ភ្ជាប់​ទៅ​គេហទំព័រ​ទាក់ទង

ប្រទេស​អាមេរិក​នឹង​ប្រគល់​វត្ថុ​បុរាណ​ឱ្យ​កម្ពុជា​វិញ 


រាយការណ៍​ដោយ​ ម៉ែន គឹមសេង​ ពី​រដ្ឋធានី​វ៉ាស៊ីនតោន

សហរដ្ឋ​អាមេរិក​នឹង​ប្រគល់​វត្ថុ​បុរាណ​ខ្មែរ​សម័យ​អង្គរ​ចំនួន​៧​ដុំ​ ​មក​ឱ្យ​ប្រទេស​កម្ពុជា​វិញ​នៅ​ថ្ងៃ​ព្រហស្បតិ៍​ស្អែក​នេះនៅ​ក្នុង​ពិធី​ មួយ​នា​ខេត្តព្រះ​សីហនុ​ដែល​មាន​ការ​ចូល​រួម​ដោយ​តំណាង​ស្ថានទូត​សហរដ្ឋ​អាមេរិក​និង​មន្រ្តី​ជាន់​ខ្ពស់​កម្ពុជា។

លោក​ ចន ចនសុន​ អ្នក​នាំ​ពាក្យ​ស្ថានទូត​សហរដ្ឋ​អាមេរិក​ប្រចាំ​ទី​ក្រុង​ភ្នំពេញ ​ដែល​ត្រូវតំណាងឱ្យ​ភាគី​សហរដ្ឋ​អាមេរិក​ក្នុង​ពិធី​ប្រគល់​នោះ​ បាន​ប្រាប់​វីអូអេ​សំឡេង​សហរដ្ឋ​អាមេរិក​តាម​ទូរស័ព្ទ​ពី​ក្រុង​ព្រះ​សីហនុ​មក​ថា ​រូប​ចម្លាក់​វត្ថុ​បុរាណ​ខ្មែរ​ទាំង​៧​ដុំ​ សរុប​មាន​ទម្ងន់​ប្រមាណ​៥០០​គីឡូក្រាម​ មាន​ព្រះ​កេស​ព្រះពុទ្ធ​បដិមា​ចំនួន​ពីរ​និង​រូប​ចម្លាក់​ផ្សេងៗ​ទៀត​ដែល​ ទាក់ទង​នឹងព្រះ​ពុទ្ធ​សាសនា។

“រូប​ចម្លាក់​ទាំង​នេះ​ត្រូវ​បាន​ចាប់​រឹបអូស​ដោយ​សមត្ថកិច្ច​គយ​និង​អន្តោប្រវេសន៍​ក្នុង​ទីក្រុង Los Angeles ហើយ​ត្រូវ​បាន​រក្សា​ទុក​ក្នុង​ទីក្រុង Los Angeles តាំង ​ពី​ពេល​រឹបអូស​បាន​នោះ​មក​ប្រហែល​ជា​ពីរ​ឬ​បី​ឆ្នាំ​ហើយ។​ រូប​ចម្លាក់​ទាំង​នេះ​ត្រូវ​បាន​រឹបអូស​ដោយ​ផ្អែក​តាម​កិច្ច​ព្រម​ព្រៀង​មួយ ​ដែល​យើង​បាន​ចុះ​ហត្ថលេខា​ជា​មួយ​ក្រសួង​វប្បធម៌​ដែល​ហាម​ឃាត់​ការ​នាំ​ចូល​វត្ថុ​បុរាណ​ក្នុង​សម័យ​អង្គរ​ចូល​ក្នុង​សហរដ្ឋ​អាមេរិក"។

ប្រទេស​កម្ពុជា​និង​សហរដ្ឋ​អាមេរិក​បាន​ចុះ​ហត្ថលេខា​លើ​កិច្ច​ព្រមព្រៀង​មួយ​កាល​ ពី​ខែ​កញ្ញា​ ឆ្នាំ​២០០៣​ ហាម​ឃាត់​ការ​នាំ​វត្ថុ​សិល្បៈ​បុរាណ​ខ្មែរ​ចូល​ក្នុង​សហរដ្ឋ​អាមេរិក​ដោយ​ខុស​ច្បាប់​បន្ទាប់​ពី​មាន​ការ​ស្នើសុំ​ពី​ភាគី​រដ្ឋាភិបាល​កម្ពុជា​ឱ្យ​ជួយការពារ​បេតិកភណ្ឌ​វប្បធម៌ខ្មែរ។

