ភ្ជាប់​ទៅ​គេហទំព័រ​ទាក់ទង

ឯកអគ្គ​រដ្ឋទូត​គោចរ​​​អាមេរិក​ទទូច​ឲ្យ​សហ​ចៅក្រម​សាលាក្ដី​ខ្មែរ​ក្រហម​ស៊ើបអង្កេត​សំណុំរឿង​០០៣​​និង​០០៤


ក្រុម​មន្រ្តី​នៃ​​សាលាក្តី​​កាត់ទោស​ខ្មែរ​ក្រហម នៅ​ក្នុង​សនិ្នសីទ​សារព័ត៌មាន​មួយ។​

លោក​ស្តេវិន រ៉េប​ (Steven Rapp) ​ឯកអគ្គ​រដ្ឋទូត​គោចរ​របស់​សហ​រដ្ឋ​អាមេរិក​ទទួល​បន្ទុក​ឧក្រិដ្ឋ​កម្ម​សង្រ្គាម​ ​បាន​ទទូ​ចឲ្យ​សហ​ចៅក្រម​ជាតិ ​និង​អន្ដរជាតិ​ ​នៅក្នុង​សាលាក្ដី​ខ្មែរ​ក្រហម​សហការ​គ្នា​នៅ​ក្នុង​ការ​ស៊ើប​អង្កេត​សំណុំរឿង​បន្ថែម​ គឺ​សំណុំ​រឿង​០០៣​ និង​០០៤។ ​សំណុំ​រឿង​ទាំងពីរ​នេះ​កំពុងតែ​ស្ថិត​ក្នុង​ភាព​ចម្រូង​ចម្រាស់​រវាង​ភាគី​ទាំងពីរ​នៅក្នុង​សាលាក្ដី។

លោក​ស្ដេវិន​បាន​ប្រាប់ ​VOA ​សំឡេង​សហរដ្ឋ​អាមេរិក​ ​នៅ​ថ្ងៃសៅរ៍​ថា​ ​លោក​បាន​ជំរុញ​បែប​នេះ​នៅ​ក្នុង​ជំនួប​ជាមួយ​មន្ដ្រី​សាលាក្ដី​ខ្មែរក្រហម​កាល​ពី​ថ្ងៃសុក្រ។

"យើង​ចង់​ឲ្យ​ប្រាកដ​ថា​ ​តុលាការ​នេះ​មាន​លទ្ធភាព​សម្រេច​ក្នុង​ការ​ស៊ើបអង្កេត​របស់​ខ្លួន​គ្រប់​បញ្ហា​ទាំង​អស់។ ​រដ្ឋាភិបាល​បាន​បញ្ចេញ​ទស្សនៈ​របស់ខ្លួន​អំពី​ករណី​ទាំងនេះ​ ​ក៏ប៉ុន្ដែ​យើង​មាន​ទស្សនៈ​របស់​យើង​ថា​ ​ពួកគេ​នឹង​សហការ​ជាមួយ​សាលាក្ដី​ខ្មែរក្រហម​ឲ្យ​បាន​ពេញលេញ​ ​ហើយ​គួរតែ​ធ្វើការ​ស៊ើប​អង្កេត​បន្ដ​ទៅមុខ​ទៀត​ និង​គួរតែ​មាន​ដំណោះស្រាយ​ដោយ​អនុវត្ត​តាម​ច្បាប់ ​និង​ដំណើរ​ការក្ដី"។

ឆ្លើយតប​ទៅនឹង​សំណួរ​បញ្ជាក់​ដែល​ថា​ ​តើ​លោក​ស្ដេវិន​ចង់​លើក​ទឹកចិត្ត​ឲ្យ​មាន​ការ​សហការ​គ្នា​រវាង​សហ​ចៅក្រម​ស៊ើបអង្កេត​កម្ពុជា ​និង​សហចៅក្រម​ស៊ើបអង្កេត​អន្ដរជាតិ​ឬយ៉ាងណា​ ​លោក​ស្ដេវិន​បាន​ពោល​ថា​ "ពិតមែន​ហើយ​ ​ការ​លើក​ឡើង​របស់​ខ្ញុំ ​គឺមាន​ការ​តម្រូវឲ្យ​មាន​ការ​សហការ​គ្នា​នៅ​ទីនេះ​ ​ហើយ​តុលាការ​នេះ​នឹង​ដំណើរការ​ដោយ​មិនមាន​ការភ័យខ្លាច​ និង​ការផ្ដល់​ការ​អនុគ្រោះ​បែប​ណានោះ"។

លោករាជ សម្បត្តិ ​ប្រធាន​ផ្នែក​កិច្ចការ​សាធារណៈ​របស់​សាលាក្ដី​ខ្មែរក្រហម​ មិន​ធ្វើ​អត្ថាធិប្បាយ​ទៅ​លើ​អ្វី​ដែល​លោក​ស្ដេវិន រ៉េប​បាន​លើកឡើង​នោះ​ទេ។​ ក៏ប៉ុន្ដែ​លោក​បាន​បង្វែ​ចម្លើយ​ទៅលើ​សារៈ​សំខាន់​នៃ​ដំណើរ​ទស្សន​កិច្ច​របស់​មន្ដ្រី​ជាន់ខ្ពស់​អាមេរិក​នេះ​ទៅវិញ។

“ដំណើរ​ទស្សន​កិច្ច​ហ្នឹង​គឺជា​ការ​លើកទឹក​ចិត្ត​ដល់​បុគ្គលិក​ ​ហើយ​ជាពិសេស​ ​ឲ្យ​ប្រទេស​ផ្ដល់​ជំនួយ​គិត​គូរ​បន្ថែម​ទៀត​ ​ធ្វើយ៉ាង​ម៉េច​ឲ្យ​សាលាក្ដី​បន្ដ​កិច្ចការ​របស់​ខ្លួន​ប្រកប​ដោយ​ជោគជ័យ​ ​ចប់ចុង​ចប់​ដើម"។

