ភ្ជាប់​ទៅ​គេហទំព័រ​ទាក់ទង

សហ​ជីព​កម្មករ​ទាម​ទារ​តម្លើង​ប្រាក់​ឈ្នួល


ភ្នំពេញ៖ សហព័ន្ធ​សហជីព​ ​សមាគម​ និង​សហភាព​កាត់ដេរ​ក្នុង​ប្រទេស​កម្ពុជា​ចំនួន​១៣​បាន​ទាមទារ​ឲ្យ​ក្រសួង​ការងារ​ និង​សមាគម​កាត់ដេរ​រោងចក្រ​ឲ្យ​ដំឡើង​ប្រាក់​ឈ្នួល​ដល់​ក្រុម​កម្មករ​ពីរ​៧៥​ដុល្លារ​រហូត​ដល់​៩៣​ដុល្លារ​ក្នុង​១ខែ។​ ក៏​ប៉ុន្តែ​មន្ត្រី​រដ្ឋាភិបាល​បាន​និយាយថា​ ​ការ​ទាមទារ​នេះ​មិន​អាច​ទទួល​យក​បាន​ទេ។

នៅ​ក្នុង​លិខិត​ចំនួន​ពីរ​ដាច់​ដោយ​ឡែកៗ​ពីគ្នា​ ​ដែល​បាន​ផ្ញើរ​ជូន​ទៅ​ក្រសួង​ការងារ​និង​សមាគម​រោងចក្រ​កាត់ដេរ​កម្ពុជា​ ​សហព័ន្ធ​សហជីព​ ​សមាគម​ ​និង​សហភាព​ការងារ​កម្ពុជា​ ​បាន​ទទូច​ស្នើសុំឲ្យ​ដំឡើង​ប្រាក់​ឈ្នួល​ដល់​ក្រុម​កម្មករ​ពី​៧៥​ដុល្លារ​ រហូត​ដល់​ទៅ​៩៣​ដុល្លារ​ក្នុង​មួយ​ខែ។

ការ​ទាមទារ​របស់​ក្រុម​សហព័ន្ធ​សហជីព​រោងចក្រ​កាត់ដេរ​ទាំង​១៣​នេះ​បាន​កើត​មាន​ឡើង​ ​បន្ទាប់ពី​ក្រុម​ប្រឹក្សា​ការងារ​បាន​សម្រេច​កាលពី​ថ្ងៃ​ទី៨ ខែ​កក្កដា​កន្លង​ទៅ​នេះ អំពី​ការ​ដំឡើង​ប្រាក់​ឈ្នួល​ ប្រាំដុល្លារ​ និង​ប្រាក់​ទ្រទ្រង់​ជីវភាព​ចំនួន​ប្រាំដុល្លារ​បន្ថែម​ទៀតជា​ប្រាក់ខែ​គោល​រហូត​ដល់​ឆ្នាំ​២០១៤។

ក្រុម​សហព័ន្ធ​សហជីព​បាន​ចាត់ទុក​ថា​ ថវិកា​នេះ​មាន​ចំនួន​តិចតូច​ពេក​ ​មិន​អាច​ធានា​ដល់​ការ​ចំណាយ​ជីវភាព​ប្រចាំថ្ងៃ​ដល់​ក្រុម​កម្មករ​ទេ​ ​ដូចជា​ ​អាហារ​ ​ការស្នាក់នៅ ​និង​ការ​ចំណាយ​ចាំបាច់​មួយ​ចំនួន​ទៀត។

លោក​អាត់ ធន់​ ប្រធាន​សហភាព​ការងារ​កម្ពុជា​ បាន​មាន​ប្រសាសន៍​ថា​ ​យើង​ក៏​បាន​ទាមទារ​ផង​ដែរ​ឲ្យ​ក្រសួង​ការងារ​ផ្តល់​ប្រាក់​អតីត​ភាព​ការងារ​ចំនួន​ពីរ​ដុល្លារ​ជា​រៀងរាល់​ប្រចាំ​ឆ្នាំ​ ប្រាក់​ថ្លៃ​បាយ​ នៅ​ក្នុង​មួយ​ម៉ោង​ ​ពី​១០០០​ពាន់រៀល​រហូតដល់​៣០០០​រៀល​ ​និង​ប្រាក់​រង្វាន់​ការងារ​ទៀង​ទាត់ចំនួន​ ដប់​ដុល្លារ​ក្នុង​មួយ​ខែ។

លោក ​អាត់ ធន់ ​បាន​មាន​ប្រសាសន៍​ថា​ ​ការ​ទាមទារ​តំឡើង​ប្រាក់​ឈ្នួល​ដល់​ក្រុម​កម្មករ​នេះ ដោយសារ​តែ​នៅ​កម្ពុជា​ ​ ​អតិផរណាមាន​ការ​កើន​ឡើង​ពី​មួយឆ្នាំ​ទៅ​មួយ​ឆ្នាំ​ ​ហើយ​ប្រាក់​បៀវត្សរ៍​របស់​ក្រុម​កម្មករ​នៅ​ដដែល។

