ប៉ូលិសអ៊ុយក្រែននៅ Irpin លាកូនដែលយំស្រែកឱបឪពុក ខណៈគ្រួសារត្រូវជម្លៀសខ្លួនចេញ
- Reuters
កាលពីថ្ងៃអង្គារ ក្មេងប្រុសម្នាក់ទ្រហោរយំឱបឪពុក ព្រោះតែឪពុករបស់ខ្លួនត្រូវចាកចេញពីគ្រួសារ គ្រាដែលស្ត្រីជាម្តាយនិងកូនៗត្រូវភៀសខ្លួនចេញពីតំបន់ Irpin ដោយសារទាហានរុស្ស៊ីកំពុងវាយប្រហារចូលក្នុងក្រុង។ ពលរដ្ឋនៅក្នុងតំបន់ Irpin បាននាំគ្នាភៀសខ្លួនដោយសារការទម្លាក់គ្រាប់បែកដ៏ខ្លាំងក្លារបស់ទាហានរុស្ស៊ី ដោយខ្លះរុញកូនតូចនឹងរទេះ ឬក្រៀកកូនតូចជាប់នឹងខ្លួន រីឯអ្នកខ្លះទៀតបានរត់ភៀសខ្លួនជាមួយសត្វចិញ្ចឹមនិងសម្ភារៈតិចតួចដាក់ក្នុងថង់។ មនុស្សជាង ២ លាននាក់ ភាគច្រើនជាស្ត្រីនិងកុមារ បានរត់ភៀសខ្លួនចេញពីអ៊ុយក្រែន ចាប់តាំងពីរុស្ស៊ីបានឈ្លានពានលើប្រទេសនេះ កាលពីថ្ងៃទី ២៤ ខែកុម្ភៈមក។ នេះបើយោងតាមឧត្តមស្នងការប្រចាំអង្គការសហប្រជាជាតិទទួលបន្ទុកកិច្ចការជនភៀសខ្លួន៕