ភ្ជាប់​ទៅ​គេហទំព័រ​ទាក់ទង

ការ​រំលោភ​សិទ្ធិ​​បាន​​ធ្វើ​ឱ្យ​ប្រជាពលរដ្ឋ​​ខេត្ត​បាត់ដំបង​​បាត់​​ជំនឿ​​លើ​​ប្រព័ន្ធ​​យុត្តិធម៌​​កម្ពុជា​


ក្រសួងយុត្តិធម៌នៃប្រទេសកម្ពុជា។

ប្រជាពលរដ្ឋ​នៅ​ក្នុង​ខេត្ត​បាត់ដំបង​បាន​លើក​ឡើង​ថា សិទ្ធិ​របស់​ពួកគេ​ក្នុង​ការ​ទទួលបាន​ការ​កាត់​ទោស​ដោយ​យុត្តិធម៌​ ត្រូវ​បាន​រំលោភ​បំពាន។​ ការ​រំលោភ​សិទ្ធិ​នេះ​បាន​ធ្វើឲ្យ​ពួកគេ​បាត់បង់​ជំនឿ​ទុកចិត្តទៅលើ​ប្រព័ន្ធ​យុត្តិធម៌​របស់​កម្ពុជា។

លោក​ ជិម កែវ​ កំពុង​អង្គុយ​នៅ​លើ​គ្រែក្រោម​សំយាប​ផ្ទះ​ឈើ​មួយ​នៅក្នុង​ភូមិ​ រូងអំពិល​ ឃុំ​ខ្នាចរមាស​ ស្រុក​បវិល​ ចម្ងាយ​ជាង​៤០​ គីឡូម៉ែត្រ​ពី​ទី​រួម​ខេត្ត​បាត់ដំបង។

ជា​កសិករ​ស្ថិត​ក្នុង​វ័យ​៥២​ ឆ្នាំ​ លោក​ ជិម កែវ​ ត្រូវ​បាន​តុលាការ​ខេត្ត​បាត់ដំបង​ឃុំខ្លួន​បណ្តោះ​អាសន្ន​និង​កាត់ទោស​ឲ្យ​ជាប់​ពន្ធនាគារចំនួន​ពីរ​លើក​ ដោយសារ​រឿង​ទំនាស់​ដីធ្លីជាមួយ​ថៅកែ​ដី​ម្នាក់​នៅក្នុង​ខេត្ត​នេះ។

លោក​ ជិម កែវ​ និង​អ្នកភូមិ​ចំនួន​១៣ គ្រួសារ​ទៀត​ បាន​តស៊ូ​ខាង​ផ្លូវច្បាប់​ជាមួយ​ថៅកែ​ដី​ដែល​មានទ្រព្យ​ដ៏ស្តុកស្តម​ម្នាក់​តាំងពីឆ្នាំ​១៩៩៩​ ដើម្បី​ទាមទារ​កម្មសិទ្ធិ​ស្របច្បាប់​នៅលើ​ដី​ទំហំ​៧០​ហិកតា​ ដែល​ពួកគេ​បាន​កាប់ឆ្កា​និង​ធ្វើស្រែលើ​តាំងពី​ឆ្នាំ​១៩៩០​មក​ម្ល៉េះ។​ ដីនោះ​ស្ថិតនៅ​ចម្ងាយ​ប្រមាណ​១៣​គីឡូម៉ែត្រ​ពី​ផ្ទះ​របស់​លោក​ ជិម កែវ។

លើក​ដៃ​អាវ​ជូត​ថ្ងាស​បណ្ដើរ​ លោក​ ជិម កែវ​ ឆ្លៀត​រៀបរាប់​បណ្ដើរ​ថា​ លោក​ត្រូវបាន​តុលាការ​ចាប់​ឃុំ​ខ្លួន​ជា​លើក​ទី​១​អស់​រយៈ​ពេល​១១​ខែ​និង​១០​ថ្ងៃ​ចាប់​ពី​ខែ​តុលា​ ឆ្នាំ​២០០៦​ ក្រោម​បទ​ចោទប្រកាន់​ថា ​លោក​បាន​ធ្វើ​ឲ្យ​ប៉ះពាល់​ដល់​កម្មសិទ្ធិ​ឯកជន ក្រោយពេល​ដែល​លោក​បាន​ធ្វើស្រែ​នៅលើ​ដី​ដែល​មាន​ទំនាស់​នោះ។

