ភ្ជាប់​ទៅ​គេហទំព័រ​ទាក់ទង

មេ​ដឹកនាំ​សហជីព​តំបន់​អាស៊ី ​និង​អឺរ៉ុប​ប្រឆាំង​កិច្ចសន្យា​ការងារ​រយៈ​ពេល​ខ្លី


កម្មករ​ធ្វើ​បាតុកម្ម​ប្រឆាំង​ការ​រំលោភ​សិទ្ធិ​ការងារ។

មេ​ដឹកនាំ​សហជីព​មក​ពី​ប្រទេស​ចំនួន​៥​ ក្នុង​តំបន់​អាស៊ី ​និង​អឺរ៉ុប​ បាន​បើក​យុទ្ធនាការ​នៅ​ក្នុង​ខេត្ត​ កណ្ដាល​ ដើម្បី​ប្រឆាំង​ទៅ​នឹង​ការ​ផ្ដល់​កិច្ច​សន្យា​រយៈ​ពេល​ខ្លី​ដល់​កម្មករ​រោង​ចក្រ​កាត់ដេរ។​ កិច្ច​សន្យា​រយៈ​ពេល​ខ្លី​នេះ​ ដែល​ក្រុមតំណាង​សហជីព​លើក​ឡើង​ថា ​បាន​ធ្វើ​ឲ្យ​ប៉ះពាល់​ដល់​ផល​ប្រយោជន៍​កម្មករ​យ៉ាង​ធ្ងន់ធ្ងរ។

លោក​ គង់ ​សុឋានរិទ្ធ​ រាយ​ការណ៍​ជូន​ពីខេត្ត​កណ្ដាល​ ដូច​ត​ទៅ៖

តំណាង​កម្មករ​ប្រមាណ​ជាង​១០០​នាក់​ រួម​ជាមួយ​នឹង​តំណាង​សហជីព​កម្មករ​មក​ពី​ប្រទេសឥណ្ឌូណេស៊ី​ ណេប៉ាល់ ​បង់ក្លាដេស​ និង​ បែលហ្ស៊ីក ​បាន​ប្រមូល​ផ្ដុំ​គ្នា​ ក្រោម​រោង​សំពត់​កៅស៊ូ​មួយ​ នៅ​ជាប់​នឹង​ផ្លូវ​ក្បែរ​មាត់ទន្លេ​ ក្នុង​ស្រុក​ស្អាង ​ចម្ងាយ​ប្រមាណ​ជាង​១០​គម​ ពី​ទីរួមខេត្ត​កណ្ដាល។​ ការ​ប្រមូល​ផ្ដុំ​គ្នា​ ដែល​បាន​ធ្វើ​ឡើង ​កាល​ពី​ថ្ងៃ​អាទិត្យ​កន្លង​ទៅ​នេះ​ គឺ​ជា​យុទ្ធនាការ​ជា​លើក​ដំបូង​ ដើម្បី​ធ្វើ​ប្រឆាំង​នឹង​ការ​ផ្ដល់​កិច្ច​សន្យា​ការងារ​ រយៈ​ពេល​ខ្លី​ដល់​កម្មករ​រោងចក្រ​កាត់ដេរសម្លៀក​បំពាក់​ នៅ​ក្នុង​ប្រទេស​កម្ពុជា​ ដែល​ក្រុម​សកម្មជន​សហជីព​អះអាង​ថា ​កិច្ច​សន្យា​របៀប​នេះ​ បាន​ធ្វើ​ ឲ្យ​ខូច​ប្រយោជន៍​ជា​ច្រើន​ដល់​កម្មករ​ខ្មែរ។

លោក ​អាត់ ធន់​ ប្រធាន​សម្ព័ន្ធ​សហជីព​ប្រជាធិប​តេយ្យ​កម្មករ​កាត់​ដេរ​កម្ពុជា​ ដែល​ហៅ​កាត់​ថា​ CCAWDU​ដែល​បាន​រៀបចំ​យុទ្ធនាការ​នេះ ​បាន​លើក​ឡើង​ថា ​កិច្ច​សន្យា​ខ្លី​នេះ​ត្រូវ​បាន​អនុវត្ត​ដោយ​ រោង​ចក្រ​កាត់ដេរ​ភាគច្រើន​ ក្នុង​ចំណោម​រោងចក្រ​ទាំង​ស្រប​ច្បាប់​ និង​ខុស​ច្បាប់​សរុប​ជាង​៤០០​នៅ​ក្នុង​ប្រទេស​កម្ពុជា។

