ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រតនាគារ​ក្រុង​ភ្នំពេញបង្គាប់​ឲ្យ​លោក​ស្រី​មួរ សុខហួរ បង់​ប្រាក់​ពិន័យ​


កាល​ពី​សប្តាហ៍​មុន រតនាគារ​ក្រុង​ភ្នំពេញ​បាន​បង្គាប់​ឲ្យ​លោក​ស្រី ​មួរ សុខហួរ អ្នក​តំណាង​រាស្រ្ត​គណ​បក្ស​ប្រឆាំង​បង់​ប្រាក់​ពិន័យចំនួន​៨​លាន​៥​សែន​ រៀល គឺ​សើ្មនិង​ប្រមាណ​ជាង​២០០០​ដុល្លា​រសហ​រដ្ឋ​អាមេរិក​បន្ទាប់​ពី​លោក​ស្រី​ ចាញ់​ក្តី​ពី​បទ​បរិហា​កេរ្តិ៍លោក​នាយក​រដ្ឋ​មន្រ្តី ​ហ៊ុន សែន ​នៅ​តុលាការ​កំពូល​មក។

កាលពី​ថ្ងែ​ទី ២ ខែ​មិថុនា​កន្លង​ទៅ​នេះ តុលាការ​កំពូល​បាន​តម្កល់​សាល​ដីកា​របស់​សាលា​ឧទ្ឋរណ៍​ ដោយ​តម្រូវ​ឲ្យ​លោក​ស្រី មួរ សុខហួរ បង់​ប្រាក់​ពិន័យ​ចំនួន​ជាង​២០០០ដុលា្ល​សហ​រដ្ឋ​អាមេរិក និង​ប្រាក់សំណង​ជម្ងឺ​ចិត្ត​ទៅ​លោក​នាយក​រដ្ឋ​មន្រ្តី ​ហ៊ុន សែន ចំនួន​១៩០០​ដុល្លា​សហរដ្ឋ​អាមេរិក។

នៅ​ក្នុង​លិខិត​ជូន​ដណឹង​មួយ​ច្បាប់​ដែល​មានចុះ​ហត្ថលេខា ​ដោយ​លោក​កែ ប៊ុនឡេង ប្រធាន​រតនាគារ​ក្រុង​ភ្នំពេញ បាន​បង្គាប់​ឲ្យ​លោក​ស្រី​មួរ សុខហួរ បង់​ប្រាក់​ពិ​ន័យ​ចំនួន​៨​លាន៥​សែន​រៀល​នៃ​ចំនួន​ទឹក​ប្រាក់​សរុប​ជាង​ ១៦ លាន ​៥ ​សែន​រៀល ទៅ​ឲ្យ​អង្គភាព​រតនាគារ​ក្រុង​ភ្នំពេញ នៅ​ក្នុងរយៈ​ពេល​តែ ​២ ​សប្តាហ៍​ប៉ុណ្ណោះ គិត​ចាប់​ពីថ្ងៃ​ទទួល​ដំណឹង​នេះ។

លោក ​កែ ប៊ុនឡេង ប្រធាន​រតនាគារ​ក្រុង​ភ្នំពេញ ពុំ​បាន​ធ្វើ​អត្ថាធិប្បាយ​ឲ្យ​បាន​ពិស្តារ​ទេ ដោយ​មាន​ប្រសាសន៍​យ៉ាង​ខ្លី​ថា រតនាគារ​ធ្វើ​ទៅ​តាម​នីតិ​វិធី​នៃ​ច្បាប់​តែ​ប៉ុណ្ណោះ។ លោក​បន្ត​ថា៖

«ខ្ញុំមិន​អាច​ធ្វើ​បទ​សម្ភាសន៍ហ្នឹង​បាន​ទេ ព្រោះ​ខ្ញុំ​ធ្វើ​ទៅ​តាម​ក្រម​នីតិ​វិធី​ព្រហ្ម​ទណ្ឌ​នៃ​ច្បាប់​ព្រះ​រាជាណា​ចក្រ​កម្ពុជា បង​មើល​ក្រម​ហ្នឹង មាត្រា​ទី៤៩៨ និង​៥២៥ ឃើញ​ហើយ។»

