ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អាមេរិក​ផ្តល់​ជំនួយ​៣៥​លាន​ដុល្លារ​សម្រាប់​វិស័យ​សុខាភិបាល​និង​អប់រំ​របស់​កម្ពុជា


លោក​ស្រី​ឯកអគ្គរដ្ឋ​ទូត​សហរដ្ឋ​អាមេរិក Carol A. Rodley និង​លោក Scot Marciel ឧបការី​រង​​ក្រសួង​ការ​បរទេស​សហរដ្ឋ​អាមេរិក នៅ​​ក្នុង​កិច្ច​ប្រជុំ​ជាមួយ​លោក​ហោ ណាំហុង​ កាល​ពី​ថ្ងៃ​ទី​៩​ខែ​កុម្ភៈ​ឆ្នាំ​២០១០​កន្លង​ទៅ​នេះ។
លោក​ស្រី​ឯកអគ្គរដ្ឋ​ទូត​សហរដ្ឋ​អាមេរិក Carol A. Rodley និង​លោក Scot Marciel ឧបការី​រង​​ក្រសួង​ការ​បរទេស​សហរដ្ឋ​អាមេរិក នៅ​​ក្នុង​កិច្ច​ប្រជុំ​ជាមួយ​លោក​ហោ ណាំហុង​ កាល​ពី​ថ្ងៃ​ទី​៩​ខែ​កុម្ភៈ​ឆ្នាំ​២០១០​កន្លង​ទៅ​នេះ។

សហរដ្ឋ​អាមេរិក​នៅ​រសៀល​ថ្ងៃ​អង្គារ​នេះ​បាន​ផ្ដល់​ជំនួយ​ជាង​៣៥​លាន​ដុល្លា​អាមេរិក​សម្រាប់​ជួយ​ដល់​ប្រទេស​កម្ពុជា​ក្នុង​ការពង្រឹង​វិស័យ​អប់រំ​និង​វិស័យ​សុខាភិបាល​របស់ខ្លួន​។

រដ្ឋាភិបាល​សហរដ្ឋ​អាមេរិក​បាន​ផ្ដល់​ជំនួយ​ជាង​៣៥​លាន​ដុល្លា​នៅ​ថ្ងៃ​នេះ ​ដល់​ប្រទេស​កម្ពុជា​ ដើម្បី​ជួយ​លើក​តង​ប្រសិទ្ធិភាព​ក្នុង​វិស័យ​សុខាភិបាល ​និង​លើក​តម្កើង​គុណភាព​ក្នុង​វិស័យ​អប់រំ។

ទឹកប្រាក់​ចំនួន​៣៣,៥៥​លាន​ដុល្លា​អាមេរិក​នឹង​ត្រូវ​ប្រើ​សម្រាប់​វិស័យ​សុខាភិបាល​ជាពិសេស​សម្រាប់​កាត់បន្ថយ​អត្រា​ឆ្លង ​និង​ផល​ប៉ះពាល់​របស់​ជំងឺ​អេដស៍ ​ការពារ​និង​កម្ចាត់​ជំងឺ​ឆ្លង​ធំៗ​ដូចជា​ជំងឺ​របេង​ជាដើម​ រួមទាំង​ធ្វើ​ឲ្យ​ប្រសើរ​នូវ​ការគាំពារ​សុខភាព​មាតា ​និង​កុមារ ​និង​សុខភាព​បន្ដ​ពូជ។ ដោយ​ឡែក​ទឹកប្រាក់​ជំនួយ​ចំនួន​១,៥៥ ​លាន​ដុល្លា​ទៀត​សម្រាប់​ពង្រឹង​ការ​អប់រំ​ជា​មូលដ្ឋាន​ និង​ពង្រីក​លទ្ធភាព​ចូលរៀន​របស់​កុមារ​ឲ្យ​បាន​កាន់​តែច្រើន​ ដោយ​រាប់​បញ្ចូល​ទាំង​កុមារ​ជនជាតិ​ភាគតិច​និង​កុមារ​ពិការ​ផង​ដែរ។