លោក​ អាត់ ធន់​បន្ថែម​ថា​ ការ​ផ្ដល់​កិច្ច​សន្យា​ការងារ​រយៈ​ពេល​ខ្លី ​បាន​ធ្វើ​ឲ្យ​និយោជក​ ឬ​ថៅ​កែរោង​ ចក្រ​ទទួល​បាន​ផល​ចំណេញ​ច្រើន។​ ផ្ទុយ​ទៅ​វិញ​ កិច្ច​សន្យា​នេះ​គឺ​ជា​សម្ពាធ​ដល់​ក្រុម​កម្មករ​ ដែល​ ពួក​គេ​ងាយ​នឹង​បាត់​បង់​ឱកាស​ធ្វើ​ការ។​ ពួក​គេ​មិន​អាច​ធ្វើ​ការ​តវ៉ា​បាន។​ ពួក​គេ​ងាយ​នឹង​ត្រូវ​បង្ខំ​ឲ្យ​ធ្វើ​ការ​ច្រើន​ម៉ោង។​ ពួក​គេ​មិន​មាន​ឱកាស​ចូល​ជា​សមាជិក​សហ​ជីព​ ដែល​អាច​ការ​ពារ​សិទ្ធិ​ការងារ​របស់​ ពួក​គេ។​ ជាង​នេះ​ទៅ​ទៀត ​កម្មករ​ដែល​មាន​កិច្ច​សន្យា​ការងារ​រយៈ​ពេល​ខ្លី​នឹង​មិន​អាច​ទទួល​បាន​ប្រាក់​អតីត​ភាព​ក្នុង​ការងារ​ទេ។

លោក ​អាត់ ធន់​មាន​ប្រសាសន៍​ថា ​យុទ្ធនាការ​នេះ​នឹង​បញ្ជ្រាប​ដល់​ក្រុម​កម្មករ​ឲ្យ​ពួក​គេ​យល់​ពី​ ផល​វិបាក​ទាំង​នេះ​ ហើយ​ដើម្បី​ឲ្យ​ពួក​គេ​ធ្វើ​ការ​តស៊ូ​ដើម្បី​ទាម​ទារ​ការ​លុប​បំបាត់​ការ​ប្រើប្រាស់​កិច្ច​ សន្យា​នេះ​ចោល។

“យើង​ពន្យល់​កម្មករ​ឲ្យ​ដឹង​ពី​ផល​ប៉ះពាល់​នេះ។​ ហើយ​ទី​ពីរ​ គឺ​យើង​ធ្វើ​យ៉ាង​ណា​ ​ចង​ក្រង​គាត់​ឲ្យ​ទៅ​ ជា​សំឡេង​តែ​មួយ​ដើម្បី​ទាមទារ​កុំ​ឲ្យ​គេ​ប្រើប្រាស់​កិច្ច​សន្យា​ហ្នឹង​ ​ដែល​ជា​ការ​ខាត​ប្រយោជន៍​ដល់​គាត់​ទៀត។​ បើ​សិន​ជា​និយោជក​នៅ​តែ​ប្រើប្រាស់​កិច្ច​សន្យា​នេះ ​បាន​ន័យ​ថា​ ​និយោជក​រំលោភ​ច្បាប់"។

យោង​តាម​តួលេខ​ផ្លូវការ​ពី​ក្រសួង​ពាណិជ្ជ​កម្ម​បាន​ឲ្យ​ដឹង​ថា​ ​ឧស្សាហ​កម្ម​កាត់ដេរ​សម្លៀក​បំពាក់​ នៅ​ក្នុង​ប្រទេស​កម្ពុជា​ ​បាន​ស្រូប​យក​កម្លាំង​ពលកម្ម​ចំនួន​ជាង​៣២​ម៉ឺននាក់​ ​ក្នុង​នោះ​ភាគ​ច្រើន​លើស​លុប​គឺ​ជា​ស្ដ្រី។​ ពួក​គេ​អាច​ទទួល​ប្រាក់​ខែ​ជា​មធ្យម​ពី​ជាង​៣០​ដុល្លារ​ទៅ​ដល់​ជាង​១០០​ដុល្លារ​ ក្នុង​មួយ​ខែ។ ​ក៏​ប៉ុន្ដែ​ជាញឹកញាប់​ តែង​តែ​មាន​ការ​តវ៉ា​ពី​ការ​បញ្ឈប់​កម្មករ​ ឬ​ការ​មិន​គោរព​ច្បាប់​ការងារ​ ពី​សំណាក់​ថៅកែ​រោងចក្រ​ជា​ដើម។