"ឆ្នាំ២០០៦ ហ្នឹង​ គេ​ចាប់​ហ្នឹង បើតាម​ខ្ញុំ​យល់វិញ គេចាប់​បំបាក់​ស្មារតី​តែម្តង​ សួរ​ស្អី​ក៏​មិនសួរ​ កាត់ក្តី​អីក៏មិនប្រុងកាត់ ទុកចោល​រហូត​ ទុកចោល​ដល់៧ខែ បាន​គេកាត់​ គេ​កាត់ហើយ​ខាងចៅក្រម​គេ​ឲ្យ​ខ្ញុំ​នៅក្រៅ​ឃុំ​បណ្តោះអាសន្ន​ប៉ុន្តែ ខាង​ព្រះរាជអាជ្ញា​គេ​ជំទាស់​គេ​មិនឲ្យ​នៅ គេប្តឹង​ឧទ្ធរណ៍​អញ្ចឹង​នៅជាប់​បន្ថែម​រហូតដល់​១១ខែ ​១០​ថ្ងៃ​ហ្នឹង​បណ្តោយ"។

នៅ​ឆ្នាំ​២០០៧​ លោក​ ជិម កែវ​ ត្រូវ​បាន​ដោះលែង​ឲ្យ​មាន​សេរីភាព​វិញ។​ ប៉ុន្តែ​ នៅ​ក្នុង​ខែ​តុលា​ ឆ្នាំ​២០០៩​ លោក​ ជិម កែវ​ ត្រូវ​បាន​តុលាការ​ចាប់​ខ្លួន​ម្តង​ទៀត​ទៅ​តាម​សាលក្រម​សម្រេច​របស់​សាលា​ឧទ្ធរណ៍​ដោយ​តម្រូវ​ឲ្យ​លោក​ជាប់​ពន្ធនាគារ​រយៈពេល​១ឆ្នាំ​ទៀត​ ពី​បទ​ធ្វើ​ឲ្យ​ប៉ះពាល់​ដល់​ដី​កម្មសិទ្ធិ​ឯកជន​ដដែល។

លោក​ ជិម កែវ​ បាន​អះអាង​ថា ​ការ​បើក​សវនាការ​របស់​សាលា​ឧទ្ធរណ៍​ក្នុង​រឿងក្តីក្តាំ​របស់​លោក​នោះ​បាន​ធ្វើ​ឡើង​ដោយ​គ្មាន​ការ​ជួនដំណឹង​ដល់​រូបលោក​និង​មេធាវី​ការពារក្តី​របស់​លោក​ឲ្យ​បាន​ដឹង​ជាមុន​ឡើយ។

"សាលាឧទ្ធរណ៍​គេ​កាត់​កំបាំងមុខ​ មេធាវី​ក៏​គេ​មិន​ឲ្យដឹង​ ខ្ញុំ​ក៏​គេ​មិន​ឲ្យ​ដឹង​ សម្រេច​មក​ គេ​ចេញ​ដីកា​ចាប់​ខ្លួន​ហ្នឹង​បណ្ដោយ។​ ខ្ញុំ​អត់​បាន​ដឹង​ទេ​គឺ​ គេ​អាន​តែ​ដីកា​ចាប់ខ្លួន​តែម្តង​ អញ្ចឹង​ខ្ញុំ​ក៏​ឲ្យ​គេ​ចាប់​ទៅ"។

លោក​មេធាវី​ ហូ ឆេង អ៊ន​ ប្រធាន​កម្មវិធី​ច្បាប់​ដីធ្លី​នៃ​អង្គការ​ជំនួយ​ផ្នែក​ច្បាប់​នៃ​កម្ពុជា​ មាន​ប្រសាសន៍​ថា​ ប្រសិន​បើ​កង្វះ​ការ​ការពារ​ និង​ការ​រំលោភ​សិទ្ធិ​ជនជាប់ចោទ​នេះ​ចេះ​តែ​បន្ត​តទៅ​ទៀត​ នោះ​កម្ពុជា​នឹង​ក្លាយ​ជា​ប្រទេស​គ្មាន​ច្បាប់​ទម្លាប់​ ដោយសារ​តែ​កង្វះ​ភាព​គួរ​ឲ្យ​ទុកចិត្ត​បាន​ក្នុង​ប្រព័ន្ធ​យុត្តិធម៌​របស់ខ្លួន​នេះ។

"បើ​សិន​ជា​មន្ត្រី​អនុវត្ត​ច្បាប់​ហ្នឹង​ គាត់​មិន​ដើរ​តាម​គន្លង​ច្បាប់​ស្រុក​ទេស​យើង​វា​ទៅ​ជា​អាណាធិបតេយ្យ​ ហើយ​ប្រជាពលរដ្ឋ​ទូទៅ​និង​សហគមន៍​អន្តរជាតិ​គេ​នៅតែ​មិន​មាន​ជំនឿ​លើ​ប្រព័ន្ធ​យុត្តិធម៌​យើង"។

