កាលពីថ្ងៃអង្គារ ធនាគារពិភពលោកបានឲ្យដឹងថា ខ្លួននឹងឈប់ផ្តល់ប្រាក់កម្ចីដល់កម្ពុជា រហូតដល់រដ្ឋាភិបាលមានដំណោះស្រាយជាមួយនឹងប្រជាពលរដ្ឋរាប់ពាន់នាក់ដែលរងការប៉ះពាល់ពីការបណ្តេញចេញដោយសារគម្រោងអភិវឌ្ឈន៍ដ៏ធំមួយ។
នាយកធនាគារពិភពលោកប្រចាំកម្ពុជាលោកស្រី អាណ្ណែត្តិ៍ ឌិកសុន (Annette Dixon) និយាយថាតាំងពីខែធ្នូមក ធនាគារពិភពលោកមិនបានផ្តល់ប្រាក់កម្ចី ហើយនឹងមិនយល់ព្រមផ្តល់ប្រាក់កម្ចីបន្ថែមទៀតទេ រហូតដល់រដ្ឋាភិបាលទីក្រុងភ្នំពេញយល់ព្រមផ្តល់សំណងដល់អ្នករស់នៅតាមតំបន់បឹងកក់។
លោកស្រី អាណ្ណែត្តិ៍ ឌិកសុន និយាយថា ធនាគារពិភពលោកបន្តលើកទឹកចិត្តរដ្ឋាភិបាលកម្ពុជាឲ្យឈានដល់ការព្រមព្រៀងក្នុងការផ្តល់លំនៅដ្ឋាននៅនឹងកន្លែងសម្រាប់អ្នកតំបន់បឹងកក់ដែលនៅសល់ទាំងប៉ុន្មាន។
កាលពីពីរឆ្នាំមុន តំបន់បឹងកក់ក្នុងកណ្តាលទីក្រុងភ្នំពេញជាលំនៅដ្ឋានរបស់ប្រជាពលរដ្ឋ៤.០០០ គ្រួសារ។ បច្ចុប្បន្ននេះ ប្រជាពលរដ្ឋ១.០០០ គ្រួសារបានចាកចេញពីតំបន់នេះ ហើយការចាក់ខ្សាច់បំពេញក៏ជិតចប់ផងដែរ។
ក្រុមសិទ្ធិមនុស្សនិយាយថា ការអភិវឌ្ឍបានបន្តដំណើរការដោយមិនស្របច្បាប់តាំងពីការចាប់ផ្តើមដំបូងម្ល៉េះ។ ពួកគេនិយាយថា ប្រជាពលរដ្ឋត្រូវបានជម្លាសចេញដោយមិនមានសំណងសមរម្យ ហើយការគំរាមកំហែងបែបហិង្សាដោយអាជ្ញាធរនៅតែមាន។
អស់រយៈពេលជាច្រើនឆ្នាំមកហើយ អ្នករស់នៅតំបន់បឹងកក់បានស្វះស្វែងរកឯកសារបញ្ជាក់ប្លង់ដីពីអាជ្ញាធរតាមរយៈគម្រោងមួយដែលឧបត្ថម្ភដោយធនាគារពិភពលោក។ ទោះបីប្រជាពលរដ្ឋកម្ពុជារាប់សែននាក់បានទទួលប្លង់ដីក៏ដោយ ក៏អ្នកដែលរស់នៅតំបន់បឹងកក់នៅតែមិនទាន់បាទទទួល។
កាលពីដើមឆ្នាំនេះ ធនាគារពិភពលោកបានទទួលស្គាល់ថា ខ្លួនបានធ្វើឲ្យអ្នករស់នៅតំបន់បឹងកក់ខកចិត្ត ហើយបានជូនដំណឹងស្ងាត់ៗដល់រដ្ឋាភិបាលក្រុងភ្នំពេញឲ្យដោះស្រាយបញ្ហានេះ។ ធនាគារពិភពលោកបានឲ្យដឹងថា បើមិនដូច្នេះទេ ខ្លួននឹងពិចារណាឡើងវិញនូវកម្មវិធីរបស់ខ្លួននៅកម្ពុជា។
របាយការណ៍ថ្ងៃនេះបង្ហាញថា ធនាគារពិភពលោកបានបន្តគាំទ្រអ្នកនៅតំបន់បឹងកក់ទៅតាមការសន្យារបស់ខ្លួន។
លោក សៀ ភារម្យ ជានាយកអង្គការក្រុមការងារពិសេសការពារសិទ្ធិលំនៅដ្ឋាន ដែលជាអង្គការក្នុងស្រុកធ្វើការផ្តល់ដំបូន្មានដល់អ្នករស់នៅតំបន់បឹងកក់អំពីសិទ្ធិរបស់ពួកគេ។ លោកនិយាយថា កាលពីដើមឆ្នាំនេះក្រុមមន្រ្តីក្នុងស្រុកបានចាប់ផ្តើមប្រជុំជាមួយអ្នករស់នៅតំបន់បឹងកក់ ហើយភាគីទាំងសងខាងបានសម្រេចលើកិច្ចការមួយចំនួនរួចហើយ។ លោកថ្លែងថា៖