ប្រធាន​សម្ព័ន្ធ​សហជីព​ប្រជាធិប​តេយ្យ​ កម្មករ​កាត់​ដេរ​កម្ពុជា​ ​ លោក​អាត់ ​ធន់​បញ្ជាក់​បន្ថែម​ថា​ ​ ដោយសារ​កម្មករ​រោង​ចក្រកាត់​ដេរ​ទទួល​បាន​កិច្ច​សន្យា​ការងារ​រយៈ​ពេល​ខ្លី​ ​ដូច្នេះ​ពួក​គេ​ប្រឈម​ នឹង​ការ​ខ្វះខាត​ជំនាញ​ និង​ខ្វះ​ខាត​គុណភាព​ក្នុង​ផលិត​កម្ម​របស់​ពួក​គេ។

លោក​ អុន ​ផល្លី ​កម្មករ​មក​ពី​រោងចក្រ​កាត់ដេរ​មួយ ​នៅ​ស្រុក​បាទី ​ខេត្ត​តាកែវ​ ​លោក​ប្រាថ្នា​ចង់​ឲ្យ​ ម្ចាស់​រោងចក្រ​កាត់ដេរ​ទាំង​ឡាយ​បញ្ចប់​ការ​ផ្ដល់​កិច្ច​សន្យា​រយៈ​ពេល​ខ្លី​ដល់​កម្មករ​រោងចក្រ​ ចាប់​ ពី​ពេល​នេះ​ត​ទៅ។

“ឥឡូវ​គេ​រើស​កម្មករ​ច្រើន។​ ប៉ុន្ដែ​គេ​រើស​តែ​២ ​ខែ​ទេ។​ ខ្ញុំ​ចង់​ឲ្យ​ក្រុម​ហ៊ុន​លុប​បំបាត់​កិច្ច​សន្យា​ខ្លី​ហ្នឹង​ ចាប់​ពី​ឥឡូវ​ត​ទៅ"។

លោក​អាត់ ​ធន់ ​លើក​ឡើង​ថា​ ​យុទ្ធនាការ​ស្ដីពី​ការ​ប្រឆាំង​នឹង​ការ​ផ្ដល់​កិច្ច​សន្យា​ខ្លី​ដល់​ក្រុម​កម្មករ​ នឹង​ត្រូវ​ធ្វើ​នៅ​តំបន់​ដែល​សម្បូរ​រោងចក្រ​កាត់ដេរ​ជា​បន្ដ​ទៀត​ ​ដូច​ជា​នៅ​ទីក្រុង​ភ្នំពេញ​ ខេត្ត​កំពង់​ស្ពឺ​ និង​ខេត្ត​កំពង់​សោម​ជាដើម។

លោក​យឹម ​សេរីវឌ្ឍនៈ​ អ្នក​សម្រប​សម្រួល​កម្ម​វិធី​ជាតិ​នៃ​គម្រោង​អប់រំ​កម្មករ​របស់​អង្គការ​ពលកម្ម​ អន្ដរ​ជាតិ ​ILO ​ដែល​មាន​វត្តមាន​នៅ​ក្នុង​យុទ្ធនាការ​នេះ​ បាន​ទទួល​ស្គាល់​ថា​ ​កម្មករ​រោងចក្រ​នៅ​ក្នុង​ ប្រទេស​កម្ពុជា​កំពុង​ទទួល​រង​ផល​ប៉ះពាល់​ពី​ការ​ផ្ដល់​កិច្ច​សន្យា​ការងារ​រយៈ​ពេល​ខ្លី​នេះ។​ ហើយ​ លោក​ចង់​ឲ្យ​រដ្ឋាភិបាល​កម្ពុជា​យក​បញ្ហា​នេះ​ទៅ​ពិចារណា។

"គឺ​បាន​ជម្រាប​ដល់​រដ្ឋាភិបាល​ឲ្យ​លោក​បាន​យល់​ថា​ ​អ្វី​ដែល​កម្មករ​កំពុង​ប្រទះ​ គឺ​ជា​កិច្ច​សន្យា​ខ្លី​មួយ​ ដែល​កម្មករ​ មិន​អាច​ទ្រាំ​បាន​ទេ។ ​អញ្ចឹង​ស្នើ​សុំ​ឲ្យ​រដ្ឋាភិបាល​មេតា្ត​ពិនិត្យ ​និង​រក​វិធាន​ការ​ចូល​រួម​ ដោះ​ស្រាយ"។

លោក​កុយ ​ទេពតារាវុធ ​ប្រធាន​នាយក​ដ្ឋាន​ដោះ​ស្រាយ​វិវាទ​ការងារ​របស់​ក្រសួង​ការងារ​ និង​ បណ្ដុះ​បណ្ដាល​វិជ្ជាជីវៈ​ មាន​ប្រសាសន៍​ថា ​ទំនង​ជា​មិន​ទាន់​មាន​ការ​រំលោភ​ច្បាប់​តាម​រយៈ​ការ​ផ្ដល់​ កិច្ច​សន្យា​ការងារ​រយៈ​ពេល​ខ្លី​នៅ​ឡើយ​ទេ។