លោកស្រី​ ខារ៉ូល រ៉តលី ​(Carole Rodley) ​ឯកអគ្គរដ្ឋទូត​សហរដ្ឋ​អាមេរិក​ប្រចាំ​ក្រុង​ភ្នំពេញ​មាន​ប្រសាសន៍​នៅ​ក្នុង​ពិធី​ចុះ​ហត្ថលេខា​ផ្ដល់​ជំនួយ​ថា ​ការ​អភិវឌ្ឍ​ប្រទេស​កម្ពុជា​ពឹងផ្អែក​លើ​វិស័យ​អប់រំ ​និង​សុខភាព​របស់​ប្រជាពលរដ្ឋ។

“ការ​រីក​ចម្រើន​សេដ្ឋកិច្ច​របស់​ប្រទេស​កម្ពុជា ​និង​អនាគត​នៃ​ការ​រីក​ចម្រើន​ពឹង​ផ្អែក​លើ​ប្រជាពលរដ្ឋ​ដែល​មាន​សុខភាព​មាំទាំ ​និង​មាន​ការ​អប់រំ​ជ្រៅជ្រះ"។

លោក​ ឡុង វិសាលូ ​រដ្ឋលេខាធិការ​ក្រសួង​ការ​បរទេស​មាន​ប្រសាសន៍​ក្នុង​ពិធី​នោះ​ដែរថា​ជំនួយ​របស់​រដ្ឋាភិបាល​សហរដ្ឋ​អាមេរិក​នឹង​ជួយ​ដល់​ប្រទេស​កម្ពុជា ​ក្នុងការ​កាត់​បន្ថយ​ភាព​ក្រីក្រ។

“ក្នុង​នាម​រាជ​រដ្ឋាភិបាល​កម្ពុជា ខ្ញុំ​សូម​សម្តែង​អំណរគុណ​យ៉ាង​ជ្រាលជ្រៅ​ចំពោះ​រដ្ឋាភិបាល​សហរដ្ឋ​អាមេរិក​ដែល​បាន​ផ្ដល់​ជំនួយ​សប្បុរស​ធម៌​ដើម្បី​ធ្វើ​ឲ្យ​ប្រសើរ​ឡើង​នូវ​វិស័យ​អត្ថិភាព​សំខាន់​បំផុត

ចំនួន​ពីរ​សម្រាប់​កាត់បន្ថយ​ភាពក្រីក្រ ​និង​កសាង​សមត្ថភាព​ធនធាន​មនុស្ស​សម្រាប់​កិច្ច​អភិវឌ្ឈន៍​សេដ្ឋកិច្ចសង្គម"។

ប្រទេស​កម្ពុជា​ គឺជា​ប្រទេស​ដ៏​ក្រីក្រ​បំផុត​មួយ​ដែល​ដក​ដង្ហើម​តាម​ជំនួយ​បរទេស​ក្នុង​មួយឆ្នាំៗ​យ៉ាង​តិច​ចំនួន ​៦០០​លាន​ដុល្លារ។ សហរដ្ឋ​អាមេរិក ​គឺជា​ប្រទេស​ផ្ដល់​ជំនួយ​សំខាន់​មួយ​សម្រាប់​ជួយ​ដល់​កិច្ច​អភិវឌ្ឈន៍​របស់​កម្ពុជា។

សូម​បញ្ជាក់​ថា ​ជំនួយ​ចុងក្រោយ​បាន​ធ្វើ​ឲ្យ​ជំនួយ​របស់​រដ្ឋាភិបាល​សហរដ្ឋ​អាមេរិក​ចាប់​តាំង​ពី​ឆ្នាំ ២០០២​មក ​សម្រាប់​ជួយ​ពង្រឹង​និង​អភិវឌ្ឈន៍​វិស័យ​សុខាភិបាល​ និង​វិស័យ​អប់រំ​នៅក្នុង​ប្រទេស​កម្ពុជា​កើនដល់​ចំនួន​ ២៧៧ ​លាន​ដុល្លា​រហូត​មក​ទល់​នឹង​ឆ្នាំ​២០១០​ នេះ។ ដោយ​ឡែក​នៅ​ថ្ងៃ​ពុធ ស្អែក​នេះ សហរដ្ឋ​អាមេរិក​នឹង​ផ្ដល់​ជំនួយ​ចំនួន​១៦,៤៤​លាន​ដុល្លារ​បន្ថែម​ទៀត​ដល់​ប្រទេស​កម្ពុជា​សម្រាប់​ជួយ​ជម្រុញ​កំណើន​សេដ្ឋកិច្ច​របស់​ប្រទេស​ដ៏​ក្រីក្រ​មួយនេះ៕

XS
SM
MD
LG