ម្ចាស់កាសែត The Washington Post លោក Jeff Bezos កាលពីថ្ងៃចន្ទ ការពារការសម្រេចរបស់កាសែតដែលមិនគាំទ្របេក្ខជនប្រធានាធិបតីសហរដ្ឋអាមេរិក បន្ទាបពីមានសេចក្តីរាយការណ៍ថា មនុស្សជាង ២សែននាក់បានលុបចោលការជៀវកាសែតតាមអនឡាញរបស់ពួកគេ ក្រោយចំណាត់ការនេះ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
ការសម្រេចបានបិទការគាំទ្រអនុប្រធានាធិបតីខាងគណបក្សប្រជាធិបតេយ្យ គឺអ្នកស្រី Kamala Harris។ នេះបើតាមសេចក្តីរាយការណ៍របស់វិទ្យុសាធារណៈជាតិឬ National Public Radio (NPR)។ ហើយមនុស្សជាច្រើនដែលបានសរសេរសារនៅលើ Website របស់កាសែតនោះ បានរិះគន់លោក Bezos មហាសេដ្ឋីដែលជាអ្នកបង្កើនក្រុមហ៊ុន Amazon និងក្រុមហ៊ុនរ៉ុក្កែត Blue Origin។
លោក Bezos នៅក្នុងទំព័របញ្ចេញមតិកាលពីថ្ងៃចន្ទបាននិយាយថា«មនុស្សជាច្រើនជឿថាបណ្តាញព័ត៌មានមានការលម្អៀង» ហើយកាសែត Washington Post និងកាសែតផ្សេងទៀតចាំបាច់បង្កើនជំនឿទុកចិត្តរបស់ខ្លួនវិញ។
លោកលោក Bezos បាននិយាយទៀតថា មិនមានបេក្ខជនត្រូវបានជូនព័ត៌មានឬពិគ្រោះយោបល់អំពីការសម្រេចនេះ ហើយថាមិនមាន«ការដោះដូរទៅវិញទៅមក»ទេ។ លោកបានបន្ថែមទៀតថា មិនមានការទាក់ទិនទៅវិញទៅមករវាងការសម្រេចនេះ និងជំនួបរវាងបេក្ខជនគណបក្សសាធារណរដ្ឋលោក Donald Trump និងអគ្គនាយកក្រុមហ៊ុន Blue Origin នៅថ្ងៃតែមួយទេ។
លោក Bezos បានសរសេរទៀតថា«ការផ្តល់ការគាំទ្របេក្ខជនប្រធានាធិបតីមិនមានទម្ងន់ដល់ការបោះឆ្នោតទាល់តែសោះ។ អ្វីដែលការផ្តល់ការគាំទ្របេក្ខជនប្រធានាធិបតីប្រាកដ គឺបង្កើតទស្សនៈថាមានការលម្អៀង។ ទស្សនៈមិនឯករាជ្យ។ ការបញ្ចប់ការគាំទ្រនេះ ជាការសម្រេចប្រកបដោយគោលការណ៍ ហើយវាជាការត្រឹមត្រូវមួយ»។
ការលប់ចោលការជាវកាសែតនៅពាក់កណ្តាលថ្ងៃត្រង់មានប្រហែល ៨ភាគរយនៃពួកអ្នកជាវកាសែតដែលបង់ប្រាក់ចំនួន ២លាន៥សែននាក់។ នេះបើតាមសេចក្តីរាយការណ៍របស់វិទ្យុ NPR ដែលបាននិយាយថា អ្នកសរសេរទស្សនៈនៅលើកាសែតនេះមួយចំនួន ក៏បានលាលែងចេញពីតួនាទីរបស់ខ្លួនដើម្បីតវ៉ាប្រឆាំង។
កាសែត The Washington Post បានបដិសេធមិនធ្វើអត្ថាធិប្បាយស្តីពីសេចក្តីរាយការណ៍នេះនៅពេលដែលទីភ្នាក់ងារសារព័ត៌មាន Reuters ធ្វើការទាក់ទងទៅ៕