“ទី​មួយ ​ការ​អនុវត្ត​ច្បាប់​ការងារ​ក្នុង​វិស័យ​ការងារ​ ល្អ​ប្រសើរ​ណាស់​បច្ចុប្បន្ន​នេះ ​យោង​ទៅ​លើ​របាយ​ការ​របស់​គម្រោង​រោងចក្រ​កាន់​តែ​ប្រសើរ​របស់​អង្គការ​ពលកម្ម​អន្ដរ​ជាតិ។​ ហើយ​យោង​លើ​របាយ​ការ​គម្រោង​រោងចក្រ​កាន់តែ​ប្រសើរ​ហ្នឹង ​ដូចជា​មិនមាន​គេ​ធ្វើអ្វី​ខុស​ច្បាប់​ទេ ​ ​ព្រោះ​ថា ​បើសិន​ជា​ខុស​ច្បាប់​គម្រោង​នេះ​ត្រូវ​បាន​គេ​ផ្សព្វផ្សាយ​នៅ​លើ​ពិភពលោក​តែ​ម្ដង"។

វិស័យ​កាត់ដេរ​តំណាង​ឲ្យ​ការ​នាំ​ចេញ​ធំ​ជាង​គេ​របស់​ប្រទេស​កម្ពុជា។​ ការ​នាំ​ចេញ​ក្នុង​វិស័យ​នេះ​កាល​ពី​ឆ្នាំ​២០០៩​ កន្លង​ទៅ​មាន​ទំហំ​ទឹក​ប្រាក់​ចំនួន​២​៣៨៥​លាន​ដុល្លារ​អាមេរិក។

នៅ​ក្នុង​ការ​ធ្វើ​យុទ្ធនាការ​ប្រឆាំង​នឹង​ការ​ផ្ដល់​កិច្ច​សន្យា​ខ្លី​ ​អ្នក​តំណាង​សហជីព​មក​ពី​ប្រទេស​នានា​ បាន​លើក​ទឹក​ចិត្ត​ឲ្យ​កម្មករ​កម្ពុជា​ចូល​រួម​លុបបំបាត់​នូវ​ការ​ប្រើ​ប្រាស់​កិច្ច​សន្យា​នេះ។

នៅ​ក្នុង​រយៈ​ពេល​ពីរ​សប្ដាហ៍​ទៀតនឹង​មាន​កិច្ច​ប្រជុំ​មួយ​របស់​អង្គការ ​ILO​ នៅ​ក្រុង​ហ្សឺណែវ​ ប្រទេស​ ស្វ៊ីស​ ដែល​នឹង​មាន​ការ​ចូលរួម​ពី​រដ្ឋ​មន្ដ្រី​ក្រសួង​ការងារ ​តំណាង​និយោជក​ និង​សហជីព​កម្មករ។

លោក​ស្រី ​ហ្វេដ្រា​ វ៉ាន់ហ៊ុយសេ ​អ្នក​សម្រប​សម្រួល​ប្រចាំ​ទ្វីប​អាស៊ី​របស់​អង្គការ​ចលនា​សាមគ្គី​ភាព ពិភព​លោក ​មក​ពី​បែលហ្ស៊ិក​ ដែល​បាន​ធ្វើ​ការ​សិក្សា​ស្រាវជ្រាវ​ទៅ​លើ​ស្ថាន​ភាព​កម្មករ​នៅ​ក្នុង​តំបន់​ ចាប់​តាំង​ពី​ឆ្នាំ​២០០៨​មកម្ល៉េះ​ មាន​ប្រសាសន៍​ថា ​ការ​ផ្ដល់​កិច្ច​សន្យា​ការងារ​រយៈពេល​ខ្លី​បាន​បង្ក​ ការ​រំលោភ​បំពាន​លើ​សិទ្ធិ​កម្មករ​ជា​ច្រើន​នៅ​ក្នុង​តំបន់​អាស៊ី។

លោក​ស្រី ​ហ្វេដ្រា ​វ៉ាន់ហ៊ុយសេ ​បាន​សន្យា​ថា​ ​លោក​ស្រី​នឹង​លើក​បញ្ហា​ការ​ផ្ដល់​កិច្ច​សន្យា​ការងារ​រយៈ​ពេល​ខ្លី​នេះ​ដើម្បី​ឲ្យ​គេ​ដាក់​ក្នុង​របៀប​វារ​នៃ​ការ​ជជែក​គ្នា​នៅ​ក្នុង​កិច្ច​ប្រជុំ​នោះ៕

XS
SM
MD
LG