រដ្ឋសភាអាមេរិកដែលបក្សសាធារណរដ្ឋមានសំឡេងភាគច្រើន បានបោះឆ្នោតកាលពីថ្ងៃអង្គារ អនុម័តការផ្ដល់មូលនិធិដល់រដ្ឋាភិបាលសហព័ន្ធ ឲ្យអាចដំណើរការហួសកាលបរិច្ឆេទកំណត់នៅថ្ងៃទី ១៤ ខែមីនាខាងមុខនេះ។
សេចក្ដីស្នើច្បាប់ថវិកានេះ តម្រូវឱ្យមានសំឡេងគាំទ្រយ៉ាងហោចណាស់ ៦០ ក្នុងចំណោម ១០០ សម្រាប់ការអនុម័តនៅក្នុងព្រឹទ្ធសភាទៀត ដែលមានន័យថា គណបក្សសាធារណរដ្ឋនឹងត្រូវការសំឡេងឆ្នោតពីគណបក្សប្រជាធិបតេយ្យដើម្បីទទួលបានការអនុម័ត។
រដ្ឋសភាចាប់ផ្ដើមសម្រាករហូតដល់ចុងសប្ដាហ៍នេះចាប់ពីរសៀលថ្ងៃអង្គារម្សិលមិញតទៅ។ ការណ៍នេះដាក់សម្ពាធលើសមាជិកព្រឹទ្ធសភា ឱ្យអនុម័តកំណែសេចក្ដីស្នើច្បាប់របស់ខ្លួន។
មេដឹកនាំក្រុមសំឡេងភាគច្រើនក្នុងព្រឹទ្ធសភា លោក John Thune បានប្រាប់ក្រុមអ្នករាយការណ៍ព័ត៌មានកាលពីថ្ងៃអង្គារថា៖«យើងបានត្រៀមខ្លួនដើម្បីយកសេចក្ដីស្នើច្បាប់នេះមកពិភាក្សាអនុម័តក្នុងព្រឹទ្ធសភា ហើយធ្វើឱ្យប្រាកដថានៅថ្ងៃសុក្រ រដ្ឋាភិបាលនៅតែបើកទ្វារ។ ប៉ុន្តែវានឹងអាស្រ័យលើគណបក្សប្រជាធិបតេយ្យថាតើវាកើតឡើងឬអត់នៅចន្លោះពេលនេះរហូតដល់ពេលបោះឆ្នោតនោះ»។
ប្រធានរដ្ឋសភាលោក Mike Johnson បានទប់ស្កាត់ការមិនពេញចិត្តពីក្នុងជួរគណបក្សរបស់លោក ដើម្បីអនុម័តវិធានការចំណាយនេះ។ លោកបានប្រាប់អ្នកសារព័ត៌មានកាលពីថ្ងៃអង្គារថាសេចក្ដីសម្រេចឲ្យបន្តដំណើរការរដ្ឋាភិបាលរយៈពេល៧ខែទៅមុខទៀតនេះគឺជាជំហានដ៏សំខាន់មួយឆ្ពោះទៅរកការអនុវត្តរបៀបវារៈរបស់លោកTrumpក្នុងការលុបបំបាត់ការខ្ជះខ្ជាយនិងការរំលោភបំពានរបស់រដ្ឋាភិបាលតាមរយៈអង្គភាពប្រសិទ្ធភាពរដ្ឋាភិបាល(ហៅកាត់ថា DOGE)។
ទោះជាយ៉ាងណាក៏ដោយ ក៏ក្រុមឃ្លាំមើលឯករាជ្យ និងអ្នកវិភាគនិយាយថា DOGE កំពុងប្រើប្រាស់ការអះអាងយ៉ាងទូលំទូលាយហួសហេតុនៃការក្លែងបន្លំ ដើម្បីបង្កើតការគាំទ្រសម្រាប់ការកាត់បន្ថយទ្រង់ទ្រាយធំចំពោះកម្មវិធី និងការិយាល័យសហព័ន្ធជាច្រើន៕
