ភ្ជាប់​ទៅ​គេហទំព័រ​ទាក់ទង

មន្ដ្រី​អ.ស.ប.​មក​កម្ពុជា​​សិក្សា​វាយតម្លៃ​អំពី​សាលាក្ដី​ខ្មែរ​ក្រហម​


មន្ដ្រី​ជាន់​ខ្ពស់​របស់​អង្គការ​សហ​ប្រជាជាតិ​មួយ​រូប​កំពុង​បំពេញ​ទស្សន​កិច្ច​នៅ​ប្រទេស​កម្ពុជា​ ​ដើម្បី​ស្វែង​រក​លទ្ធភាព​ធ្វើ​ឲ្យ​មាន​ការ​រីក​ចម្រើន​ដល់​សាលាក្ដី​ខ្មែរ​ក្រហម​ ​និង​ដើម្បី​ស្វែង​រក​ការ​គាំទ្រ​ផ្នែក​ហិរញ្ញ​វត្ថុ​ពី​ប្រទេស​ម្ចាស់​ជំនួយ។

អ្នក​ជំនាញ​ការ​ពិសេស​របស់​អង្គការ​សហ​ប្រជាជាតិ​សម្រាប់​សាលាក្ដី​ខ្មែរ​ក្រហម​ ​លោក​គ្លីន វីលាមសុន​ (Clint Williamson) ​បាន​ចាប់​ផ្ដើម​កិច្ច​ប្រជុំ​ជា​សេរី​របស់​ខ្លួន​នៅ​ក្នុង​ទីក្រុង​ភ្នំពេញ​ជា​មួយ​មន្ដ្រី​នានា​ ​ប្រយោជន៍​ដើម្បី​ធ្វើការ​វាយ​តម្លៃ​អំពី​ការ​វិវឌ្ឈន៍​របស់​សាលាក្ដី​ ​និង​ដើម្បី​ស្វែង​រក​មូលនិធិ​សម្រាប់​ទ្រទ្រង់​សាលាក្ដី​ពិសេស​នេះ​ផង​ដែរ។

កិច្ច​ប្រជុំ​នេះ​ធ្វើឡើង​ស្រប​ពេល​ដែល​អង្គការ​ច្បាប់​មួយ​របស់​សហ​រដ្ឋ​អាមេរិក​បរិហារ​ថា សាលាក្ដី​ខ្មែរ​ក្រហម​នៅ​ទន់​ខ្សោយ​ផ្នែក​រដ្ឋបាល​ ​និង​ប្រឈម​មុខ​នឹង​បញ្ហា​កង្វះ​ថវិកា។

លោក​គ្លីន វីលាម​សុនបាន​ប្រាប់​វីអូអេ​សំឡេង​សហ​រដ្ឋអាមេរិក​ ​តាម​ទូរ​សព្ទ​ក្នុង​ទីក្រុង​ភ្នំពេញ​ថា​ ​ការស្វែង​រក​ការ​រៃអង្គាស​ប្រាក់​ ​គឺជា​ផ្នែក​មួយ​នៃ​បេសក​កម្ម​របស់​លោក។

«អ្វីៗ​ទាំងអស់​ ​ដែល​ខ្ញុំ​ត្រូវ​ធ្វើ​នៅពេល​ដែល​ខ្ញុំ​នៅ​ទីនេះ​ ​មិនមែន​ត្រឹមតែ​រៃអង្គាស​មូលនិធិ​សម្រាប់​សាលាក្ដី​តែ​មួយ​មុខ​ទេ។​ ប៉ុន្ដែ​មាន​បញ្ហា​ជាច្រើន​ទៀត​ទាក់ទង​ទៅ​នឹង​ប្រតិបត្តិការ​របស់​សាលាក្ដី​ខ្មែរ​ក្រហម​ ​ហើយ​ជា​ការ​ពិត​ ​ការ​រៃ​អង្គាស​មូលនិធិ​សម្រាប់​សាលាក្ដី​ខ្មែរ​ក្រហម​ គឺជា​ផ្នែក​មួយ​នៃ​ដំណើរ​ទស្សនកិច្ច​នេះ»។

លោក​វីលាមសុន​ត្រូវ​បាន​តែងតាំង​ជា​អ្នក​ជំនាញ​ការ​ពិសេស​របស់​អង្គការ​សហ​ប្រជាជាតិ​កាល​ពី​ថ្ងៃ​ទី១ ​ខែ​កក្កដា​ ឆ្នាំ២០១០​ ​បន្ទាប់​ពី​លោក​បាន​បញ្ចប់​អណត្តិ​ជា​ឯក​អគ្គ​រដ្ឋទូត​គោចរផ្នែក​ឧក្រិដ្ឋ​កម្ម​សង្រ្គាម​របស់​សហរដ្ឋអាមេរិក​កាល​ពី​ឆ្នាំ​មុន។

លោក​គ្លីន វីលាមសុន​បាន​មក​ដល់​ប្រទេស​កម្ពុជា​កាល​ពី​យប់​ថ្ងៃ​ពុធ​ ​ហើយ​លោក​បាន​ចាប់​ផ្ដើម​ជួប​ប្រជុំ​ជាមួយ​មន្ដ្រី​សាលាក្ដី​ខ្មែរ​ក្រហម​កាល​ពី​ថ្ងៃព្រហស្បតិ៍ ​និង​កាលពី​ព្រឹក​ថ្ងៃ​សុក្រ​នេះ។