លោក ឱក សុផុន​ អគ្គ​នាយក​ទទួល​បន្ទុក​ខាង​ផ្នែក​បេតិកភណ្ឌ​នៃ​ក្រសួង​វប្បធម៌​នឹង​តំណាង​ឱ្យ​ភាគី​កម្ពុជា​ក្នុង​ពិធី​ទទួល​យក​មក​វិញ​នូវ​វត្ថុ​បុរាណ​ទាំង​នោះ​ បាន​ប្រាប់​វីអូអេ​សំឡេង​សហរដ្ឋ​អាមេរិក​ថា ​ការ​លួច​និង​ជួញ​ដូរ​វត្ថុ​បុរាណ​ចេញ​ពី​ប្រទេស​កម្ពុជា​មាន​ការ​ថយ​ចុះ​នា​ពេល​ចុង​ក្រោយនេះ​ ដោយ​សារ​មាន​ការ​ខិតខំ​ប្រឹង​ប្រែង​របស់​អាជ្ញាធរ​កម្ពុជា​និង​ការ​ធ្វើ​សហការ​ជា​អន្តរជាតិ។​ លោក​បាន​សរសើរ​ចំពោះ​សហការ​ល្អ​ពីសហរដ្ឋ​អាមេរិក។

“យើងប្រើ​វិធានការ​គ្រប់​យ៉ាង​ទាំង​អស់​ ទាំង​វិធានការ​ក្រៅ​ប្រទេស​ វិធានការ​ក្នុង​ប្រទេស។​ ក្រៅ​ប្រទេស​បើ​ជា​មួយ​អាមេរិក​គឺ​បិទ​ជិត​តែ​ម្តង​ព្រោះ​យើង​បាន​ចុះ​កិច្ច ​ព្រមព្រៀង​ជា​មួយ​អាមេរិក​ថា​ឱ្យ​តែ​វត្ថុ​សិល្បៈ​ដែល​គ្មាន​សំបុត្រ​ស្នាម ​ពី​ក្រសួង​វប្បធម៌​ហ្នឹង​គឺ​អាមេរិក​ចាប់​ហើយ​ សូម្បី​តែ​វត្ថុ​ចម្លង​បើ​សិន​ជា​អត់​មាន​អាមេរិក​អត់​ឱ្យ​ចូល​ទេ​ដល់​ អញ្ចឹង​វត្ថុ​បុរាណ​មួយ​ចំនួន​អាមេរិក​ចាប់​បាន​ទាំងអស់"។

យោង​តាម​ប្រភព​ព័ត៌មាន​ពី​អង្គការ​ឃ្លាំមើល​បេតិកភណ្ឌ​ឬ Heritage​ Watch ឱ្យ ​ដឹង​ថា​ចាប់​តាំង​ពី​ឆ្នាំ​១៩៨៨​មក​មាន​វត្ថុ​បុរាណ​ខ្មែរ​ដែល​មាន​ទឹក​ប្រាក់​ប្រមាណ​ជា​២០​លាន​ដុល្លារ​សហរដ្ឋ​អាមេរិក​ត្រូវ​បាន​ទិញ​លក់​ហើយ​៩០​ ភាគរយ​នៃ​វត្ថុ​បុរាណ​ដែល​យក​មក​លក់​គឺ​បាន​មក​ដោយ​ខុស​ច្បាប់។​ ប្រទេស​ដែល​ជា​ច្រក​នាំ​ចេញ​វត្ថុ​បុរាណ​ទាំង​នេះ​ចេញ​ទៅ​ទីផ្សារ​អន្តរជាតិ ​មាន​ប្រទេស​ថៃ​និង​សិង្ហបុរី ៕

XS
SM
MD
LG