រដ្ឋាភិបាលកម្ពុជា រួមទាំង​សហចៅក្រម​ស៊ើបអង្កេត​ និង​សហ​ព្រះរាជអាជ្ញា​កម្ពុជា​នៅ​ក្នុង​សាលាក្ដី​ខ្មែរ​ក្រហម​ ​បាន​ជំទាស់​ទៅនឹង​ការ​ស៊ើបអង្កេត​ ​តាម​ចាប់​ខ្លួន​ជន​សង្ស័យ​ក្នុង​សំណុំ​រឿង​០០៣ ​និង​ ០០៤​ជា​បន្ដទៀត​ ​ដោយ​លើក​ពី​ហេតុផល​ថា​ ​វា​អាច​បង្ក​ឲ្យ​មាន​សង្រ្គាម​ស៊ីវិល​សារជាថ្មី។ ក៏​ប៉ុន្ដែ​ភាគី​អង្គការ​សហ​ប្រជាជាតិ​បាន​សម្រេច​បើក​ការ​ស៊ើបអង្កេត​ជា​លក្ខណៈ​ឯក​តោភាគី។​ ហើយ​ការ​ស៊ើបអង្កេត​កំពុង​បន្ដ។​ ជន​សង្ស័យ​នៅក្នុង​សំណុំរឿង​ទាំងពីរ​មា​នប្រាំនាក់​ដែល​សុទ្ធសឹងជា​កម្មាភិបាល​ជាន់ខ្ពស់​ខ្មែរក្រហម។

មាន​ប្រតិកម្ម​ជាច្រើន​ចាត់ទុក​ថា​ ​ការជំទាស់​របស់​រដ្ឋាភិបាល​ខ្មែរ​គឺជា​ការជ្រៀតជ្រែក​នយោបាយ​ទៅ​លើ​ដំណើរការ​កាត់ទោស​ពួក​អតីត​មេដឹកនាំ​ខ្មែរ​ក្រហម។ ​យ៉ាងណា​ក៏ដោយ​ លោក​ស្ដេវិន រ៉េប​បាន​ចាត់​ទុក​ថា​ ​សំណុំរឿង​០០២ ​ដែល​មាន​ជន​ជាប់ចោទជាអតីត​មេដឹកនាំ​កំពូល​ខ្មែរក្រហម​សរុប​ចំនួន​បួននាក់ ​គឺជា​សំណុំរឿង​ដ៏មាន​សារៈសំខាន់​បំផុត​សម្រាប់​ពិភព​លោក។ លោក​ជឿថា​ ​ដំណើរ​ការ​កាត់ទោស​នៅក្នុង​សំណុំរឿងនេះ ​អាចនឹង​ចាប់ផ្ដើម​នៅ​ក្នុង​អំឡុង​ខែ​មិថុនា ​ឆ្នាំ​២០១១​នេះ។

លោក​ស្ដេវិន រ៉េបគឺជា​តួអង្គ​យ៉ាង​សំខាន់​ដែល​ត្រូវ​តែងតាំង​ឲ្យ​ធ្វើជា​អ្នក​សម្របសម្រួល​នៅ​ក្នុង​ការ​ស្វែងរក​មូលនិធិ​សម្រាប់​ជួយ​ដល់​សាលាក្ដី​ខ្មែរក្រហម​ ​ដែល​ជួប​នូវ​បញ្ហា​ថវិកា​មិនចេះចប់​មិនចេះ​ហើយ។

លោក​បាន​មកដល់​ប្រទេស​កម្ពុជា​ ​កាលពី​ថ្ងៃ​ព្រហស្បតិ៍​ ​ហើយ​លោកនឹង​ចាកចេញ​ពី​ប្រទេស​កម្ពុជា​នៅ​ថ្ងៃអាទិត្យ។

ក្រៅពី​ជំនួប​ជាមួយ​មន្ដ្រី​តុលាការ​ ​លោក​ឯកអគ្គ​រដ្ឋទូត​គោចរ​សហ​រដ្ឋ​អាមេរិកបាន​ជួប​ជាមួយ​អង្គ​ទូត​នានា​នៅ​ក្នុង​ទីក្រុង​ភ្នំពេញ ​ដែល​តំណាង​ឲ្យ​ប្រទេស​ផ្ដល់​ជំនួយ​ដល់​សាលាក្ដី​ខ្មែរក្រហម​ ​ដូចជា​ ប្រទេស​អាល្លឺម៉ង់​ ​ជប៉ុន​ ​បារាំង​ និង​អង់គ្លេស​ជាដើម​ ​រួម​ទាំង​ជំនួប​ជាមួយ​លោក​ឧបនាយក​រដ្ឋមន្ដ្រី​ខ្មែរ​សុខ អាន​ ដែល​ទទួល​បន្ទុក​ដំណើរការ​កាត់ទោស​ពួក​អតីត​មេ​ដឹកនាំ​ខ្មែរក្រហម​ កាលពី​ព្រឹក​ថ្ងៃ​សៅរ៍។ ​ក៏ប៉ុន្ដែ​លោក​ស្ដេវិន រ៉េប​បាន​បដិសេធ​មិន​ផ្ដល់​ព័ត៌មាន​លម្អិត​ទាក់ទង​ទៅនឹង​ជំនួប​នេះ​ទេ​ ​ដោយ​លោក​ចាត់​ទុក​ថា​ ​នេះ​គឺជា​រឿង​លាក់​ការណ៍៕

XS
SM
MD
LG