ភ្ជាប់​ទៅ​គេហទំព័រ​ទាក់ទង

ប្រតិកម្ម​របស់​ប្រជា​ពល​រដ្ឋ​រស់នៅ​ជុំវិញ​សារមន្ទីរ​ប្រល័យ​ពូជសាសន៍​ទួល​ស្លែង


ភ្នំពេញ៖ ប្រជា​ពល​រដ្ឋ​រស់នៅ​ជុំវិញ​សារមន្ទីរ​ប្រល័យ​ពូជសាសន៍​ទួល​ស្លែង​ក្នុង​ទីក្រុង​ភ្នំពេញ​បាន​សម្ដែង​ការ​ខកចិត្ត​ចំពោះ​សាលក្រម​ផ្ដន្ទាទោស​ឌុច ដោយ​ពួកគេ​លើក​ឡើង​ថា​ ​សាលក្រម​នោះ​គ្មាន​ន័យ​សម្រាប់​ពួកគេ​ឡើយ។

ដូច​ក្រុម​ជនរងគ្រោះ​នៅ​ក្នុង​របប​ខ្មែរ​ក្រហម​ជាច្រើន​ផ្សេង​ទៀត​ដែរ​ ​ប្រជា​ពលរដ្ឋ​ដែល​រស់នៅជុំវិញ​អតីត​គុក​ទួល​ស្លែង​ ដែល​បច្ចុប្បន្ន​ក្លាយ​ជា​សារមន្ទីរ​ប្រល័យ​ពូជសាសន៍​ទួល​ស្លែង​នោះ​ ​បាន​សម្ដែង​ការ​មិន​ពេញ​ចិត្ត​ចំពោះ​សាលក្រម​សម្រេច​ផ្តន្ទា​ទោស​ឌុច​ឲ្យ​ជាប់​ពន្ធនាគារ​រយៈពេល​៣​៥ឆ្នាំ។

លោក​ ញឹក សូផាត ​អាយុ​៦១​ឆ្នាំ​គឺជា​ប្រជា​ពលរដ្ឋ​ម្នាក់ ​ដែល​រស់នៅ​អែប​នឹង​សារមន្ទីរ​ប្រល័យ​ពូជ​សាសន៍​ទួល​ស្លែងនោះ​ ​ហើយ​បាន​តាមដាន​ការផ្សាយ​ផ្ទាល់​តាម​កញ្ចក់​ទូរទស្សន៍​នូវ​ការ​ប្រកាស​សាលក្រម​ផ្តន្ទា​ទោស​ឌុច កាល​ពី​ព្រឹក​ម៉ិញ​នេះ។

លោក​ ញឹក សូផាត​មាន​ប្រសាសន៍​ថា​ ​ការសម្រេច​របស់​សាលាក្ដី​ខ្មែរ​ក្រហម​ក្នុង​ការ​ផ្តន្ទា​ទោស​ឌុច ឲ្យ​ជាប់​ពន្ធ​នា​គារ​រយៈ​ពេល​៣៥​ឆ្នាំ​នេះ​គឺ​មិន​សាក​សម​ទៅ​នឹង​ទំហំ​នៃ​ឧក្រិដ្ឋ​កម្ម​ដែល​ឌុច​បាន​ប្រព្រឹត្ត​ទៅ​លើ​ជនរងគ្រោះ​ នៅ​ពេល​ដែល​គាត់​ធ្វើ​ជា​ប្រធាន​មន្ទីរ​សន្តិសុខ​ស២១ ឬ​គុក​ទួល​ស្លែង​នោះ​ទេ។

