មិនដល់៣ខែផង នៅពេលដែលលោកប្រធានាធិបតីសហរដ្ឋអាមេរិក បារ៉ាក់ អូបាម៉ា កាន់តំណែងជាប្រធានាធិបតី លោកបានសម្លឹងមើលមនុស្សដែលប្រមូលផ្តុំគ្នានៅទីលាន Hradcany នៃទីក្រុងប្រាក ហើយបានប្រាប់មនុស្សទាំងនោះថា ក្នុងឋានៈជាប្រទេសមួយដែលបានប្រើអាវុធនុយក្លេអ៊ែរ សហរដ្ឋអាមេរិកមានការទទួលខុសត្រូវខាងសីលធម៌ដើម្បីដឹកនាំពិភពលោកឆ្ពោះទៅកាន់ការគ្មានអាវុធនុយក្លអ៊ែរនេះ។
លោកប្រធានាធិបតី អូបាម៉ា បានមានប្រសាសន៍ថា «នៅពេលដែលអាវុធនុយក្លេអ៊ែរ បានផ្ទុះនៅក្នុងទីក្រុងណាមួយ អាចនៅក្នុងទីក្រុងញូវយ៉ក ឬមូស្គូ អ៊ីស្លាម៉ាបាដ ឬម៉ុមបៃ តូក្យូ ឬតែលអាវីវ ប៉ារីស ឬទីក្រុងប្រាក អាចសម្លាប់មនុស្សរាប់សែននាក់។ ហើយ មិនថាតើអាវុធនុយក្លេអ៊ែរនោះផ្ទុះឡើងនៅទីណាទេ ផលវិបាកសម្រាប់សុវត្ថិភាព សន្តិសុខ សង្គម សេដ្ឋកិច្ចរបស់យើង និងចំពោះការរស់នៅរបស់យើង នឹងគ្មានទីបញ្ចប់»។
ចាប់តាំងពីសុន្ទរកថានោះមក មានសន្និសីទកំពូលអន្តរជាតិជាបន្តបន្ទាប់ស្តីពីសន្តិសុខនុយក្លេអ៊ែរនៅឆ្នាំ២០១០ ២០១២ និង២០១៤ដែលជំរុញប្រទេសរាប់សិបឲ្យបង្កើនសន្តិសុខសំភារៈនុយក្លេអ៊ែររបស់ខ្លួនដល់ការរារាំងកុំឲ្យសំភារៈនុយក្លេអ៊ែរទាំងនោះធ្លាក់ចូលក្នុងកណ្តាប់ដៃពួកភេរវជន។ ក៏ប៉ុន្តែ ទោះបីមានការជឿនលឿនយ៉ាងនោះក្តី ការងារស្តីពីគោលដៅដ៏សំខាន់របស់សន្និសីទកំពូលនោះ នៅមិនទាន់ចប់នៅឡើយ។
លោកប្រធានាធិបតី អូបាម៉ា បានមានប្រសាសន៍នៅក្នុងសុន្ទរកថារបស់លោកនៅឆ្នាំ២០០៩ថា ពួកភេរវជនទទួលបានអាវុធនុយក្លេអ៊ែរ ជាការគំរាមកំហែងជាបន្ទាន់និងខ្លាំងបំផុតដល់សន្តិសុខសាកលលោក។
ដើម្បីកាត់បន្ថយឱកាសនៃការកើតមានឡើងបញ្ហានេះ អ្នកដែលចូលសន្និសីទកំពូល បានផ្តោតលើការការពារទីកន្លែងដែលប្រើប្រាស់ឧបករណ៍នុយក្លេអ៊ែរ និងវិទ្យុសកម្មហើយនិងកាត់បន្ថយការស្តុកទុកឧបករណ៍នុយក្លេអ៊ែរទាំងនោះដើម្បីធ្វើកុំឲ្យគេលួចបាន៕