នៅក្នុង​ទំនាស់​ដីធ្លី​រវាង​ថៅកែ​ដី​និង​ក្រុម​អ្នក​ភូមិរូងអំពិលនេះ​ មាន​អ្នកភូមិ​ចំនួន​៨​នាក់​ ត្រូវ​បាន​តុលាការ​ចាប់​ខ្លួន​ ដែល​ក្នុង​នោះ​មាន​ពីរ​នាក់​ត្រូវ​បាន​ចាប់​ឃុំ​ខ្លួន​ចំនួន​ពីរ​ដង​ដោយ​ហួស​រយៈពេល​នៃ​ការ​ឃុំខ្លួន​ដែល​ច្បាប់​បាន​កំណត់​ដូច​ករណី​របស់​លោក​ ជិម កែវ​ ដែរ នេះ​បើ​យោង​តាម​លោក​ តាំង គិមឆែ​ សមាជិក​ក្រុមប្រឹក្សា​ស្រុក​បវិល។

លោក​ តាំង គិមឆែ​ ដែល​តាមដាន​យ៉ាង​ជាប់លាប់​នូវ​ដំណើរការ​រឿង​ក្តី​នេះ​ បាន​មាន​ប្រសាសន៍​នៅឯ​ផ្ទះ​របស់​លោក​ថា​ ការ​ឃុំ​ខ្លួន​អ្នកភូមិ​ហួសពី​ការកំណត់​នៃច្បាប់​នេះ​ បាន​ធ្វើ​ឲ្យ​សាធារណជន​អស់​ជំនឿ​លើ​ប្រព័ន្ធ​តុលាការ​ក្នុងស្រុក​តែម្តង។

"រឿង​កាលណា​យើង​ធ្វើ​ខុស​នីតិវិធី​វា​ធ្វើ​ឲ្យ​ប្រព័ន្ធ​យើង​ហ្នឹង​ វា​គ្មាន​តម្លាភាព ​គ្មាន​សុពលភាព។​ វា​ធ្វើ​ឲ្យ​អង្គការ​ជាតិ​ក៏​ដូចជា​អន្តរជាតិ​ គេ​តែងតែ​ទិតៀន​យើង​ គេ​រិះគន់​យើង​មិនឈប់​មិនឈរ​គឺ​ដោយសារ​តែ​អា​អញ្ចឹង​ ដោយសារ​តែ​យើង​ធ្វើ​ទៅ​វាខុស​ អញ្ចឹង​ប្រជាពលរដ្ឋ​អត់​មាន​ជំនឿ​ ដូច​ថា​វាអស់​ជំនឿ ឈាន​រហូត​ទៅ​បន់​អ្នកតា​ដំបង​ក្រញូង​ ដោយសារ​អស់​ជំនឿ​រឿង​ហ្នឹង​ហើយ"។

ការសិក្សា​មួយ​របស់​មជ្ឈមណ្ឌល​ដើម្បី​យុត្តិធម៌​និងការ​បង្រួបបង្រួម​ដែល​បាន​ចេញផ្សាយ​កាលពី​ខែ​មិថុនា​កន្លង​ទៅ​បាន​រកឃើញ​ថា​ សិទ្ធិ​របស់​ជន​ជាប់ចោទ​ជា​ញឹកញយ​ត្រូវបាន​រំលោភ​បំពាន​ តួយ៉ាង​ ដូចជា​ សិទ្ធិ​ទទួលបាន​ការ​កាត់ទោស​ចំពោះមុខ​ សិទ្ធិ​ទទួលបាន​ការប្រឹក្សា​ផ្នែកច្បាប់​ និង​សិទ្ធិ​ត្រួត​ពិនិត្យ​មើល​សាក្សី​ដែល​គេនាំ​យក​មក​ប្រឆាំង​នឹង​ខ្លួន​ជាដើម។

ជាក់ស្តែង​ ការសិក្សា​ដែល​បាន​មក​ពី​ការ​តាមដាន​ដំណើរការ​កាត់ក្តី​ចំនួន​៤៨៤​ករណី​នៅ​ឯ​តុលាការ​កំពូល​ សាលាឧទ្ធរណ៍​ និង​សាលាដំបូង​នៅក្នុង​ទីក្រុង​ភ្នំពេញ​ ខេត្ត​កណ្តាល​ និង​ខេត្ត​បាត់ដំបង​នេះ ​បាន​បង្ហាញ​ថា​ក្នុង​ចំណោម​ជន​ជាប់ចោទ​ចំនួន​ជិត​៨០០​នាក់​ ជាង​១ភាគ៣​ ត្រូវបាន​តុលាការ​កាត់ទោស​កំបាំងមុខ។