«ចំណាយ​ទៅ​លើ​ទឹក​ ​ភ្លើង​និង​តម្រូវការ​ចាំបាច់​របស់​គាត់​ហ្នឹង​គឺ​ថា​ ​ចាយ​អត់​រស់​ទេ។​ រាល់ថ្ងៃ​ហ្នឹង គឺ​ថា​ ​ខ្ចី​លុយ​គេ​ ​និង​គាត់​ឈឺ​ស្កាត់​ច្រើន​ ​ដោយសារ​គាត់​ពិបាក​ ​ហើយ​គាត់​ចេញ​ពី​វិស័យ​នេះ​ច្រើន​ដោយសារ​លុយ​មិនគ្រប់»។

លោក​អ៊ុំ មាន ​រដ្ឋលេខាធិការ​ក្រសួង​ការងារ​បាន​មាន​ប្រសាសន៍​ថា​ ​ការ​ទាមទារ​របស់​ក្រុម​សហព័ន្ធ​សហជីព​ទាំង​១៣​នេះ ​មិន​អាច​ទទួល​យក​បាន​ទេ។

«រឿង​ដដែលៗ​ទេ​ ​មិន​បាច់​ទេ​ ​រឿង​នេះ​អត់​ទៅមុខ​ទេ។​ គណៈ​កម្មការ​ប្រឹក្សា​ការងារ​ ​គេ​បាន​សម្រេច​រួច​ហើយ»។

ប្រទេស​កម្ពុជា​មាន​រោងចក្រ​កាត់ដេរសម្លៀក​បំពាក់​សរុប​ជាង​៣០០​រោងចក្រ​ ​ដែល​អាច​ស្រូប​ទាញ​កម្លាំង​កម្មករ​ជាង​៣២​ម៉ឺន​នាក់។

បច្ចុប្បន្ន​នេះ​ ​ប្រាក់ខែ​របស់​ក្រុម​កម្មករ​ទទួល​បាន​ពី៥០​ដុល្លារ​ទៅ​ជាង​៦០​ដុល្លារ​តែប៉ុណ្ណោះ​ នៅ​ក្នុង​មួយ​ខែ។

លោក​វ៉ាន់ សូអៀង ប្រធាន​សមាគម​រោងចក្រ​កាត់ដេរ​នៅ​កម្ពុជា​ ដែល​ហៅកាត់​ថា​ ​GMAC​ ​បាន​ឲ្យ​ដឹង​ថា​ ​ប្រាក់ខែ​របស់​ក្រុម​កម្មករ​ខ្មែរ​បច្ចុប្បន្ន​នេះ​ ​ប្រហាក់​ប្រហែល​ទៅ​នឹង​ប្រទេស​ជិត​ខាង។

លោក​មាន​ប្រសាសន៍​ថា​ ​ការទាមទារ​នេះធ្វើឡើង​ដោយ​សំឡេង​ភាគ​តិច​តែប៉ុណ្ណោះ​ ​មិនមែន​តំណាង​ឲ្យ​សំឡេង​ភាគ​ច្រើន​នោះទេ។

«ខ្ញុំ​ចង់​ឲ្យ​មួយខែ​មួយពាន់​ដែរណា​ ​បើ​ធ្វើ​បាន។ គេ​រកស៊ី​ម៉េច​បាន? គេ​ដួល​ ​ដួល​អត់​មាន​ការងារ​ធ្វើ។ ​ ឆ្នាំ​មុន​មាន​ប៉ុន្មាន​ម៉ឺននាក់​ ​កម្មករ​អត់​មាន​ការងារ​ធ្វើ? ​ពិបាក​ណាស់​ ​នេះ​ដាក់​ ៦១ដុល្លារ​អ្នកណា​រកស៊ី​បាន?»

លោក ​ជា មុន្នី ប្រធាន​សហជីព​សេរីកម្មករ​របស់​ប្រទេស​កម្ពុជា ​បាន​គាំទ្រ​ការ​ទាមទារ​របស់​ក្រុម​សម្ព័ន្ធ​សហជីព​ទាំង​១៣​នេះ។​ ​ក៏ប៉ុន្តែលោក​បាន​មាន​ប្រសាសន៍​ថា​ ​យើង​ត្រូវ​តែ​ធ្វើការ​ពិចារណា​ឲ្យ​បាន​ល្អិតល្អន់​ ​ដើម្បី​កុំឲ្យ​ការ​ទាមទារ​នេះ​ ជួប​នឹង​បរាជ័យ។

លោក​ជា មុនី្ន​បាន​មាន​ប្រសាសន៍​ទៀត​ថា​ ​សហជីព​សេរី​កម្មករ​របស់​លោក​នឹង​បន្ត​ទាមទារ​ការ​ដំឡើង​ប្រាក់​បៀវត្សរ៍​ដល់​ក្រុម​កម្មករ​នៅ​ឆ្នាំ​២០១១​ខាង​មុខ​នេះ៕

XS
SM
MD
LG