ភ្នំពេញ៖ មេដឹកនាំកម្ពុជានិងវៀតណាម នឹងជួបពិភាក្សាការងារនៅក្នុងសប្តាហ៍នេះ សំដៅពង្រឹងពង្រីកទំនាក់ទំនងនិងកិច្ចសហប្រតិបត្តិការទ្វេភាគីសម្រាប់ជំរុញកំណើនសេដ្ឋកិច្ចរបស់ប្រទេសទាំងពីរតាមរយៈសកម្មភាពពាណិជ្ជកម្ម និងការវិនិយោគ ខណៈការធ្វើពាណិជ្ជកម្មរវាងប្រទេសទាំងពីរសម្រេចបាន៨៦២លានដុល្លារអាមេរិក នៅក្នុងរយៈពេលប្រាំមួយខែដើមឆ្នាំ២០១០នេះ ដែលរួមមាន៧២៨លានដុល្លារអាមេរិកពីការនាំចេញរបស់ប្រទេសវៀតណាម ដែលកើនឡើង២៤,២ភាគរយប្រៀបធៀបនឹងរយៈពេលដូចគ្នាកាលពីឆ្នាំមុន។
លោកប្រធានាធិបតីវៀតណាម Nguyen Minh Triet នឹងមកបំពេញទស្សនកិច្ចជាផ្លូវរដ្ឋនៅកម្ពុជានៅក្នុងសប្តាហ៍នេះ ដើម្បីជួបពិភាក្សាការងារជាមួយក្រុមមេដឹកនាំកម្ពុជា សំដៅជំរុញទំនាក់ទំនង និងកិច្ចសហប្រតិបត្តិការទ្វេភាគី។
លោក Minh Triet គ្រោងនឹងជួបពិភាក្សាការងារដាច់ដោយឡែកពីគ្នាជាមួយព្រះមហាក្សត្រព្រះបាទ សម្តេចព្រះបរមនាថនរោត្តម សីហមុនី លោកជា ស៊ីម ប្រធានព្រឹទ្ធសភា លោកហេង សំរិន ប្រធាន រដ្ឋសភា និងលោកនាយករដ្ឋមន្ត្រី ហ៊ុន សែន ព្រមទាំងសម្តេចព្រះសង្ឃរាជទេព វង្ស និងប៊ូរ គ្រី។
ក្នុងអំឡុងពេលទស្សនកិច្ចពីថ្ងៃទី២៦ ដល់ថ្ងៃទី២៨ ខែសីហានេះ លោក Nguyen Minh Triet នឹង ចូលរួមសម្ពោធការិយាល័យរបស់វិទ្យុសម្លេងវៀតណាមនៅក្នុងទីក្រុងភ្នំពេញ និងទស្សនាសាលាមិត្តភាពកម្ពុជា-វៀតណាម។
លោកស្រី Ngo Thi Hoa អនុប្រធានបេសកកម្មនៃស្ថានទូតវៀតណាមប្រចាំកម្ពុជា បានបញ្ជាក់ថា គោលបំណងនៃដំណើរទស្សនកិច្ចនេះគឺជំរុញទំនាក់ទំនង និងកិច្ចសហប្រតិបត្តិការរវាងប្រទេសជាតិទាំងពីរ និងជំរុញសកម្មភាពពាណិជ្ជកម្ម និងវិនិយោគរបស់ប្រទេសវៀតណាមនៅកម្ពុជា។
«យើងចង់ឱ្យរដ្ឋាភិបាលបើកចំហសម្រាប់អ្នកវិនិយោគទុនវៀតណាមមកធ្វើការវិនិយោគនៅក្នុង ប្រទេសកម្ពុជា»។
លោក កុយ គួង អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា បានថ្លែងថា ដំណើរទស្សនកិច្ចនេះមានសារៈសំខាន់ណាស់សម្រាប់ប្រទេសជាតិទាំងពីរក្នុងការពង្រឹងពង្រីកទំនាក់ទំនង និងកិច្ចសហប្រតិបត្តិការទ្វេភាគី ដែលរួមមានវិស័យពាណិជ្ជកម្ម និងវិនិយោគរវាងប្រទេសកម្ពុជានិងវៀតណាម។
«ការរីកចម្រើនទំនាក់ទំនងផ្នែកពាណិជ្ជកម្ម វិនិយោគ និងទេសចរណ៍រីកចម្រើនខ្លាំងណាស់។ ដំណើរទស្សនកិច្ចផ្លូវរដ្ឋនេះ ក៏ជំរុញវិស័យផ្សេងៗដែរ។ កាលណាយើងនិយាយពីចំណងមិត្តភាព និងកិច្ចសហប្រតិបត្តិការទ្វេភាគីរវាងប្រទេសទាំងពីរ ដោយផ្តោតលើវិស័យទាំងអស់នោះ»។
ក្នុងរយៈពេល១០ឆ្នាំ ការធ្វើពាណិជ្ជកម្មរវាងប្រទេសកម្ពុជា និងប្រទេសវៀតណាម បានកើនឡើងពី ១៤៦លានដុល្លារអាមេរិកនៅក្នុងឆ្នាំ២០០១ដល់ជាង១០០០លានដុល្លារអាមេរិកនៅក្នុងឆ្នាំ២០០៩។ ការធ្វើពាណិជ្ជកម្មនេះសម្រេចបាន៨៦២លានដុល្លារមេរិកនៅក្នុងរយៈពេលប្រាំមួយខែដើមឆ្នាំ២០១០នេះ ដែលរួមមាន៧២៨លានដុល្លារអាមេរិក ពីការនាំចេញរបស់ប្រទេសវៀតណាម ដោយកើនឡើង២៤,២ភាគរយពីរយៈពេលដូចគ្នា កាលពីឆ្នាំមុន នេះបើយោងតាមតួលេខប្រកាសនៅក្នុងសិក្ខាសាលាស្តីពីទំនាក់ទំនងពាណិជ្ជកម្មកម្ពុជានិងវៀតណាម ដែលបានធ្វើឡើងនៅក្នុងទីក្រុង ភ្នំពេញនៅថ្ងៃទី៥ ខែសីហានេះ។
តួលេខរបស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា ប្រទេសវៀតណាមបានវិនិយោគ១៥០,៧០លានដុល្លារអាមេរិកនៅកម្ពុជាក្នុងរយៈពេលប្រាំពីរខែដើមឆ្នាំ២០១០នេះ ដែលរួមមានទូរគមនាគមន៍ ធនាគារ ការដឹកជញ្ចូនតាមអាកាស កសិកម្ម ឧស្សាហកម្មធន់ស្រាល ការដាំដើមឈើឧស្សាហកម្ម និងកៅស៊ូ រ៉ែ ថាមពល និងមន្ទីរពេទ្យ៕