ចំណែក​ឯការ​កាត់ទោស​នៅ​សាលាឧទ្ធរណ៍​វិញ​ ក្នុង​ចំណោម​ជន​ជាប់ចោទ​១០​នាក់​ មាន​ប្រមាណ​៧​នាក់​ទៅហើយ​ដែល​អវត្តមាន​នៅក្នុង​ពេល​សវនាការ​របស់​ពួកគេ។​ ការ​រកឃើញ​នេះ​បាន​គូស​បញ្ជាក់​អំពី​កង្វះ​ការគាំទ្រ​ដល់​ជន​ជាប់ចោទ​ដែល​ចាំបាច់​ត្រូវ​ធ្វើ​ដំណើរ​ផ្លូវ​ឆ្ងាយ​ទៅ​កាន់​សាលាឧទ្ធរណ៍ ​ដែល​មាន​តែ​មួយ​គត់​នៅ​ក្នុង​រាជធានី​ភ្នំពេញ។

លោក​ នួន សាន​ ព្រះរាជអាជ្ញា​នៃ​សាលា​ដំបូង​ខេត្ត​បាត់ដំបង​ បាន​មានប្រសាសន៍​ថា​ ការ​ឃុំខ្លួន​ជន​ជាប់ចោទ​លើស​រយៈពេល​កំណត់​នៃ​ច្បាប់​ ពិតជា​មាន​ខ្លះ​មែន​ប៉ុន្តែ​លោក​បញ្ជាក់​ថា​ ករណី​ទាំងនេះ​ ច្រើន​តែ​កើតឡើង​ដោយសារ​បញ្ហា​នៃ​ការបញ្ជូន​ឯកសារ​ចុះឡើង​រវាង​មន្រ្តី​នគរបាល​និង​មន្រ្តី​តុលាការ​ និង​ការ​លើក​ពេល​សវនាការ​ដោយសារ​បញ្ហា​បច្ចេកទេស​ជាដើម។

ចំណែក​ការ​គាំទ្រ​ផ្នែកច្បាប់​សម្រាប់​ជន​ជាប់ចោទ​វិញ​ក៏​ពុំ​ចោទ​ជា​បញ្ហា​ធំដុំ​ដែរ​ ដោយ​លោក​ នួន សាន​ បញ្ជាក់​ថា បច្ចុប្បន្ន​មាន​មេធាវី​របស់​អង្គការ​ក្រៅ​រដ្ឋាភិបាល​មួយចំនួន​បានផ្តល់​សេវា​ប្រឹក្សា​ផ្នែក​ច្បាប់​នេះ​ដល់​ជន​ជាប់ចោទ​ហើយ។

តែ​ទោះជា​យ៉ាងនេះ​ក្តី​ លោក​ នួន សាន​ ទទួល​ស្គាល់​ថា​ ការ​កាត់ទោស​កំបាំងមុខ​ដោយ​គ្មាន​វត្តមានរបស់​ជន​ជាប់ចោទ​នៅក្នុង​សវនាការ​សាលាឧទ្ធរណ៍​ គឺ​ពិតជា​នៅ​មាន​បញ្ហា​នៅឡើយ​ ដោយសារ​តែកង្វះខាត​ផ្នែក​ថវិកា​ ក្នុង​ការ​ដឹកជញ្ជូន​ជន​ជាប់ចោទ​ទៅកាន់​សាលាឧទ្ធរណ៍​ក្នុង​ទីក្រុង​ភ្នំពេញ។

"វាត្រូវ​ គឺ​ត្រូវ​យក​គាត់​ទៅ​បង្ហាញ​មុខ​ក្នុង​ពេល​សវនាការ​ហ្នឹង​ហើយ​ ធ្វើ​យ៉ាងម៉េច​ឲ្យ​បាន​គាត់​ឆ្លើយ​ជូន​ចៅក្រម​ជម្រះ​ ប៉ុន្តែ​ការ​អនុវត្ត​ជាក់ស្តែង​វា​ប្រឈម​នឹង​ការ​ដឹកជញ្ជូន សោហ៊ុយ​សោដា​អីហ្នឹង​ មធ្យោបាយ​គ្រប់​តែម្តង​ ជា​មធ្យោបាយ​ដឹកជញ្ជូន​និង​ការពារ​គាត់ទៅ"។

ប៉ុន្តែ​ លោក​ នួន សាន​បាន​បញ្ជាក់​បន្ថែម​ថា​ សាលា​ឧទ្ធរណ៍​ថ្នាក់តំបន់​ត្រូវគ្រោង​នឹង​បង្កើតឡើង​ដើម្បី​ដោះស្រាយ​បញ្ហា​នេះ​ហើយ​ដើម្បី​ជួយ​សម្រួល​ដល់​ការ​ការពារ​សិទ្ធិ​ជន​ជាប់ចោទ ​ដែល​ត្រូវ​បង្ហាញ​ខ្លួន​នៅក្នុង​សាលាឧទ្ធរណ៍​នោះ៕

XS
SM
MD
LG