ភ្ជាប់​ទៅ​គេហទំព័រ​ទាក់ទង

អ្នក​ភូមិ​រង​របួស​ក្នុង​ការ​ប៉ះ​ទង្គិច​ជាមួយ​​កម្លាំង​សន្តិសុខ


ក្រុម​មន្រ្តី​សិទ្ធិ​មនុស្ស​បាន​និយាយ​ថា​ ​យ៉ាងតិច​មាន​ប្រជា​ពលរដ្ឋ​ចំនួន​ពីរ​រូប​ ​បាន​រង​របួស​ គឺ​មា្នក់​ត្រូវ​បាន​សន្តិសុខ​វ៉ៃ​ឲ្យ​រង​របួស​យ៉ាង​ធ្ងន់ធ្ងរ​ និង​ម្នាក់​ទៀត​បាន​ដួល​សន្លប់។

ភ្នំពេញ៖មន្ត្រី​សិទ្ធិ​មនុស្ស​និង​សាក្សី​ឃើញ​ផ្ទាល់​ភ្នែក​បាន​និយាយថា​ ​យ៉ាង​តិច​មាន​ប្រជា​ពលរដ្ឋ​ម្នាក់​រង​របួស​និង​ម្នាក់​ទៀត​បាន​ដួល​សន្លប់​នៅ​ក្នុង​ការ​ប៉ះ​ទង្គិច​គ្នា​រវាង​ប្រជា​ពលរដ្ឋ​នៅ​ស្រុក​ស្រែ​អំបិល​ ​ខេត្ត​កោះកុង​ ​និង​សន្តិសុខ​របស់​ក្រុម​ហ៊ុន​ហេង ហ៊ុយ។​ ​ការ​ប៉ះ​ទង្គិច​នេះបាន​កើត​ឡើង​ក្រោយ​ពី​សន្តិសុខរបស់​ក្រុម​ហ៊ុន​ប្រមាណ​១០​នាក់ បាន​ព្យាយាម​បុក​ទម្លុះ​របង​ដី​របស់​ប្រជា​ពល​រដ្ឋ​ដែល​ឈរ​ការពារ​ពី​ម្ចាស់​ដី។​ ​ក៏ប៉ុន្តែ​ហេតុ​ការណ៍​នេះ ពុំ​បណ្តាល​ឲ្យ​មាន​គ្រោះ​ថ្នាក់​ធ្ងន់​ធ្ងរ​ដល់​អាយុ​ជីវិត​ទេ។

«អយុត្តិ​ធម៌​ចំពោះ​ក្រុម​គ្រួសារ​ខ្ញុំ​ណាស់។ វា​វ៉ៃ​ខ្ញុំ»។

អ្នកស្រី​ឈុន វ៉ាន់​ ​អាយុ​៤៩​ឆ្នាំ​ ​រស់​នៅ​ភូមិ​ព្រែក​ជីក​ ឃុំ​ជី​ខ​ក្រោម​ ​ស្រុក​ស្រែអំបិល​ ​ខេត្ត​កោះកុង​ ​បាន​ទ្រហោ​យំ​ដើម្បី​រក​យុត្តិធម៌​ ក្រោយ​ពី​កូនស្រី​របស់​អ្នកស្រី​ត្រូវ​បាន​សន្តិសុខ​ក្រុមហ៊ុន​ហេង ហ៊ុយ ​វាយ​ឲ្យ​រង​របួស។

អ្នកស្រី​បាន​និយាយ​ទាំង​ទុក្ខ​សោក​ថា​ ​លោក​ហេង ហ៊ុយ​ ប្រធាន​ក្រុមហ៊ុន​ហេង ហ៊ុយ​ ​បាន​បញ្ជា​ឲ្យ​សន្តិ​សុខ​ទម្លុះ​របង​ផ្ទះ​អ្នកស្រី​ដើម្បី​យក​កូន​ដំឡូងមី​ទៅ​ដាំ​លើ​ដី​របស់​លោក។