«ឧទាហរណ៍​ ទៅ​ប្លន់​បាញ់​កាប់សម្លាប់​ ​ច្បាប់​យើង​សព្វ​ថ្ងៃ​ដាក់ទោស​រហូត​ដល់​១៥​ឆ្នាំ។ ​នេះ​សម្លាប់​តែ​ម្នាក់​ផង ហើយ​ចុះ​ដល់​នេះ​ ​ដល់​រ៉ាប់​ម៉ឺន​នាក់​ទៅ​ហើយ​ ​ធ្វើ​ដោយ​ផ្ទាល់​ផង​ ដោយ​ប្រយោល​ផង​ដល់​រ៉ាប់​ម៉ឺន​នាក់​ ​បើ​គិត​ជា​គុក​វិញ​ ​គាត់​រក​ពន្លឺ​ថ្ងៃ​មិន​ឃើញ​ទេ។​ ដល់​សម្លាប់​វាល់អស់​ប៉ុណ្ណឹង​ហើយ​ ស្រាប់​មក​ដល់៣៥​ឆ្នាំ។​ ខ្ញុំ​អត់​មាន​ពាក្យ​អី​និយាយ​ទេ។ ​ដូច​ខ្មែរ​យើង​ថា ​អស់​វា​ចារ​នឹង​ថ្លែង។​ ឮ​អញ្ចឹង​ ខ្ញុំ​ធ្លាក់​ថ្លើម​ក្តុក»។

ក្នុង​ការ​អាន​សាលក្រម​កាលពី​ព្រឹក​ម៉ិញ​ដែល​ត្រូវ​បាន​ផ្សាយ​បន្ត​ផ្ទាល់​ដោយ​ស្ថានីយ៍​ទូរទស្សន៍​និង​វិទ្យុ​ក្នុង​ស្រុក​មួយ​ចំនួន​ ​លោក​ចៅក្រម​ និល ណុន​ ប្រធាន​អង្គ​ជំនុំ​ជម្រះ​សាលា​ដំបូង​នៃ​សាលាក្ដី​ខ្មែរ​ក្រហម​ ​បាន​ប្រកាស​ដាក់​ទោស​ឌុច​ឲ្យ​ជាប់​ពន្ធនាគារ​រយៈ​ពេល​៣៥​ឆ្នាំ​ ចំពោះ​ឧក្រិដ្ឋកម្ម​ដែល​បាន​បណ្ដាល​ឲ្យ​មនុស្ស​យ៉ាង​តិច​ជាង​ ១២៣៨០​នាក់​ ​ដោយ​រួម​ទាំង​កុមារ​ផង​ ​បាន​ស្លាប់​យ៉ាង​អាណោច​អាធម្មនៅក្នុង​គុក​ទួលស្លែង​ ចន្លោះ​ឆ្នាំ​១៩​៧៥​ ដល់​១៩៧៩។

ប៉ុន្តែទោសនេះ​ត្រូវ​កាត់បន្ថយចំនួន​១៦​ឆ្នាំ​ ដែល​ក្នុងនោះ ​៥ឆ្នាំដោយសារ​តែ​ការ​រំលោភ​លើ​សិទ្ធិ​របស់ឌុច​ ក្នុង​អំឡុង​ពេល​ឃុំ​ខ្លួន​គាត់​ខុស​នីតិវិធី​ដោយ​តុលាការ​យោធា​កម្ពុជា​ និង១១​ឆ្នាំ​ទៀត​ ដោយសារការទូទាត់​រយៈពេល​ឃុំខ្លួន​គាត់​តាំង​ពី​ឆ្នាំ​១៩៩៩​ រហូត​ដល់​ឆ្នាំ​២០១០​នេះ។ ​ ដូច្នេះ​ ​សរុប​មក​ ឌុច ឬកាំង ហ្កេកអ៊ាវ​ ដែល​បច្ចុប្បន្ន​មាន​អាយុ​៦៧ឆ្នាំ​ ​នឹង​ត្រូវ​ជាប់​ពន្ធនាគារ​រយៈ​ពេល​តែ​១៩​ឆ្នាំ ប៉ុណ្ណោះ។

លោក​ ញឹក សូផាត ​ដែល​បាន​រំពឹង​ទុក​មុន​ពេល​ការ​ប្រកាស​សាលក្រម​ថា​ ​ឌុច​នឹង​ត្រូវ​ជាប់ទោស​យ៉ាង​ហោច​ណាស់​ក៏​៤០​ឆ្នាំនោះ​ មាន​ប្រសាសន៍​ថា​ ​ការ​សម្រាល​ទោស​ដល់​ឌុច​នេះ​រឹត​តែ​ធ្វើ​ឲ្យ​លោក​បាក់​ទឹកចិត្ត​ថែម​មួយ​កម្រិត​ទៀត​ ​ដោយ​លោក​ចាត់​ទុក​ថា​ ​សាលក្រម​របស់​តុលាការ​បែប​នេះ គឺ​គ្មាន​ន័យ​សម្រាប់​លោកទេ។