តាម​គម្រោង​ ​លោក​ត្រូវ​ជួប​ប្រជុំ​ជាមួយ​លោក​ឧបនាយក​រដ្ឋមន្ដ្រី​សុខ អាន​ ​នៅ​ថ្ងៃ​អង្គារ​សប្ដាហ៍​ក្រោយ។ ​ក្នុង​ដំណើរ​ទស្សន​កិច្ច​រយៈ​ពេល​មួយសប្ដាហ៍​របស់​លោក​ ​លោក​វីលាម​សុន​នឹង​ជួប​ប្រជុំ​ជា​មួយ​តំណាង​អង្គការ​សង្គម​ស៊ីវិល​ ​និង​តំណាង​ប្រទេស​ផ្ដល់​ជំនួយ​ផង​ដែរ។

នៅ​ក្នុង​របាយ​ការណ៍​របស់​ខ្លួន​ចេញ​ផ្សាយ​កាល​ពី​ថ្ងៃ​ព្រហស្បតិ៍​ម្សិលមិញ​ ​អង្គការ​គំនិត​ផ្ដួច​ផ្ដើម​យុត្តិ​ធម៌​សង្គម​សេរី ហៅកាត់​ថា​ ​OSJI ​ ដែល​មាន​មូល​ដ្ឋាន​ក្នុង​ទី​ក្រុង​ញូវ​យ៉កសហ​រដ្ឋអាមេរិក​ ​បាន​លើក​ឡើង​ថា​ ​សាលាក្ដី​ខ្មែរ​ក្រហម​កំពុង​ជួប​បញ្ហា​ផ្នែក​ផែនការ​ដឹកនាំ​ ​ហើយ​ការ​ដឹក​នាំរបស់​អង្គការ​សហ​ប្រជាជាតិដែល​មាន​ប្រសិទ្ធិភាពនិង​មាន​ចីរភាព​កម្រិត​ខ្ពស់​ គឺ​ជា​ការ​ចាំបាច់​ណាស់​សម្រាប់​ដោះស្រាយ​នូវ​បញ្ហា​នយោបាយ​ ​ដោះស្រាយ​ការផ្ដល់​មូលនិធិ ​និង​បញ្ហា​នៃ​ការ​ដឹកនាំ​ដែល​សាលាក្ដី​ខ្មែរ​ក្រហម​កំពុង​ជួប​ប្រទះ។

ប្រទេស​ផ្ដល់​អំណោយ​ទាន​ដល់​សាលាក្ដី​ខ្មែរ​ក្រហម​បាន​អនុម័ត​នូវ​កញ្ចប់​ថវិកា​ចំនួន​ជាង​ ​៨៧​លាន​ដុល្លារ​សម្រាប់​ដំណើរការ​សាលាក្ដី​នៅ​ឆ្នាំ​២០១០​ ​និង​ឆ្នាំ២០១១​ ​ក៏ប៉ុន្ដែ​នៅ​ក្នុង​កិច្ច​ប្រជុំ​សម្រាប់​រៃ​អង្គាស​ហិរញ្ញវត្ថុ​សម្រាប់​សាលាក្ដី​ខ្មែរ​ក្រហម​ក្នុង​ទីក្រុង​ញូយ៉ក​ ​កាល​ពី​ខែឧសភា​ ប្រទេស​ផ្ដល់​ជំនួយ​បាន​សន្យា​ត្រឹម​តែ​១៦,៨លានដុល្លារ​ប៉ុណ្ណោះ​ ​ក្នុងនោះ​ទឹក​ប្រាក់​ចំនួន​១៣,៥លានដុល្លារ​អាមេរិក​សម្រាប់​ភាគី​អង្គការ​សហ​ប្រជាជាតិ ​និង​ទឹកប្រាក់​ចំនួន​៣,៣ លានដុល្លារ​សម្រាប់​ភាគី​កម្ពុជា។​ មន្រ្ដី​កម្ពុជា​អះអាង​ថា​ ​ហិរញ្ញ​វត្ថុចំណែក​របស់ខ្លួន​នឹង​អស់​រលីង​នៅ​ត្រឹម​ខែ​តុលា​ខាង​មុខ​នេះ។

អង្គការ ​OSJI ​បាន​សរសេរ​នៅ​ក្នុង​របាយ​ការណ៍​របស់​ខ្លួន​ថា​ ​លោក​ជំនាញការ​ពិសេស​របស់​អង្គការ​សហ​ប្រជាជាតិគ្លីន វីលាមសុន​គួរតែ​លើក​ឡើង​អំពី​ការ​រៃអង្គាស​មូលនិធិ​ ​ការ​ជ្រៀត​ជ្រែក​ផ្នែក​នយោបាយ​ចូល​ទៅ​ក្នុង​សាលាក្ដី​ខ្មែរ​ក្រហម​ ​និង​ការ​សម្រេច​ចិត្ត​ក្នុង​ការ​ស៊ើប​អង្កេត​ជន​ជាប់​ចោទ​ជាដើម។

យ៉ាង​ណា​ក៏ដោយ​ ​លោក​រាជ សម្បត្តិ​ ប្រធាន​ផ្នែក​កិច្ចការ​សាធារណៈ​របស់​សាលាក្ដី​ខ្មែរ​ក្រហម​ ​បាន​បដិសេធ​មិន​ផ្ដល់​សេចក្ដី​អត្ថាធិប្បាយ​ណាមួយ​ជុំវិញ​ទស្សន​កិច្ច​របស់​លោក​គ្លីន វីលាមសុន​នេះ​ទេ៕

XS
SM
MD
LG