បក្សកុម្មុយនិស្តចិនបានបណ្តេញចោលអតីតរដ្ឋមន្ត្រីការពារជាតិ ២ នាក់ គឺលោក Li Shangfu និងលោក Wei Fenghe។
បើតាមទីភ្នាក់ងារសារព័ត៌មានរដ្ឋ Xinhua របស់ប្រទេសចិន អតីតរដ្ឋមន្ត្រីទាំងពីរ ត្រូវបានចោទប្រកាន់ថាបានប្រព្រឹត្តអំពីពុករលួយ។
សេចក្តីរាយការណ៍របស់ Xinhua បាននិយាយថា៖ «ក្នុងនាមជាមន្ត្រីជាន់ខ្ពស់នាំមុខនៃគណបក្សនិងកងយោធា លោក Li Shangfu បានក្បត់បេសកកម្មរបស់លោក បានក្បត់នឹងការទុកចិត្តរបស់គណៈកម្មាធិការមជ្ឈិមបក្ស និងគណៈកម្មការយោធាមជ្ឈិម ហើយបានធ្វើឱ្យមានការខូចខាតយ៉ាងខ្លាំង ដល់បុព្វហេតុរបស់បក្ស និងកិច្ចការពារប្រទេស។
សេចក្តីរាយការណ៍នោះបានបន្ថែមថា ការស៊ើបអង្កេតមួយ ដឹកនាំដោយគណៈកម្មាធិការមជ្ឈិមបក្សបានរកឃើញថា លោក Li បានស្វែងរកផលចំណេញសម្រាប់ខ្លួនលោកនិងអ្នកឯទៀត ហើយមិនបានបំពេញតួនាទីនយោបាយរបស់លោក។
លោក Li ថែមទាំងត្រូវបានសង្ស័យថា បានទទួលប្រាក់សំណូកយ៉ាងច្រើនសន្ធឹក និងបានសូកប៉ាន់អ្នកដទៃផងដែរ។ នេះបើតាមសេចក្តីរាយការណ៍របស់ Xinhua។
សេចក្តីរាយការណ៍របស់ Xinhua ជាការបញ្ជាក់ជាផ្លូវការជាលើកទីមួយ អំពីការស៊ើបអង្កេតលោក Li និងអំពីសេចក្តីលម្អិតនៃការចោទប្រកាន់ឧក្រិដ្ឋកម្មលើរូបលោក។
កាលពីខែតុលាឆ្នាំមុន លោក Li ត្រូវបានដកចេញពីតំណែង បន្ទាប់ពីបានបាត់មុខ អស់ពេលជិត ២ ខែ។ លោកត្រូវបានជំនួសដោយលោកឧត្តមនាវីឯក Dong Jun។
អតីតរដ្ឋមន្រ្តីការពារជាតិមុនលោក Li គឺលោក Wei Fenghe ក៏បានបាត់មុខអស់មួយរយៈដែរ ក្រោយពីលោកត្រូវបានបណ្តេញចេញពីមុខតំណែង នៅពេលមានការរុះរើគណៈរដ្ឋមន្ត្រី កាលពីខែមីនាឆ្នាំមុន៕
វេទិកាបញ្ចេញមតិ