«លោក​ហេង ហ៊ុយ​បញ្ជា​ឲ្យ​កូនចៅវា​បើក​របង​និង​ចេញ​បញ្ជា​ថា​ ​ធ្វើ​វា​ឲ្យ​បាន។​ ​ខ្ញុំ​មិន​សុខ​ចិត្ត​ទេ។​ ខ្ញុំ​មិន​ឲ្យ​ដី​នេះ​ទេ»។

ក្រុម​ហ៊ុន​ហេង ហ៊ុយ​មាន​ផ្ទៃដី​សរុប​ប្រមាណ​៧៧៩​ហិចតាសម្រាប់​ធ្វើ​ការ​អភិវឌ្ឍ​ដាំ​ដើម​អំពៅ​ ​និងដើម​ដំឡូងមីនៅ​ស្រុក​ស្រែ​អំបិល​ ​ខេត្ត​កោះកុង។

ប្រជា​ពលរដ្ឋ​និយាយ​ថា​ ​ក្រុមហ៊ុន​ហេង ហ៊ុយ​បាន​រំលោភ​យក​ដី​ប្រជា​ពលរដ្ឋ​ចំនួន​១០៩​ហិចតា​ ដែល​ជា​កម្ម​សិទ្ធិ​របស់​ពួក​គេ​ចំនួន​៣១​គ្រួសារ​ ​នៅ​ឃុំ​ជី​ខ​ក្រោម​ ​ស្រុក​ស្រែអំបិល។

វិវាទ​ដីធ្លី​បាន​អូស​បន្លាយ​ជា​ច្រើន​ឆ្នាំ​មក​ហើយ​រវាង​ប្រជា​ពលរដ្ឋ​ ​នៅ​ឃុំ​ជី​ខ​ក្រោម​ជាមួយ​នឹង​ក្រុម​ហ៊ុន​ហេង ហ៊ុយ​នេះ។​ ​ហើយ​នៅ​ថ្ងៃ​ពុធ ​បញ្ហា​នេះ​ បាន​កម្រើក​សារ​ជា​ថ្មី​ម្តង​ទៀត​ ​ទើប​ឈាន​រហូត​ដល់​ផ្ទុះ​អំពើ​ហិង្សា​រវាង​ភាគី​ទាំង​ពីរ។

ក្រុម​មន្រ្តី​សិទ្ធិ​មនុស្ស​បាន​និយាយ​ថា​ ​យ៉ាងតិច​មាន​ប្រជា​ពលរដ្ឋ​ចំនួន​ពីរ​រូបបាន​រង​របួស​ គឺ​មា្នក់​ត្រូវ​បាន​សន្តិសុខ​វ៉ៃ​ឲ្យ​រង​របួស​យ៉ាង​ធ្ងន់ធ្ងរ​ និង​ម្នាក់​ទៀត​បាន​ដួល​សន្លប់។

លោក​ព្រំ កៀង​ ​មន្រ្តី​ផ្នែក​ស៊ើប​អង្កេត​របស់​អង្គការ​សិទ្ធិ​មនុស្ស ​LICADHO​ ប្រចាំ​ខេត្ត​កោះកុងបាន​និយាយ​ថា​ ​ជន​រងគ្រោះ​ឈ្មោះ​យី គន្ធា​ អាយុ​២៤​ឆ្នាំ​ ​ត្រូវ​បាន​សន្តិសុខ​វ៉ៃ​ចំ​ក្បាល​បណ្តាល​ឲ្យ​របួស​យ៉ាង​ធ្ងន់ធ្ងរ​ ​និង​អ្នកស្រី​គង់ ងីន ​អាយុ​៧៥​ឆ្នាំ​ ​ដែល​ត្រូវ​ជា​យាយ​បង្កើត​របស់​អ្នកស្រី​យី គន្ធា​ ​បាន​ដួល​សន្លប់​ដោយ​សារ​តែភ័យនឹង​ព្រឹត្តិ​ការណ៍​នេះ។