លោកស្រី​មួរ សុខហួរ ដែល​បច្ចុប្បន្ន​កំពុង​ស្នាក់​នៅ​សហរដ្ឋអាមេរិក នៅ​ក្នុង​ដំណើ​ទស្សនៈ​កិច្ច​របស់​លោក​ស្រី​ចំនួន​២​សប្តាហ៍​ ពុំ​អាច​ស្នើ​សុំ​សេចក្តី​អត្ថា​ធិប្បាយ​បំភ្លឺ​បាន​ទេ​នៅ​ថ្ងៃ​នេះ។ ក៏​ប៉ុន្តែ​លោក​ស្រី​ធ្លាប់​បាន​មានប្រសាសន៍​ថា លោក​ស្រី​នៅ​តែ​ប្រកាន់​ជំហរ​ដាច់​ខាត​មិនបង់​ប្រាក់​ពិន័យ​ទាំង​នេះ​ទេ។

លោក ​សុខ រឿន ព្រះ​រាជ​អាជ្ញា​រង​នៃ​តុលាការ​ក្រុង​ភ្នំពេញ​បាន​មាន​ប្រសាសន៍​ថា បើ​តាម​នីតិ​វិធី​នៃ​ច្បាប់ បន្ទាប់​ពី​សេចក្តី​ជូន​ដំណឹង​របស់​រតនាគារ​ផុត​សុពលភាព​ ព្រះ​រាជ​អាជ្ញា​នឹង​ធ្វើ​លិខិត​ជូន​ដំណឹង​មួយ​ទៀត ដោយ​ទុក​រយៈ​ពេល​១០​ថ្ងៃ​ទៀត ក៏​ប៉ុន្តែ​បើ​លោក​ស្រី​មួរ សុខហួរ នៅ​តែមិន​ព្រម​បង់​ប្រាក់​ពិន័យ​នេះ​ទៀត លោក​ស្រី នឹង​ប្រឈម​នឹង​ការ​ចាប់​ខ្លួន​ដាក់​ពន្ឋនាគារ​ដោយ​បង្ខំរាង​កាយ។ លោក​ថ្លែង​ថា៖

«បើ​នៅ​តែ​មិន​បង់ គឺ​ទៅ​តាម​មាត្រា៥២៦ គឺ​តំណាងអាយ្យការ​បញ្ជា​បង្ខំ និង​ឲ្យ​ឃុំ​ខ្លួន​ទៅ​តាមមាត្រា​៥២៦ ឃុំ​ខ្លួន​ដើម្បី​បង្ខំ​រូប​កាយ​ទារ​ប្រាក់​ពិន័យ​ជា​ប្រាក់​របស់​រដ្ឋ។»

កាល​ពី​យប់​ថ្ងៃ​ព្រហស្បតិ៍សប្តាហ៍​មុន លោក​ស្រី​មួរ សុខហួរ បាន​ចាក​ចេញ​ពី​ប្រទេស​កម្ពុជាទៅ​កាន់​សហរដ្ឋ​អាមេរិក ក្នុង​គោល​បំណង​ស្វះ​ស្វែង​រក​អន្តរាគមន៍​ពី​លោក​ប្រធានាធិបតី​សហរដ្ឋ​អាមេរិក បារ៉ាក់ អូបាម៉ា ចំពោះ​អ្វី​ដែល​លោក​ស្រី​បាន​អត្ថាធិប្បាយ​ថា បាន​ចាញ់​ក្តី​យ៉ាង​អយុត្តិធម៌​ជា​មួយ​លោក​នាយក​រដ្ឋ​មន្រ្តី​ហ៊ុន សែន។

លោក​ស្រី​មួរ សុខហួរ នឹង​ដាក់​បញ្ចាំង​ខ្សែរ​ភាពយន្ត​ឯកសារ​ដែល​មាន​ចំណង​ជើង​ថា «ភ្លើង​ក្រហម» នៅ​ថ្ងៃ​ចន្ទ័​នេះ។

លោក​ស្រី​ បាន​ចំណាយ​ពេល​ថត​ភាពយន្ត​ឯកសារ​នេះ​ជាមួយ​ផលិតករ​ជនជាតិ​អាមេរិក​ចំនួន​៣​រូប ​អស់​រយៈពេល​៤ឆ្នាំ ដើម្បី​បង្ហាញ​អំពី​ស្ថានភាព​ជួញដូរ​ស្រ្តី និង​កុមារ​នៅ​កម្ពុជា។

XS
SM
MD
LG