«ច្បាប់​កាត់​ប៉ុណ្ណឹង​ ​ហើយមាន​ការ​លើក​លែង​ បន្ធូរ​បន្ថយ​ទៀត​ ​បួនដប់​ឆ្នាំ​ទៅ​ទៀត។ ​វា​ថយៗ​មក​ទៀត។ ​អញ្ចឹងវា​គ្មាន​ន័យ​ទេ។ ដូច​វា​ធូរ​ស្រាល​ពេក។​ អញ្ចឹង​បាន​ខ្ញុំ​ថា​ ​វា​ដូច​លេង​សើច​អញ្ចឹង។ ​វា​ពិបាក​ណាស់»។

អ្នកស្រី ហៃ​ ងីម វ័យ​៧០ ​ជា​ប្រជា​ពលរដ្ឋ​ម្នាក់​ទៀត ​ដែល​រស់​នៅ​ទល់​នឹង​របង​ខាង​ក្រោយ​សារ​មន្ទីរ​ប្រល័យ​ពូជសាសន៍​ទួលស្លែង ​មាន​ប្រសាសន៍​ថា​ ​រយៈពេល​១៩​ឆ្នាំក្នុង​គុក​សម្រាប់ ​ឌុច​ ហាក់​មិន​ទំនង​ទាល់​តែ​សោះ​ ​ដោយអ្នក​ស្រី​សំអាង​ហេតុផល​ថា​ ​ ឌុច​បាន​សម្លាប់​មនុស្ស​អស់​ជាច្រើន។

ប្រជា​ពលរដ្ឋ​ដែល​រស់​នៅ​ក្បែរ​អតីត​គុក​ទួលស្លែង​ម្នាក់ទៀត​ គឺ​អ្នកស្រី​ ប៉ុល ណារិន​ អាយុ​៣៥​ឆ្នាំ​ ដែល​បាន​តាមដាន​ការ​ប្រកាស​សាលក្រម​ឌុច​តាម​ទូរទស្សន៍​ដែរ​នោះ​ ​មានប្រសាសន៍ទាំង​ទឹក​ភ្នែក​រលីង​រលោង​ថា​ ​នៅ​ពេល​ដែល​ឮ​ការ​ប្រកាស​សាលក្រម​ផ្តន្ទាទោស​ឌុច​នោះ​ ​អ្នកស្រី​បាន​ស្រក់​ទឹក​ភ្នែក​ ដោយ​សារ​រយៈ​ពេល​នៃ​ការ​ផ្តន្ទា​ទោស​ឌុច​ឲ្យ​ជាប់​ពន្ធនាគារ​នោះ​ ខ្លី​ពេក​សម្រាប់​អ្នក​ស្រី។

«ការ​កាត់ទោស​ហ្នឹង​ ​បង​យល់ថា​ ​តិច​ណាស់។ ​ចង់​កាត់​ឲ្យ​ច្រើន​ ព្រោះអី​វា​ឈឺ​ចាប់​អាណិត​ជន​រងគ្រោះ»។

អ្នកស្រី​ ស៊ី សុផា ​វ័យ​៦៧​ឆ្នាំ​ ជា​មន្ត្រីរាជការ​ចូល​និវត្ត​ម្នាក់ ​ដែល​កូន​តែ​ពីរ​នាក់​របស់​អ្នកស្រី​បាន​ស្លាប់​នៅ​ក្នុង​សម័យ​ខ្មែរ​ក្រហម​ដែរ​នោះ​ ​មាន​ប្រសាសន៍​ថា​ ​ឌុច​ពិត​ជា​មនុស្ស​មាន​សំណាង​មែន ​ដែល​គាត់​បាន​ទទួល​ទោស​តែ​១៩​ឆ្នាំ​នោះ។

អ្នក​ស្រី ​ស៊ី សុផា ​បាន​បន្ថែម​ថា​ វាហាក់​ដូចជា​ឌុច​បាន​កើត​ម្តង​ទៀត​ដូ​ច្នោះ​ដែរ​ ចំពោះ​កម្រិត​ទោស​ប៉ុណ្ណឹង​នោះ៕

XS
SM
MD
LG