លោក​បាន​មាន​ប្រសាសន៍​ថា​ ​ហេតុ​ការណ៍​នេះបាន​កើត​មាន​ឡើង​ដោយសារ​តែ​សន្តិសុខ​របស់​ក្រុម​ហ៊ុន​ហេង ហ៊ុយ​បាន​ព្យាយាមទម្លុះ​ទ្វារ​របង​ផ្ទះ​របស់​អ្នកស្រី​ឈុន វ៉ាន់ ​ដើម្បី​យក​កូន​ដំឡូងមី​ទៅ​ដាំ​លើ​ដី​របស់​ក្រុមហ៊ុន។

លោក​បាន​មាន​ប្រសាសន៍​ថា​ ​ទង្វើ​ទាំង​នេះ​បាន​រំលោភ​ទៅ​លើ​សិទ្ធិ​របស់​ប្រជា​ពលរដ្ឋ។

«ជា​ការ​រំលោភ​សិទ្ធិ​មនុស្ស​ខ្លាំងណាស់​ ​ពីព្រោះ​រឿង​នេះ​ត្រូវតែ​ដោះស្រាយ​ដោយ​សន្តិ​វិធី​ និង​មិន​ត្រូវ​ប្រើ​កម្លាំង​មក​រំលោភ​ ​មក​ធ្វើបាប​ពួកគាត់​អញ្ចឹង​ទេ​ ​បាទ!»

លោក​ហេង ហ៊ុយ​ ​ប្រធាន​ក្រុម​ហ៊ុន​ហេង ហ៊ុយបាន​និយាយ​ថា​ ​លោក​ពុំ​បាន​បញ្ជា​ឲ្យ​សន្តិសុខ​វាយ​ប្រជា​ពលរដ្ឋ​ទេ។​ ​លោក​បាន​ចោទ​ប្រកាន់​ប្រជា​ពលរដ្ឋ​ថា​ ​បាន​រស់​នៅ​លើដី​ជា​កម្ម​សិទ្ធិ​របស់​លោក​ ដែល​មាន​ប្លង់​កាន់កាប់​ស្រប​ច្បាប់​តាំង​ពី​ឆ្នាំ​១៩៩៣​មក​ម្ល៉េះ។

«ហើយ​មក​ហ្នឹង​ ​នាំគ្នា​មក​រារាំង​ខ្ញុំ ដើម្បី​បំផ្លាញ​ខ្ញុំ។ ​ខ្ញុំ​មក​វិនិយោគ​ឲ្យ​ប្រជាជន​មាន​ការងារ​ធ្វើ​ ​ហើយ​នាំ​គ្នា​មក​រារាំង​ ​មក​នេះ​ អញ្ចឹង​ធ្វើ​ម៉េច​ទៅ?»

ចំណែក​លោក​ទេព ហៃ​ ​ជំទប់​ទី២​ ឃុំ​ជី​ខ​ក្រោម​ ​បាន​មាន​ប្រសាសន៍​ថា​ ​ក្រុមហ៊ុន​ហេង ហ៊ុយ ​ពុំ​បាន​គោរព​ទៅតាម​កិច្ច​សន្យា​របស់​ខ្លួន​ទេ។​ ​លោក​ទេព ហៃ​បាន​មាន​ប្រសាសន៍​ទៀត​ថា​ ​ក្រុមហ៊ុន​ហេង​ ហ៊ុយ​មាន​ផ្ទៃដី​នៅ​ឃុំ​ជី​ខ​លើ ​ក៏ប៉ុន្តែ​បាន​រំលោភ​ដល់​ដី​របស់​ប្រជា​ពលរដ្ឋ​នៅ​ឃុំ​ជី​ខ​ក្រោមផ្សេង​ទៀត៕

XS
SM
MD
LG