សេចក្តីថ្លែងការណ៍របស់សហជីពសេរីកម្មករនៃព្រះរាជាណាចក្រកម្ពុជា ដែលបានចេញផ្សាយនៅថ្ងៃព្រហស្បត៍នេះ បានបញ្ជាក់ថា លោកផៅ សាក់ តំណាងសហជីពសេរីកម្មករប្រចាំរោងចក្រ Generation ត្រូវបានជនមិនស្គាល់មុខចំនួនពីរនាក់ពួនស្ទាក់វាយប្រហារនិងដំបងឈើ បណ្តាលឲ្យជនរងគ្រោះរងរបួសជាទម្ងន់ត្រង់ក្បាល ហើយបច្ចុប្បន្ននេះកំពុងតែសម្រាកព្យបាលសង្គ្រោះបន្ទាន់ នៅមន្ទីរពេទ្យកាល់ម៉ែតក្រុងភ្នំពេញ។
ការវាយប្រហារនេះបានកើតឡើងបន្ទាប់ពីជនរងគ្រោះចេញមុខតវ៉ាអោយថៅកែរោងចក្រ បើកប្រាក់ ឈ្នួលដល់ក្រុមកម្មករមុនថ្ងៃភ្ជុំបិណ្ឌ។
សហជីពសេរីកម្មករបានហៅករណីនេះថា ជាការប៉ុនប៉ងធ្វើឃាដ ក៏ប៉ុន្តែប៉ូលីសបាននិយាយថាទំនងជាទំនាស់រឿងសេពគ្រឿងស្រវឹងទៅវិញ។
ការវាយប្រហារនេះ បានកើតឡើងនៅភូមិទួលអំពិល ឃុំត្រពាំងគង ស្រុកសំរោងទង ខេត្តកំពង់ស្ពឺ ខណៈដែលពេលជនរងគ្រោះបានធ្វើដំណើតាមម៉ូតូចេញពីសាលាបង្រៀនឈ្នួលមួយវិលត្រឡប់មកក្នុងរោងចក្រវិញ។
លោកជា មុន្នី ប្រធានសហជីពសេរីកម្មករ នៃព្រះរាជាណាចក្រកម្ពុជា បាននិយាយថា ការវាយប្រហារនេះ បានកើតឡើងក្រោយពីជនរងគ្រោះ បានចេញមុខតវ៉ាជាមួយ និងថៅកែរោងចក្រឲ្យបើកប្រាក់បៀរវត្សរ៍ដល់ក្រុមកម្មករមុនថ្ងៃបុណ្យភ្ជុំបិណ្ឌ។
លោកមានប្រសាសន៍ថា នេះគឺជាករណីប៉ុនប៉ងឃាដកម្មទៅលើតំណាងសហជីពសេរីកម្មករ និងជាការគំរាមកំហែងមួយដល់អ្នកតំណាងសហជីពសេរីកម្មករ ដែលហ៊ានចេញមុខការពារផលប្រយោជន៍ដល់ក្រុមកម្មករពិតប្រាកដ។
«សហជីពដែលរងគ្រោះជាងគេ គឺសហជីពសេរីកម្មករនៃព្រះរាជាណាចក្រកម្ពុជា ដែលជាសហជីពមួយខុសពីសហជីពដទៃ។ សហជីពដទៃទៀត គេមានសិទ្ឋិធ្វើអ្វីផ្តេសផ្តាស់ស្រេចតែចិត្ត ប៉ុន្តែ សម្រាប់យើងអត់បានទេ»។
លោកឃុត សុផល អធិការប៉ូលីសស្រុកសំរោងទងបាននិយាយថា ប៉ូលីសកំពុងតែធ្វើការស៊ើបអង្គេតទៅលើករណីវាយប្រហារនេះ។ លោកមានប្រសាសន៍ថា ការវាយប្រហារនេះ មិនមែនជាការប៉ុនប៉ងករណីឃាដកម្មទេ ទំនងជាអាចកើតមានឡើងរឿងទំនាស់ក្រោយពីសេពគ្រឿងស្រវឹងរួចមក។
«អានេះ មិនមែនឃាដកម្មទេ ព្រោះអ្វី កន្លែងហ្នឹង វាច្រើនតែថា វាមានផ្សារគេមួយ ផ្សារគេបើកលក់ពេលយប់ អញ្ចឹងវាច្រើនតែថា ការហូបចុកស្រវឹង។ ហើយអ្នករងគ្រោះហ្នឹងក៏រាងស្រវឹងញឹកដែរ តាមសព្វមួយដង»។
ចំណែកលោកឧត្តមសេនីយត្រីកែវ ពិសី ស្នងការប៉ូលីសខេត្តកំពង់ស្ពឺ បាននិយាយាថា រហូតមកទល់ពេលនេះពុំទាន់មានជនសង្ស័យណាមា្នក់ត្រូវបានឃាត់ខ្លួននៅឡើយទេ។ ហើយប៉ូលីសបានកំណត់មុខសញ្ញាទៅលើជនសង្ស័យហើយ។
លោករត្ន័ ថាវី មន្រ្តីផ្នែកស៊ើបអង្គេតរបស់សមាគមសិទ្ឋិមនុស្ស ADHOC វិញ បាននិយាយថា លោកបានទទួលដំណឹងករណីនេះផងដែរ ក៏ប៉ុន្តែសមាគមសិទិ្ឋមនុស្ស ADHOC ពុំទាន់បានបើកធ្វើការស៊ើបអង្គេតនៅឡើយទេ។
«នៅទេ ព្រោះជនរងគ្រោះទៅសម្រាកព្យាបាលនៅភ្នំពេញ»។
យ៉ាងតិចមានសមាជិកសហជីពសេរីកម្មករនៃព្រះរាជាណាចក្រកម្ពុជាចំនួនបួននាក់ រួមទាំងលោក ជា វិជ្ជា មេដឹកនាំសហជីពសេរីកម្មករដ៏ល្បីល្បាញ ត្រូវបានឃាដករបាញ់សម្លាប់តាំងពីឆ្នាំ២០០៤មក និង ចំនួនប្រាំពីរនាក់ផ្សេងទៀត បានទទួលរងរបួស។
លោកជា មុន្នី បាននិយាយថា ឃាដករពិតប្រាកដពុំទាន់បានចាប់ខ្លួននៅឡើយទេ ខណៈពេលដែលតំណាងសហជីពចំនួនបីរូបផ្សេងទៀតកំពុងតែជាប់ឃុំឃាំងនៅក្នុងពន្ឋនាគារនៅឡើយ។
ទំនាស់ផលប្រយោជន៍រវាងក្រុមកម្មករ និងថៅកែរោងចក្រ នៅតាមបណ្តារោងចក្រមួយចំនួន មួយរយៈកាលចុងក្រោយនេះ បានកើតមានឡើងជាបន្តបន្ទាប់ រហូតដល់មានចលនាកូដកម្ម ដំឡើងប្រាក់ បៀរវត្សរ៍។ ដោយសារតែប្រាក់បៀរវត្សរ៍របស់ក្រុមកម្មករមិនអាចផ្គត់ផ្គង់ទៅនិងជីវភាពរបស់ពួកគេបាន៕