
មន្ត្រីអ៊ីស្រាអែលលោកវរសេនីយ៍ឯក Moshe Tetro បានបញ្ជាក់ថាពិតជាមានការប្រយុទ្ធគ្នានៅខាងក្រៅមន្ទីរពេទ្យនេះប្រាកដមែន ប៉ុន្តែបានបដិសេធថាមន្ទីរពេទ្យ Shifa មិនស្ថិតក្រោមការឡោមព័ទ្ធឬក៏ការវាយប្រហារដោយផ្ទាល់ណាមួយទេ។
លោកបានបន្ថែមថា លោកបានទាក់ទងជាមួយនឹងប្រធានមន្ទីរពេទ្យនិងបានផ្ដល់ការធានាសុវត្ថិភាពចំពោះការចាកចេញពីមន្ទីរពេទ្យនេះសម្រាប់អ្នកណាដែលចង់ចាកចេញតាមផ្នែកខាងកើតនៃមន្ទីរពេទ្យនេះ៕
អ្នកឆ្លើយឆ្លងព័ត៌មានរបស់ VOA ប្រចាំអង្គការសហប្រជាជាតិអ្នកស្រី Margaret Besheer រួមចំណែកនៅក្នុងសេចក្ដីរាយការណ៍នេះ។ ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន Reuters និងទីភ្នាក់ងារសារព័ត៌មាន AFP។