«យើងឃើញថា ផ្នែកខ្លះ ចំណុចខ្លះ មានដំណើរការទៅមុខ ហើយផ្នែកខ្លះមិនមានដំណើរការទៅមុខទេ។ វាហាក់ដូចជាមានដំណើរការយឺត ហើយប្រជាពលរដ្ឋនៅតែមានការភ័យខ្លាចចំពោះការបណ្តេញចេញ ដោយហេតុថាក្នុងអំឡុងពេលធ្វើការវាស់វែងដីធ្លី សន្តិសុខក្រុមហ៊ុនព្យាយាមបញ្ចុះបញ្ចូល ឬគំរាមកំហែងប្រជាពលរដ្ឋឲ្យរើលំនៅដ្ឋានដោយទទួលបានតែសំណងបន្តិចបន្តួចប៉ុណ្ណោះ។ ហេតុដូច្នេះហើយបានជាយើងឃើញថា ផ្នែកខ្លះមានលទ្ធផលល្អ ឯផ្នែកខ្លះមិនមានលទ្ធផលល្អនោះទេ។ ទោះជាយ៉ាងណាក៏ដោយ ក៏សហគមន៍មានសាមគ្គីភាពជាមួយគ្នាដែរ»។
ក្នុងអំឡុងពេលប៉ុន្មានឆ្នាំថ្មីៗនេះ កម្ពុជាកំពុងអភិវឌ្ឈយ៉ាងលឿន ហើយតម្លៃដីធ្លីមានការកើនឡើងយ៉ាងរហ័សផងដែរ។ អ្នករិៈគន់និយាយថា ករណីនេះបានបង្កឲ្យមានការដណ្តើមយកដីធ្លីជាបន្តបន្ទាប់ និងធ្វើឲ្យប្រជាពលរដ្ឋរាប់ពាន់គ្រួសារបាត់បង់ផ្ទះសម្បែង។
រាជធានីភ្នំពេញបានផ្លាស់ប្តូរយ៉ាងរហ័ស។ កាលពីទសវត្សរ៍មុន សំណង់អនាធិបតេយ្យត្រូវបានកម្ទេចចោល ហើយអ្នករស់នៅតំបន់នោះទាំងប៉ុន្មានត្រូវបានជម្លៀសចេញពីទីក្រុង។ បច្ចុប្បន្ននេះ យើងឃើញមានអគារខ្ពស់ៗ និងអគារផ្ទះល្វែង។
ក្រុមហ៊ុនទាំងឡាយនៅពីក្រោយការអភិវឌ្ឍតំបន់បឹងកក់មានទំនាក់ទំនងយ៉ាងជិតស្និទ្ធជាមួយគ្នា។ ក្រុមហ៊ុនមួយកាន់កាប់ដោយសមាជិកព្រឹទ្ធសភាមកពីគណបក្សប្រជាជនកម្ពុជាដែលជាគណបក្សកាន់អំណាច។ មួយទៀតគឺជាក្រុមហ៊ុនមកពីប្រទេសចិន ដែលជាប្រទេសផ្តល់ប្រាក់រាប់ពាន់លានដុល្លារដល់កម្ពុជាក្នុងរយៈប៉ុន្មានឆ្នាំថ្មីៗនេះ។
មន្ត្រីរាជរដ្ឋាភិបាលកម្ពុជានិយាយថាពួកគេមិនខ្វល់ពីតួនាទីរបស់ធនាគារពិភពលោកទេ។ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី និយាយថា ធនាគារពិភពលោកបានធ្វើហួសអជ្ញាធររបស់ខ្លួនក្នុងការទទូចឲ្យរាជរដ្ឋាភិបាលក្រុងភ្នំពេញធ្វើតាមលក្ខ័ណ្ឌទាំងអស់នោះ។ លោកនិយាយថាតួនាទីតែមួយគត់របស់រាជរដ្ឋាភិបាលចំពោះធនាគារពិភពលោកគឺការសងបំណុលដែលខ្លួនបានខ្ចីពីធនាគារ ហើយលក្ខខណ្ឌលើកម្ចីមួយមិនគួរប៉ះពាល់ដល់កម្ចីផ្សេងៗទៀតឡើយ។
លោក សៀ ភារម្យ នៃអង្គការក្រុមការងារពិសេសសិទ្ធិលំនៅដ្ឋាន បញ្ជាក់ថា អ្នករស់នៅតំបន់បឹងកក់ចង់ឲ្យធនាគារពិភពលោកធ្វើការផ្តល់ប្រាក់កម្ចីឡើងវិញ នៅពេលដែលដំណោះស្រាយត្រូវបានរកឃើញ។ លោកមានប្រសាសន៍ថា៖
«ខ្ញុំគិតថា ប្រសិនបើនរណាម្នាក់និយាយអំពីបញ្ហាបឹងកក់ យ៉ាងហោចណាស់រដ្ឋាភិបាលនឹងពិចារណាឡើងវិញ និងធ្វើការបន្ថែមទៀតដើម្បីបង្កើននូវការដោះស្រាយបញ្ហារបស់ប្រជាពលរដ្ឋ ដែលជាម្ចាស់សន្លឹកឆ្នោតរបស់ខ្លួន»។
រយៈពេលប៉ុន្មានសប្តាហ៍ និងប៉ុន្មានខែខាងមុខនេះនឹងបង្ហាញឲ្យឃើញថាតើឱសានវាទរបស់ធនាគារពិភពលោកនឹងជួយស្វែងរកដំណោះស្រាយមួយ ឬក៏អត់៕
ប្រែសម្រួលដោយ លី ម៉ូរីវ៉ាន់